Mətawaŋwəna 6 - Bible en Guidar

Mə Madiyanɗe azəmgənənək sahã sən Israyel

¹ Mə Israyelɗe aɗɗaŋgək zəga məs tay lew ara Yawe ɓa; yaŋ Yawe appet wəzva buhul ammba vet mə Madiyanɗe.

² Mə Madiyanɗe adanənək met mə Israyelɗe sawɓa. Aka wən net mə Madiyanɗe yi mə Israyelɗe akayaŋ walaŋ gərma, popor gərma may təki məs sərohho nawɗam neti.

³ An mə Israyelɗe aslgaŋka, asna mə Madiyanɗe dit mə Amalekɗe gəm ɗiy nammba pay nampum əzzoŋ əwak siti.

⁴ Ndəɗaŋ əssoŋ də gəla a maŋgaveti, əraygənən zəga na mabardaw net hã gap a Gaza, zəga nawzəm tay adambraŋ sitin mə Israyelɗe ɓa, gilew may timeŋgiɗ ɓa, wasliɗe ɓa, korɗe ɓa.

⁵ Vi net dit gazlaŋɗe net adawpeŋgeŋ əddoŋ dit gizlirkeɗe neti. Əzzoŋ na zletete va sesɓekeɗi, ndəɗaŋ dit zlogomeɗ net pak aŋɗaŋ ɓa, əzzoŋ kan aka dələv vi kammusən.

⁶ Mə Israyelɗe addakaŋgək sən wən net mə Madiyanɗe sawɓa, yaŋ ahəmaŋ sən Yawe.

⁷ Adan mə Israyelɗe ahəmaŋ sən Yawe sən wən net mə Madiyanɗe,

⁸ Yawe slən sit məskəleŋ məs dənah sit na: Məs Yawe, Maŋgəlva net mə Israyelɗe anah yaŋka: «Intə nəgilgukum sə Eziptə, səddəv gəla net belemɗe.

⁹ Nəkõhgukumək səvet ɗiy na Eziptə gəm səvet ɗiy məzəmgukumən sahã pakə, nərɓehetik səbokum, nəpsukumək dələv neti.

¹⁰ Nənah sukumək na: intə Yawe, Maŋgəlva nokum, kədaw geslne'eŋ sit meŋgilveɗ net mə Amorɗe məs kəssoŋ aka dələv netiŋ ɓa! Ya kəprəmən maw ɓa.»

Maŋgəlva ayak Gedeyon dəkõhgəngən Israyel

¹¹ Maslay na Yawe ade asan ammba wəlaŋga adawyaŋ na Ela a Ofra, aka təki na Yo'as, ɗəf na mahəlfa na Abiyezer. Gedeyon wətən tay ərga haykəmari məɗama viyit mə Madiyanɗe addəv mozgoy nawɗot uwa net wəleŋɗe.

¹² Yaŋ maslay na Yawe arban zən azani, aɓsən na: «Yawe tay də isi gambara nawgaya!»

¹³ Gedeyon aɓsən na: «Kamə daya nawa, yas Yawe tay də mənam na, mbar wən arəhəm gbaŋ di? Ngahəŋ sekeneɗ məs efiŋgiɗəm aŋɗaŋ səmən gbaŋ də ənəh na: Namna Yawe agilgəmək sə Eziptə ɓa sa? Ya gəgaŋ na Yawe andolməka, appamək ammba vet mə Madiyanɗe.»

¹⁴ Yawe kpaŋgən haran akani, amna: «Dok də gbogboŋ nokuŋka, akõhgən Israyel səvet mə Madiyanɗe, in nədawslənuk ɓa sa?»

¹⁵ Yaŋ Gedeyon aɓsən na: «Kamə Yawe nawa, mbarmbar nədawkõhgit mə Israyelɗe di? Mahəlfa naw yaŋ məddakən səddəv gabba Manase pakə, intə muzliya neret kirtin əbba.»

¹⁶ Yawe aɓsən na: «Wanəsaw də isi, vasna, wakəska wəlet mə Madiyanɗe va wəla ɗəf taka.»

¹⁷ Gedeyon aɓsən na: «Ya an nərahək mbəlembəle a mahorok na, asna arban su də zəga narba azan na, istə məzəpel suwa.

¹⁸ Kamə kəmbat səŋ faraɗa ɓa hã in mil ərəhuko, nəgəmgən əvəl naw kawkiyən aboko.» Azlanək na: «Wanəsaw aŋ hã is payə.»

¹⁹ Gedeyon mbatə, ataw wəla porsoku, andə gəpa kilo kaklaw hoku adə peŋɗe məza wuɗo ɓa dəndəni. Ndən sləw addəv kəkgəl gbar-gbarə memen tam addəvət mastaɓakə. Yaŋ akisən ammba Ela nak aban ta'ə.

²⁰ Maslay na Maŋgəlva nak aɓsən na: «Agəm slu dit peŋɗe məza wuɗo ɓa, aɗi aka milɓeska, alot meme akani.» Gedeyon aɗɗak vaska.

