Matiye 12 - Bible en Guidar

Yesu gəm pay naffete

¹ Pay dəpaska, Yesu atoŋguk kəladdəv guli na haykəmari pay naffete. May armek gewleɗ nani, yaŋ aŋzlaŋ ki haya, ampərəni.

² Adan Farisaɗe awlanən vaska, anah sənən na: Awle gewleɗ nok adaɗɗaŋ an dəslə naɗɗa pay naffet ɓa.

³ Yesu azlan sitike: Kəŋɗanən an məs Davit agəɗ gala mãy ada ndən dit ɗiy nammban ɓa sa?

⁴ Va atoŋ addəv gəla na Maŋgəlva, azimin peŋɗe na ma tuya, məs ndəni awaniɓa ɗiy en dəndən tahəŋ də tive nawzimit abbər məsdəlveŋge kaka' ɓa ɓa sa?

⁵ Awaniɓa kəŋɗanən ɗah addəv ɗerewel na mahenziŋ na, pay naffete, məsdəlveŋge addəv Gəla na Maŋgəlva tay əraygənən pay naffete, məza əsan sit ka mbərayən ɓa ɓa sa?

⁶ In tat ənah sukum: An dəday ki Gəla na Maŋgəlva də gagdak tay aŋka.

⁷ Va kəprəmənək gabba əpel dənah na: Ulasahã nəŋgələ, əzaɓ-Maŋgəlva yi ɓa, kəta kətawən na wən aket ɗiy məs dəɗɗaŋ mambray ɓaŋɓa.

⁸ Vi Wətən Ɗəf van afən pay naffeti.

Ɗəf məs van məmtəni

⁹ Yesu zar sədaka, ammbat addəv gəla nakkal net mə Yudeɗi.

¹⁰ Ɗəf məs van məmtən tay adaka. Ɗiy assohõnən vi karman də wəna dawnəh na: Tive nawmbəlgən ɗəf pay naffet tay sa?

¹¹ Yaŋ azlan sit na: Ɗəf awani səwalaŋkum, an tay də time taka kaka', an abətək a vov pay naffet na, al na ərman kakdəhən ɓa di?

¹² Ɗəf adayək ki time də sləma, vi vaski lewi əɗɗa wəza moggon pay naffete.

¹³ Yaŋ aɓsən sən ɗəf nak na: Appar voko. Apparək vani akkpaŋgək gboloŋgboloŋ va an maɓɓani.

¹⁴ Farisaɗe agulyoŋko, aslerinik met akani vi kawrəh tive nawzani.

Gawla an Maŋgəlva aweli

¹⁵ Adan Yesu asən wən neti, ambatək sədaka, yaŋ ɗiy diyɗa azbanənka. Ambəlgitik pakə.

¹⁶ Ndən met tak adarbanən na ndəni ɓa.

¹⁷ Vi kaknahan an məskəleŋ Isaya anah dawnəh na:

¹⁸ Gawla naw an məs nəwel yaŋka, an məs nəŋgəl nenneken zu dəndən. Wanəɗi Əmpəs naw akani, warban təstəs sit ɗiy-ɗarə.

¹⁹ Agay na də ɗəf ɓa, aŋgəsl na vamvəl ɓa, ɗəf tay naprəm wəlan aket tiveɗ ɓa,

²⁰ aŋzlu na eflere an dədoɗ ɓa. Amtan na lalam an dədaɗɗa enene ɓa, hã gap ndən ziwgin ətawwən əska wəla.

²¹ Ɗiy-ɗar waɗiyənən əɗɗum net akani.

Yesu tay əzlan aka wən məhew akani

²² Yaŋ məki sən ɗəf dit tuyeŋge akani, daŋgari gəm goryom mərma hərzlumən, Yesu ambəlgənəka, goryom mərma hərzlumən nak apelke, awəlka.

²³ Ɗiy pak aggətaŋka, aɓɗaŋ na: Ɗəfəŋ wətən Davit ɓa sa?

²⁴ Adan Farisaɗe aprəmən vaska, aɓɗaŋ na: Ɗəfəŋka Belzebul məlĩ net tuyeŋɗe dəpsən gbogboŋ adarɓih tuyeŋɗe.

²⁵ Yesu asənək əɗɗum neti, aɓsit na: Məlĩ pak an ɗiy nan dəslereŋ aweleŋgit ɓa, arayka; walaŋgəla-metiŋ awaniɓa gəla na ɗəf awan di pakə, an ɗiy nan dəslereŋ ɓa, aziw na ɓa.

²⁶ An Satan tay ərɓəh Satan na, awɗakanək ki zəni, mbarmbari məlĩ nan adawziw kan di?

²⁷ Ya an naw də Belzebul nədawgilgit tuyeŋɗe na, kirtukum net də miy adawgilgitin di? Vi aski adassoŋ mətawaŋ wən akokum.

²⁸ Ya an də Əmpəs na Maŋgəlva nədawgilgit tuyeŋɗe na, vas kan na məlĩ na Maŋgəlva agapək akokum.

