Mətawaŋwəna 3 - Bible en Guidar

¹ Mahəlfaɗe mes Yawe ambər nawla nezet mə Israyelɗe dənɗaŋ vet yeŋki, en dəsənnən wəlpa dəgəɗ temtem a Kana'an ɓa;

² vi kawkol maɗɗula sayit mə Israyelɗe en dəsənən wəgay lahəŋ ɓa yi kaka'ə, kawyagan sit dəsənəngəni:

³ milyeŋge net mə Filistiɗe məsdarawɗe sle', mə kana'anɗe beymeti, mə Sidonɗe gəm mə Hittiɗe məs dəssoŋ aka gərəm na Liban, təŋ səza gərəm na Ba'al-Hermon hã gap aza Lebo-Hamat.

⁴ Mahəlfaɗes nawla nezet mə Israyelɗe dənɗaŋ əŋgə, kawsənən na, wapriminin əsəɓɗe məs Yawe aɗi wən net sit efiŋgiɗit də ma Moyis əŋ sa.

⁵ Vaski kan mə Israyelɗe assoŋ a weleŋgit mə Kana'anɗe, mə Hittiɗe, mə Amorɗe, mə Perziɗe, mə Hivviɗe gəm mə Yebusɗe;

⁶ Akayaŋgək kirtit ka gili, apsitin kirtit muguluŋgit tam sit kirtit mezeŋgleketi; azbetinik meŋgilveɗ neti.

Otniyel

⁷ Mə Israyelɗe aɗɗaŋgək zəga mbərayən a mahara Yawe: azgətaŋgək ki Yawe Maŋgəlva neti, azbetinik Ba'alɗe dit Astereɗi.

⁸ Gədəv Yawe adək aket mə Israyelɗe, avilik sən Kusan-Risatayim, məlĩ na Weleŋgit-Məlpeŋge; mə Israyelɗe aɗɗaŋgək wəza sən Kusan-Risatayim wəzva dədopoɗo.

⁹ Yaŋ mə Israyelɗe ahəmaŋ sən Yawe, Yawe awel Otniyel wətən Kenaz sawa na Kaleb sit mə Israyelɗe ka ɗəf nawkõhgiti yas akõhgiti.

¹⁰ Əmpəs na Yawe asanək dəndəni, atawək wən na Israyel. Otniyel mbat ama əgaya, yaŋ Yawe apsən Kusan-Risatayim məlĩ na Weleŋgit-Məlpeŋge ammba vani, aska wəlani.

¹¹ Dələv asanək addəv əffet wəzva kaklaw poɗo. Səɓɓan na Otniyel wət Kenaz nak zamə.

Ehud

¹² Mə Israyelɗe azbanənək əɗɗa zəga mbərayən a mahara Yawe, yaŋ Yawe asilgin makra Eglon, məlĩ na Mo'ab aketi adan adaɗɗaŋ zəga mbərayən a mahara Yawe.

¹³ Eglon sap əsepet mə Ammonɗe dit mə Amalekɗe azani, ambatə, adəmsit mə Israyelɗe, amõh walaŋgəla net gogozleɗi (Yeriko).

¹⁴ Mə Israyelɗe aɗɗaŋgək wəza sən Eglon məlĩ na Mo'ab wəzva kəlaw kiyən dədopoɗo.

¹⁵ Yaŋ mə Israyelɗe ahəmaŋ sənən Yawe, Yawe awel Ehud wətən Gera mə Benyamin sit ka nawkõhgiti, nan van zlaɓayi. Anan mə Israyelɗe aslənaŋ əka nzalaka sən Eglon məlĩ na Mo'ab.

¹⁶ Ehud abayək masalam man sula, zezek nan ərga va ɗəf taka, aynan dəddəv lukut nazan aka mettilen dəzəŋ.

¹⁷ Ndən mãh əkasən nzalaka sən Eglon məlĩ na Mo'ab naka; məlĩ na Mo'ab van ɗəf məkərni sawɓa.

¹⁸ Səza Ehud abay ma əfaɗ nzalaka na, yaŋ alhẽt ɗiy en dəslanən nzalaka vani,

¹⁹ Yaŋ nan amil sə meŋgevet zəgeɗkamaŋgəlva məs dəssoŋ go'o aza Gilgal, amna: «Aw məlyã, in tat də wən məɗama amaw nawpel suko!» Məlĩ nak amna: «Məɓətə!» Ɗiy məs dəziweŋ a maŋgavan nek agulyoŋ beymeti.

²⁰ Ehud mbat azani, ya nan tay kan ɗewwe a giziŋ addəv gəla məzarŋgasla, məzaɓsən anan takərgən məlhəɗən zayə. Yas Ehud amna: «Əpel na Maŋgəlva tay amaw nawpel suko.» Ndən le' əsilyen səka mazaŋga nani.

²¹ Ehud ləŋ van zlaɓay mah əkan, ana masalam pat əptuwən səka mettilen dəzəŋ, vif əgulsən aza gədəvən.

²² Ki Masalam puɗum ətəpani, səlhã akan sərətə, pəlu viɗiɗ, vi Ehud dəptu masalam van səddəv məlĩ ɓa; ndən vit medder.

²³ Ehud agil medder, ndən maddamba na gəla məzarŋgasla nak kpuɓ əmsan dərɓagan kəɗəslə.

²⁴ Nan egilke, gewleɗ na məlĩ payaŋ awlanən na, maddambeɗe na gəla məzarŋgasla nek yeŋ məkəɗəslti, yaŋ aɓɗaŋ na. Wasan tay a kine a manzləra.

²⁵ Aganənək hã ndəɗaŋ samə, ya tay əkol maddambeɗe na gəla məzarŋgasla ɓa'a. Ndəni kan agəmnən zəga nawkol maddamba, akolnəni, daya net yaŋ ɓəlohho afuŋ məmtəni.

²⁶ Ehud ɓak zəga nan gala assoŋ zəgətə; atoŋguk kiyit zəgeɗkamaŋgəlva neki, akõh a Seyra.

²⁷ Əgap nan ləŋ na, ndən tuf əffon gozloro aka gərəm na Efrayim; mə Israyelɗe apirkeŋ dəndən səka gərma, ndən ebeti.

²⁸ Aɓsit na: «Məzbawa, vi Yawe apsukumik meseŋgiɗkum mə Mo'abɗe ammba vokum.» Apirkeŋ ammbani, ataknən təki naggar ki məlpa na Yurden əmbat aka dələv net mə Mo'aɓɗe, ɗəf tay taka appaŋ sənən tive əggar ɓa.

²⁹ Pay dəpas na, abayaŋgək zel mə Mo'abɗe ammba gabal kəlaw, dogomɗe beymeti, bigewleɗ nalpa, tay dəkõh təttaka ɓa.

³⁰ Pay dəpas na, Mo'ab aɓe'gənək kiyən abet mə Israyelɗe. Dələv asanək əffet wəzva kaklaw dədopoɗo.

Samgar

³¹ Dərɓaga Ehud na, Samgar wətən Anat dəsani. Abayək mə Filistiɗe səkat sləre də zleŋge mes təbəz popyon aman nadawgit wasliɗe. Nan pak akõhgənək Israyel.