Məsmaɗula 9 - Bible en Guidar

¹ Ha'aw, nəɗiyək an nəwəl pak azaw ka wən təstəsə, nərahək na ɗiy en təstəsə, məsmaɗɗula gəm wəza net pak na ava Maŋgəlva yi. Əŋgla awaniɓa əzele, ɗəf dəsən ɓa, pak abanəŋgə.

² An dədawtoŋ aket ɗiy na zəga takay pakə, an dədawrah ɗəf təstəsə tawrah məsdaraw, tay əɗar aka ɗəf moggoni gəm ɗəf məza heslepe ɓa va aka məs mambraya, aka məzaɓ-Maŋgəlva va aka ɗəf məs awzaɓ-Maŋgəlva ɓa. Aka ɗəf mədaw təstəs va aka məs mambraya, aka ɗəf məswayə va aka ɗəf məgeslne sən əswaya.

³ An dəray səddəv an dədaɗɗa ammba pay pak yaŋka: Zəga taka dədawrah ɗiy pakə. Mekret kirtin Adam aknahək də mambraya, pay assoŋ medereti wətem aknahək a mekreti, səɓɓan na ndəɗaŋ kamta.

⁴ Awani nawgəm di? Əɗɗum nawrəh zəga tay azet ɗiy mederet pakə. Vi kəra madaran adayək ki ɓoolu məmtəni.

⁵ Ɗiy mederet asənnənək na wamtaŋgə ya ɗiy mimtit gabba zəga tay asənaŋ ɓa; əfaɗ sit tay ɓa, məzgəti kiyti.

⁶ Əŋgla neti, əzel neti gəm kotorok neti pak amtəka. Tay an adawrahaŋ səddəv an dədaɗɗa ammba pay ɓa hã faɗə.

⁷ Doko, azəm way nok də ənneken zuko, asa mbazla nok də mokrok taka, vi Maŋgəlva atafək wəza nok səkay.

⁸ Lukutɗe nok dəssoŋ pay pak bartata. Appay mẽl sən horoko.

⁹ Annek dət guluk akən kəŋgəl addəv pay nok ɗarəŋ pakə, an məs apsuk ammba pay addəv ənziya nok ɗarəŋka. Vi aski haran nok səddəv ənziya noko gəm səddəv wəza an kədaɗɗa ammba paya.

¹⁰ An vok arah naɗɗa pakə, aɗɗa də gbogboŋ noko; vi a təki net ɗiy mimtit məs kədaddok adakəŋka, wəza tay ɓa, əɗɗum tay ɓa, əsən tay ɓa, maɗɗula tay ɓa.

Maɗɗula atər wəray pay pak ɓa

¹¹ Nulak ammba pay na, məs kakara azet dedawgapaŋ daabəŋ addəv ənza kaka ɓa, məs mekret dədaskaŋ wəla kaka addəv wəgay ɓa, məsmaɗɗulet dədawrahaŋ way kaka ɓa, məs əsən aket dədawrahaŋ arya kaka ɓa, məs kokonet dədawrahaŋ mbəlembəle kaka ɓa, vi pay moggoni də an mbərayən azzan sit pakə.

¹² Vi ɗəf dəsən pay nan ɓa va asan mbərayən sit kilif mərmet addəv zəva gəm va biŋgeɗ mərmet də mazzaɗə, vaskəŋ kirtin Adam an pay tatwãh adek aket midigurzike.

¹³ An nəwəl yaŋ əmpa, maɗɗula ammba paya zəga metiŋgini azawa.

¹⁴ Walaŋgələk tat muzliyəkə, ɗiy tahəŋ addəvət dədaya ɓa, yaŋ məlĩ metiŋgin ade əgay dəndəta, asərŋgəslta gəm enslin zəgeɗ nawgay kiyət tərwəslə.

¹⁵ Məssahã məsmaɗɗula tay addəvta; akõhgətək walaŋgələk vat də maɗɗula nani, ya ɗəf tay dəɗɗum aka məssahã van ɓa.

¹⁶ Ndəni nənah na, maɗɗula adayək ki makra, ya maɗɗula na məssahã məzeleni, ɗiy aprəmən əpel nan ɓa.

¹⁷ Əpel net məsmaɗɗuleti, an məziyi zə ɗəf əpremni, adayək ki vaŋvəl na məlĩ dəsan aket dərweŋge.

¹⁸ Maɗɗula moggoni daykiyit gulomɗe nawgaya, ya məs mambray taka waraygən nenek diyɗa.