²⁹ Mbarmbar ɗəf adawɓap ətoŋ ana ɗəf gurom da kawnda arya nan an dəɓruk ɗəf gurom van ɓa di? As kan na waklomon gəla nani.

³⁰ Ɗəf an tay də in ɓa, məzuzel nawi. Ɗəf an dəbbah su əkkalan ɓa, watərayani.

³¹ Vi vaski nədawnah sukum: Mambraya gəm əpel mbərayən aka Maŋgəlva pak kavvuyon siti ɗiyi. Ya əpel mbərayən aka Zeŋgile Salala kavvuyoni ɓa.

³² Məs dəpel mbərayən aka Wətən Ɗəfa kavvuyon səni, ya məs dəpel mbərayən aka Zeŋgile Salala, kavvuyon səni ɓa. Kavvuyoni aka pay an kakaŋka ɓa, aka pay an dədazan ɓa.

Wəlaŋga gəm uwa nani

³³ An wəlaŋga moggoni, uwa nan wasan moggoni. An wəlaŋga moggoni ɓa, uwa nan zlaŋ wasan moggoni ɓa. Aza uwa nan adawsənən wəlaŋga.

³⁴ Zeŋvit barwayɗe, mbar kədawɓap əpeleŋ aket zəgeɗ moggeti ya mbara mbəraykum kənanaŋ di? Vi an ma ɗəf adawpele sə makra ɗəf adawpislkiwe.

³⁵ Ɗəf moggoni wagilgit zəgeɗ mogget sə təki əzaɓ nan moggoni, ɗəf mbərayən wagilgit zəgeɗ mbəreyit sə təki əzaɓ nan mbərayən.

³⁶ In tat ənah sukum: Pay wəgrak dəlva, ɗiy wazlanən aba ətawwən aka əpel ɗar dəgil sə metəŋ pakə.

³⁷ Vi aza əpel noki adawɗikun ka ɗəf təstəsə, aza əpel noki wən adarmuko.

Əssoh sekene

³⁸ Ɗiy sə waleŋgit Mərbaŋ-mahenziŋ dit Farisaɗe anah sənənək Yesu na: Mərbəzəga mam aka ula sekene an dəde səzoko.

³⁹ Yaŋ Yesu azlani, aɓsit na: Sayit ɗiy mbəreyti, məs məluvuluvuɗe. Tay əŋglaŋ Sekene ya arahaŋ na sekene maɓɓan abbər sekene na məskəleŋ Yonas ɓa.

⁴⁰ Va Yonas agəɗ pay hoku dəfəɗ hoku addəv kilfi, vaski Wətən Ɗəf tam adaɗɗa, pay hoku dəfəɗ hoku ammba dəlvafuŋ.

⁴¹ Ɗiy na walaŋgəla-metiŋ na Niniwe wasilyoŋ pay əgrak dələv aka sayit ɗiyiŋki, watawən wən aketi, vi aɗiyaŋgək marava aka aprəmənən əpel na Maŋgəlva sə ma Yonas. Yaŋ an dəday ki Yonas tay aŋka.

⁴² Pay əgrak dələv na, məlyaŋgək na dohoŋ watəsil aka sayit ɗiyiŋki, watətaw wən aketi, vi tədek hã sə meteɓ ma dələv vi kaprəm əpel na Salmoŋ də wəsən nani. Ya an dəday ki Salmoŋ tay aŋka.

Əmilye na tuya

⁴³ An tuya agilik səka ɗəfa, wabbal awra wakay təki naffete, an dərah ɓa,

⁴⁴ asna wanah na: Wanəmil addəv gəla naw məs nəgil səddəvən naka. An amilik addəvən, warəh də mani, məfaɗani gəm məzaɓani.

⁴⁵ Asna wambatə, waki əmpəsɗe mbəreyit meɓɓet buhul sap azani, mbəreyit day kiyən anani, watoŋgoŋ wassoŋ adaka. Əsuwa na ɗəfəs wasan tuwãh day ki an daabəŋ. Vaski adawsan sən sayit ɗiy mbəreytiŋki.

Ma Yesu dit milmiŋgiɗni

⁴⁶ Aka Yesu adawpel sit ɗiy tagay, mãy man dit milmiŋgiɗin tahəŋ ziwziw appaka, met aka əpel səni.

⁴⁷ Yaŋ ɗəf aɓsən Yesu na: Mok dit milmiŋgiɗuk yeŋ ziwziw appaka, met aka əpel suko.

⁴⁸ Yaŋ Yesu azlani, aɓsən ɗəf dədawpel sən nak na: Nawattə əmma di? Mədəŋgaŋ milmiŋgiɗu di?

⁴⁹ Yaŋ atəl van azet gewleɗ nani, amna: Akəŋtə əmma dit milmiŋgiɗwa.

⁵⁰ Vi ɗəf məgəɗ əŋgla na Afu na disiŋ pak, ndəni məlmuwa, ndəni məlmu məguluŋguta gəm əmma.