Məsmaɗula 7 - Bible en Guidar

¹ Sləma ɗəf ndundu moggon adayək ki mẽl na sləma, pay namta tamə day ki pay na uwa.

² Dəɗah əmbat a gəlabay ki əmbat əzləra adan əmta əkgrak net ɗiy pakiyə, ya adahək ɗiy mederet dəɗɗumonəŋgəni.

³ Dəɗah makra ɗəf əssan ki əmasa. Vi ki hara ɗəf asan toktok na, makran waɓap əsan neki.

⁴ A təki əmta asani mekret məsmaɗɗulet adaki; a təki ənnek asani, mekret dərweŋge adaki.

⁵ Dəɗah əprəm əzga na məsmaɗɗula ki ɗəf məprəm gəlya net dərweŋge.

⁶ Va ɓaɓəlma offo net degirgeɗ ambra mesteɓe, vaski əmas na dərwa asani. As van əmpa zəga ɗari yi.

⁷ Əzəmgən sãhã awtemgin ɗəf məsmaɗɗula, zəga na makaryam tamə awraygən makra ɗəfa.

⁸ Dəɗah əkgrak na zəga ki ətəŋ nani. Əɓəsa waday ki əɓaygən ki zə ɗəfa.

⁹ Kədawgəm zuk ədagədəv ɓa, vi ədagədəv a makra ɗəf dərwa adawsani.

¹⁰ Kədattok na: vimi pay an dətoŋ asan moggon day ki pay an kəkaŋ di ɓa, əttok vaska, na maɗɗula kəssoh akan ɓa.

¹¹ Maɗɗula moggoni va zəga na əzəm gəla, tay də ətərwəray azet ɗiy məzulanən paya.

¹² Vi əssa ara zeŋgile na maɗɗula tay va əssa ara zeŋgile na dala. Ərəh na əsəna ndəni maɗɗula məzərma ənziya egge na ɗəf məs dəndəni.

¹³ Awla wəza na Maŋgəlva. Naway nappiɗiw an adoɗ di?

¹⁴ Pay na ənneke, anneki. Ya pay na tatwãha, aɗɗumu. Maŋgəlva dəɗɗe məstaka vi ɗəf adawsən gabba zəga sə gəlan ɓa.

¹⁵ Zəga pak nulak addəv ənziya egge naw ɗarəŋka: Ɗəf təstəs tay əza addəv təstəs nani, məsdaraw tay əzzeken pay nan də wəza mambray nani.

¹⁶ Kədassok təstəs day ɓa, kədassok məs maɗɗula sawɓa ɓa'a: Vimi kəŋgəl kawzan kiyuk di?

¹⁷ Kədassok məsdaraw sawɓa ɓa, kədassok dərwa ɓa: Vimi kəŋgəl əmta məza aka pay nok ɓa di?

¹⁸ Lawi kərmagən əpeləska, ya kədappan əpel aŋ ɓa'a vi məzəgeslne sən Maŋgəlva warah gabban sulagən pakə.

¹⁹ Maɗɗula apsən gbogboŋ sən məsmaɗɗula daykiyit deyeɗe na kivadəlveŋge kəlaw naddəv walaŋgəla-metiŋ.

²⁰ Vi ɗəf tay təttaka təstəs aka dəlvafuŋ məzəɗɗa an moggon məs aɗɗa mambray ɓa ɓa.

²¹ Kədaslga sləma aka an ɗiy adawpeleŋ pak ɓa: Vi kədaprəm məgəɗ wəza nok ərok ɓa.

²² Vi nok van pak kərək ɗiy meɓɓet samə.

²³ As pak nəslak də maɗɗula. Yas nənah na: wanəsaw məsmaɗɗula, ya akgbakawka.

²⁴ An dəsan pak adayək ki əsən nawa, kpumiy sawɓa! Naway nawrəhən di?

²⁵ Nəppanək makrawa, vi nəsəngəni, nəkosongəni, nəkayangən maɗɗula gəm əsəna gəm kawsənən na daraw ətemi, dərwa ətemi.

²⁶ Nərahək an tatrãh day ki əmta: ɗak məs təsat va zəva, makrat na bizwil, vat tamə ngiyamɗe. Ɗəf an Maŋgəlva aŋgəl wakõh səvata ya məs mambraya nan wappan zən watərma.

²⁷ Aŋki an məsmaɗula arahə amna: Gala nəkoset takataka vi kawrah an gesiŋ.

²⁸ Nəzbanək əkosoni, ya nərah əprəmən ɓa. Nərahək ɗəf mizilin taka səret ɗiy gabal, ya guluk taka səret gil pak na, tat nərah ɓa.

²⁹ Aŋki nərah kaka'ə: Maŋgəlva aɗɗak ɗəf təstəsə, ya ɗiy dəkayaŋ tiveɗ məslokoreti.