Matiye 10 - Bible en GuidarMaslənɗe kəlaw kiyit sula ( MAR 3:13-19 ; LUK 6:12-26 ) 1 Səza Yesu aye gewleɗ nan kəlaw kiyit sula. Apsitik gbogboŋ narɓih tuyeŋɗe nanzaɗ gbəgba awani pakə gəm əray awandi pakə. 2 Iya net maslənɗe kəlaw kiyit sula van yaŋka. Simoŋ məs adawyaŋ na Piyer, gəm Andre məlməni, Yakob də Yohanna məlməni, kirtin Zebede. 3 Filip gəm Bartelemi gəm Tomas gəm Matiye, mətaf nzalaka, Yakob wətən Alfe, gəm Tadde. 4 Gəm Simoŋ mə Kanan, gəm Yudas Iskariyot, məs dəzəm ki Yesu. Əslən maslənɗe kəlaw kiyit sula ( MAR 6:7-13 ; LUK 9:1-6 ) 5 Eŋkiŋ gewleɗ kəlaw kiyit sula məs Yesu aslən dawɗi sit wən nan na: Kədawgəmən tive nadda anet ɗiy-ɗar da ɓa, kədawtoŋgoŋ a walaŋgəla-metiŋ net mə Samari ɓa'e. 6 Məddoŋ dərəŋ azet mə Israyelɗe timiŋgiɗ məzeti. 7 Tive tive na, mətəlma dawnəh na: Məlĩ na disiŋ tay go'o. 8 Məmbəlgit məs gbəgbaɗe, məsilgit ɗiy məmtiti, məbbur məskokoleɗi, mərɓih tuyeŋɗe. Mekeleŋ kərəhəni, məpsit mekeleŋ tamə. 9 Kədawkaŋ meleŋge ɓa, təbəz babar ɓa, awaniɓa təbəz pepreŋ avokum ɓa. 10 Mãy nzəkkari nadda malaka ɓa, lukutɗe sula ɓa, hensekɗe ɓa, sulegere ɓa. Vi məgəɗ wəza adahək nawrəh əzəm nani. 11 A walaŋgəla-metiŋgini awaniɓa a walaŋgəla muzliya an kətoŋgoŋ pak, məssõh ɗəf an dəslə, məssoŋ adak hã gap əmbat nokum. 12 Dawtoŋ ana ɗəf da van na: Məsɗani. 13 An gəla van adahka, asna zazay nokum dəsan akani, ya an dədah ɓa, zazay nokum dəmndan sukum. 14 An mətafkumi ɓa, məprəmni əpel nokum ɓa, dawgilye səddəv gəla vani awaniɓa sə walaŋgəla-metiŋ vanəska, məttu' hologudum səza təlkum. 15 In tat ənah sukum, pay ətawwən na, tatwãh na dələv na Sodom də Gomorra wasan dəɗah ki na walaŋgəla-metiŋ vanəska. Əsərma an dədazzan temtemi ( MAR 13:9-13 ; LUK 21:12-17 ) 16 In tat əslənkum yaŋ va timiŋgiɗ a weleŋgit kirɗemuyã. Vi vaski məssoŋ ketket va dohõɗe, məza mambray azokum ɓa va biŋgeɗ na maha. 17 Ya məga zukum səzet ɗiyi, vi wapsukkumun avet mətawaŋwəna wargukumən addəv gəla nakkal neti. 18 Wakukumən abet deyeɗe na kivadələv temtemi dit milyeŋge vi wən nawa, wakəssoŋ ka məziwe abeti gəm abet ɗiy-ɗarə. 19 Pay adapsukkuməni, kədawgeslne'eŋ na, mbarmbari awaniɓa mi kədawnəhaŋ di ɓa. Vi an kədawpeleŋ wade amokum pay nani. 20 Vi mənokumtə kədawpeleŋ ɓa, Əmpəs na Afukum dədawpel addəvkum. 21 Ɗəf wagəm məlmən əkan ama əmta, afən wəyin tam wətəni. Kirin wasilyoŋ aket migilti, kawbeyti. 