Mətawaŋwəna 2 - Bible en Guidar

Əzga' na Yawe sit ɗiy nani

¹ Maslay na Yawe adek sə Gilgal a Bokim, yaŋ amna: «Nəgilgukumək sə Eziptə, nətoŋgukum aka dələv məs ninan də əsway ammban napsit efiŋgiɗkum. Nəŋzlu na wənmiyna na walaŋgu də mənokum ɓa hã faɗə,

² nokum tam kədaynaŋ wən a walaŋkum dit ɗiy naka dəlvəŋ ɓa; kəbzliwingin gəleɗe na matuya neti. Ya kəprəmən maw ɓa. Mi kəɗɗaŋgəs di?

³ Yas nənah kan na: Nərɓehet na sə bokum ɓa; dəssoŋgən ka bizwil narmukum, meŋgilveɗ net tam ka pew̃eŋ nawkapkum.»

⁴ Səza maslay na Yawe apel wənəs sit mə Israyelɗe beymet na, aŋzlaŋgək vaŋvəl ahəmaŋgə.

⁵ Alvanən təki vanəs na Bokim (Məzuhəmaŋgə), yaŋ azaɓaŋ-Maŋgəlva sən Yawe adaka.

Əmta na Yosuwa

⁶ Yaŋ Yosuwa appet ɗiy əddoŋgu, mə Israyelɗe addoŋ naway pak aka hara təki nani, kawmõh dələv vani.

⁷ Ɗiy aɗɗaŋgək wəza sən Yawe hã əzva na ma way na Yosuwa gərak gəm an net ɗiy məsɓet məs ənziya egge net ezzek dərɓaga Yosuwa məs dulanən wəza metiŋgin na Yawe məs agəɗ ammba Israyeləŋka.

⁸ Yosuwa wətən Nun, gawla na Yawe amtək də əzva nan səkat də kəlaw (110).

⁹ Məndəkni a Timnat-Heres, aka hara dələv nan aka gərəm na Efrayim, də disiŋ na gərəm na Ga'as.

¹⁰ Səɓɓan na, sayit ɗiyis pak amtaŋka; sə dərɓeget na, sayit ɗiy mbərən dəsili, məs dəsənnən Yawe ɓa, may wəza an agəɗ ammba Israyel ɓa.

Mətawaŋwən na Israyel ( 2:11—16:31 ) Mə Israyelɗe appanənək Yawe

¹¹ Yaŋ mə Israyelɗe aɗɗaŋ mbərayən a mahara Yawe, agekdeketin Ba'alɗe.

¹² Appanənək Yawe, Maŋgəlva net efiŋgiɗit friki, məs dəgilgit səka dələv na Eziptə. Yaŋ azbetin meŋgilveɗ meɓɓet səret meŋgilveɗ net ɗiy en dəssoŋ kiyit tərwəslə; appu'oŋ abeti, adan sənən gədəv Yawe.

¹³ Ndəɗaŋ mbagən Yawe friki, ɓa' əɓe' sən Ba'al dit tuyeŋge Astereɗi.

¹⁴ Gədəv Yawe adək aket mə Israyelɗe sawɓa, yaŋ appet ammba vet məsukoŋ met ɗiyi, amohẽtini, apsit avet meseŋgiɗit en kiyit tərwəslə. Awɓapən əziw abet meseŋgiɗit ta' tələn ɓa.

¹⁵ Va agulyoŋ ama wəlpa pak, Yawe tay ammbet ɓa' əki sit tatwahã, va Yawe van anah siti gəm va Yawe van asway siti; atoŋgoŋguk addəv wəzəmsahã dərwadərwa.

¹⁶ Yaŋ kan Yawe awel mətawaŋwəna, akõhgitin səvet məsukoŋ met neki.

¹⁷ Ya dəprəmən met mətawaŋwən net nak dayday ɓa. Ndəɗaŋ əɓe'eŋ sit meŋgilveɗ meɓɓeti, əppu'oŋ abeti; amzləhaŋgək go' ləŋ səka tive məs efiŋgiɗit adawaŋ dəkan də əprim wəsəɓɗe na Yawe naka; net dədawaŋ vas ɓa.

¹⁸ An Yawe aslən sitik mətawwən pak, Yawe tay əsan də mətawwən vani. Ndən əkõhgit səvet meseŋgiɗit pay nanziya egge na mətawwən van gərakə, vi Yawe amsak əddəɗan man aka wən na vaŋvəl net sit ɗiy dədawsuknən meti, may dədawzimgitin sahã.

¹⁹ Ya an mətaw wən amtəka, ndəɗaŋ əmsak əɗɗaŋ mambray daykiyit efiŋgiɗti, əzbetin meŋgilveɗ meɓɓeti, əɗɗaŋ sitin wəza may əppu'oŋ abeti; tay adappaŋ səza zəga naɗɗa neti may səza ədaw na kiɓəɓəl net ɓa.

Daya tay əsla Israyel də ula nazani

²⁰ Gədəv Yawe adək aket mə Israyelɗe sawɓa, yaŋ amna: «Adan ɗiyiŋ amzləhaŋgək səka wənmiyna naw məs nəɗi sit efiŋgiɗti, dəprəmən maw ɓa na,

²¹ asna, naw zlaŋ, ɗəf təttaka səret ɗiy məs meseŋgiɗit məs Yosuwa amtə mbagitiŋ na, tay nədarɓəh təttaka səbet əmpa ɓa.

²² Mahəlfaɗe vetis na, zəga nawla nezet mə Israyelɗe dənɗaŋgə, kawsənən na, wassoŋ aka tive na Yawe sa assoŋ na ɓa sa, wadawaŋ akan va net efiŋgiɗit sa.»

²³ Ndəni Yawe appet mahəlfaɗe vetis məza ərɓehet də kakara ɓa, məza ndən əppet ammba va Yosuwa ɓaŋka.