Məsmaɗula 8 - Bible en Guidar

¹ Naway va məs maɗɗula məs dəsən əboton əpeliŋ di? Maɗɗula na ɗəf awkasak məɗa harani, toktok na ki haran paparə.

Əɓe' sən məlyã maɗɗulay

² Nəɓ suk na, aɓe' sən ma məlyã aka wəpel nasway na Maŋgəlva.

³ Kədawgəm zuk əzar faraɗa səma haran ɓa, kədazban əɗɗa an mbərayən ɓa, vi an aŋgəl adaɗɗa.

⁴ Vi əpel na məlĩ tay də gbogboŋgo ya naway nawnah sən na: «mə kədaɗɗaŋ di di?»

⁵ Ɗəf məzuɓe' sən mahenziŋ, atoŋ na addəv tatwãh ɓa. Makra məsmaɗɗula wasən paya gəm ətawwəna.

⁶ Vi paya gəm ətawwən tay vi zəga pakə, vi ɗəf tay də tatwãh akan diyɗa.

⁷ Dəsən an dədazzan abe ɓa, naway nawnah sən va zəga van adawsan di?

⁸ Ɗəf tay də gagdak aka əmpəs ka kawziwgin ɓa; ɗəf tay də gagdak aka pay na əmta ɓa; ɗəf tay nawbew məza al na əlpa ɓa ɓa, daraw tamə akõhgən na ɗəf məzəɗɗan ɓa.

Əɗɗum aka wən na ɗəfa

⁹ As pakə, nula na də əkoson an ɗiy adaɗɗaŋ ammba pay paki yi. Pay tay ɗəf adawsan də gagdak aka ɗəfa vi kawgəɗ sən mbərayən.

¹⁰ Nəwələk məsdarawɗe məndikti; səza ɗiy atoŋgoŋ gəm agilyoŋ sə təki na matuya, azgətaŋgək ki an ɗiy vet aɗɗaŋ a walaŋgəla-metiŋ pakə. As van əmpa na zəga ɗari yi.

¹¹ Vi ətawwən tay gu' aka wəza mbərayən ɓa yi mekret kirtin Adam aknah də əɗɗa mambraya.

¹² Kəta məs mambray dəɗɗa daraw nan təl səkatə gəm dəzzeken pay nan aka dələv zlaŋgə, nəsənək na, nenek tay viyit ɗiy məgeslne'eŋ sən Maŋgəlva, vi tay əgeslne'eŋ sənəni,

¹³ ya məsdaraw arah na nenek ɓa, pay nan watoŋ gu' va zeŋgile adawtoŋgo, vi awgeslne sən Maŋgəlva ɓa.

¹⁴ Zəga ɗar tay dədaɗɗa aka dəlvafuŋ: Ɗiy en təstəs mbirti an nawrih məsdarawɗe dədaɗɗa aketi, məsdarawɗe mbirti an nawrih ɗiy təstəs dədaɗɗa aketi. Nəmna as van zəga ɗari əmpa.

¹⁵ Naw wanəgagdakan ənneke; vi ərah na ɗəf ammba pay na ndəni: əzəma, əsa gəm neneke. Aski dədarman addəv wəza nan pay ənziya nan məs Maŋgəlva apsən ammba paya.

¹⁶ Adan nəziwgin a makraw kawsən maɗɗula gəm kaprəm gabba gəggrəŋ naka dəlvafuŋ, də ɗəf adawtak zən dawleŋ dəfəɗ də kapay pak zlaŋgə,

¹⁷ nulak an Maŋgəlva agəɗ pakə; an dədaɗɗa ammba paya, ɗəf aɓap na əprəm gabban ɓa. Va adawgay əkayan pakə, arah na əprəm gabban ɓa. Kəta məs maɗɗula akan dənah na asənka zlaŋgə, aɓap na əprəm gabban ɓa.