22 Ɗiy pak wazelkumən vi iya nawa. Ya ɗəf an dəziw ɓəlɓəl hã aza əgrak na wakõhu. 23 An asərnənək mokum addəv walaŋgəla-metiŋ aŋka, mənzoŋ addəv an mbərən. Gesiŋ nədawnah sukum: Kəgrakən na walaŋgəleɗe gugriɗ net mə Israyelɗe pak tak Wətən ɗəf dəde ɓa ɓa. 24 Məzuyak zəga aday na ki mərbəzəga ɓa, məgəɗ wəza aday na ki daya nan ɓa. 25 Məzuyak zəga dəgap va mərbəzəga nani gəm məgəɗ wəza dəgap va daya nan kaka'ə. Ya an ayanənək afən gəla na Belzebul, mbari ɗiy neŋgil ananda kandi, aday na ki as ɓa sa? Ɗəf an dəslə nawgeslne səni ( LUK 12:2-7 ) 26 Kədawgeslne'eŋ sitin ɓa. An mətərən pak wappasə, tay an məɗama məs agil na appaka ɓa ɓa. 27 An nədawnah sukum ara guzli pakə, mərban kapaya. An nədawnah sukum məɗama pak məgilgən appaka. 28 Kədawgeslne'eŋ sitin məzubayən gəɓa zukum ya aɓapən na əbay zeŋgile zukum ɓa ɓa. Məgeslne'sən an nawzan gəɓa zukum də zeŋgilokum pak addəv offo məs amta ɓa. 29 Kawvilti honzurɗe sula aka suley taka ɓa sa? Ya tay an dədawbəta səmbret tətaka məza Afukum dəsən ɓa ɓa. 30 Nokum na, muhur kiykum dayday pak məŋɗani. 31 Vi vaski kan na, kədawgeslne'eŋ ɓa, mənokum, də sləma daykiyit honzurɗe diyɗa. Ətaf Yesu Kristu awaniɓa əzel ( LUK 12:8-9 ) 32 Ɗəf awandi pak dərban abet ɗiy na nawi yi, naw pak wanərban aba Afu na disiŋ na nan nani. 33 Ya an məs dənah abet ɗiy na dəsənu ɓa, naw pak wanənah aba Afu na disiŋ na nəsən ɓa. Zazay ɓa əlpay ( LUK 12:51-53 ; 14:26-27 ) 34 Kədaɗɗumoŋ na zazay nəki aka dəlva ɓa. Nəde vi kawki zazay ɓa, masalami. 35 Gesiŋ nəde na, vi kawɗakan ɗəf də afəni, waŋ dət mata, ɗak dət ma zəlta. 36 Məzuzelɗe na ɗəf na, ɗiy neŋgil anandaŋgə. 37 Ɗəf an dəŋglu afəni awaniɓa man day kiwa, dədah azaw ɓa. Ɗəf an dəŋglu wətən mizilin awaniɓa məguluŋgut day kiwa, dədah azaw ɓa. 38 Ɗəf an dəslan məzliwrihe nan dəzbawgən ɓa, dədah azaw ɓa. 39 Ɗəf an dəŋgəl əkõhogən zeŋgileni, wazani. Ya məs dəzan zeŋgilen aka wən nawa nan warəha. Ərəh na va ɗəfa ( MAR 9:41 ; LUK 10:16 ) 40 Ɗəf an dətafkum atafwəka, məs dətafwa, atafək ɗəf an dəslənwa. 41 Ɗəf an dətaf məskəleŋ vi asan məskəleŋ warah zəga na van na məskəleŋ. Ɗəf an dətaf ɗəf təstəs vi asan təstəsə, warah zəga na van na ɗəf təstəsə. 42 Ɗəf an dəpsən iŋkile zazay dayday addəv huloŋguk sən taka səmmbet muzliyeɗ nawiŋki, vi asan gawla nawa, gesiŋ nədawnah sukum: Sessel azəna dawrəh zəga na van ɓa. |
All right reserved
Bible Society of Cameroon