²¹ Yaŋ maslay na Yawe nak atəl zleŋge nammba vani, arəŋgən slu dit peŋɗe məza wuɗo ɓa nek də gabbani. Yaŋ offo asəɗ səddəv milɓe, azla slu dit peŋɗe məza wuɗo ɓa neki. Siske na, maslay na Yawe nak sə maharan həhiyə.

²² Gedeyon awlak na maslay na Yawe yi, yaŋ amna: «Aw Yawe Maŋgəlva, yaŋ kan na nulak maslay na Yawe haran də harawa!»

²³ Yawe aɓsən na: «Zəzay tay də isi, kəgeslne' ɓa; wakəmtə ɓa.»

²⁴ Gedeyon arkə gəlamatuya adak sən Yawe, alvan na: «Yawe yi məki zazaya.» Hã pay dəpaŋka'a, Gəla vanəs tay a Ofra na Abiyezer.

Gedeyon aɓzləwək gəlamatuya na maŋgəlva Ba'al

²⁵ Də dəfɗəska, Yawe aɓsən Gedeyon na: «Agəm medgeɗge na afuko, an na uwa masula'ən məs dəgəɗ wəzva buhul. Kəɓzləwgən gəlamatuya na Ba'al na afukuŋka, kərslagən dədəka na Astera məs dəsan a maŋgavani.

²⁶ Asna, kərkəgən gəlamatuya va ndən sən Yawe Maŋgəlva nok a dadwar ki mossorgoska. Asna Kəgəmgən medgeɗge na uwa masula'ən naka, kəzlagən kurmbuɗuk aket motoffoɗe na dədəka na Astera məs kərslə naka.»

²⁷ Gedeyon andək ɗiy kəlaw səret məɗɗaŋ wəza nani, aɗɗak va Yawe anah səni, ya vi geslne sən gəla na afəni gəm ɗiy na walaŋgəla na, dəɗɗa kapay ɓa, aɗɗa dəfɗa.

²⁸ Ɗiy na walaŋgəla dəgulyoŋ də pummo pum na, gəlamatuya na Ba'al yaŋ məbzluwən, dədəka na Astera na maŋgavan nak mərslani; may məday əvəl nawzla kurmbuɗuk də medgeɗge na uwa masula'ən aka gəlamatuya mərkan meleketeni.

²⁹ Anahaŋ dassohõnən ma zit na: «Nawã dəɗɗa watala aŋ kana?» Akayanənək gabbani aɓɗaŋ na, Gedeyon wətən Yo'as dəɗɗa zəgaŋka!

³⁰ Ɗiy na walaŋgəla aɓsənən Yo'as na: «Agilgin wətuko kawbayən, vi aɓzləwək gəlamatuya na Ba'al, may arslak dədəka na Astera məs dəsan a maŋgava.»

³¹ Yo'as aɓsit ɗiy en dəziweŋ a maŋgavan pak na: «Mənokumtə nawka wən ammba Ba'al sa? Mənokumtə nabbah sən sa? Ɗəf məs dəkə wən ammban pak kawbayni tak təki adaddaŋga. An ndən van Maŋgəlvay na, dəhãy ammba zən dəvani, adan gəlamatuya nan Gedeyon aɓəslə.»

³² Pay dəpas məlvan Gedeyon na: «Yerub-Ba'al», va ənəh na, Ba'al dəhãy ammba zəni, adan gəlamatuya nan aɓəslə!

Gedeyon assohõnək Maŋgəlva dərbangən wən nani

³³ Mə Madiyanɗe beymet dit mə Amalekɗe gəm ɗiy na muyã nammba pay nampum akkalanənək ziti; aggaraŋ ampanən dibirgidik net a walaŋ a Yizrel.

³⁴ Əmpəs na Yawe adek aka Gedeyon, affonək gozloro iya zev Abiyezer dəzbanəngəni.

³⁵ Aslənək maslənɗe aza zev Manase bayman dəzbanəngəni, aslənək maslənɗe aza zev Aser, zev Zabulon gəm zev Neftali məs dəpeŋgeŋ ələmsiti.

³⁶ Gedeyon aɓsən Maŋgəlva na: «An gesiŋ mok aka əkõhgən Israyel də vaw va kənah na,

³⁷ wanəpak gəba na time a təki narga haya. An minɗe aziyaŋgək akan kaka' dəlvafuŋ pak asanək məklakani, asna wanəsən na, də vaw kədawkõhgən Israyel va kənahə.»

³⁸ Vas van agəɗə. Vit pummo nan asilik pum, aɗotək gəba na time naka, atafək minɗe gala naknəh həloŋguk net iŋkile.

³⁹ Gedeyon aɓsən Maŋgəlva na: «Gədəvuk adawda akaw ɓa, nəpel takaŋ kaka'ə: kamə, nəsla masulan də gəba na time əmpa. Gəba kaka' dəsan məklakani, minɗe dəziyaŋ aka təki afuŋ nan pakə!»

⁴⁰ Vas Maŋgəlva aɗɗa addəv dəfəɗ nani, gəba kaka' dəsan məklakani, təki afuŋ nan pak minɗe.