Məsmaɗula 6 - Bible en Guidar

¹ Mbərayən tay nəwəl ammba paya, gədaki aka ɗəfa.

² Va ɗəf məs Maŋgəlva apsən arya, əraha gəm gagdaka, ɗəf məza zəga tay dəmbər sən səddəv an aŋgəl ɓa, yaŋ Maŋgəlva dəpsən maɗɗula ka kəzəmgən ɓa, vi ɗəf malaka dədawzəmən: as vani zəga ɗari tatwãh nawhəmgəni yi.

³ Va ɗəf dəwə səkatə, dəzəv diyɗa, ya də azəm hay diyɗa dayday zlaŋ dəbə də nenek ɓa, ya məndəkni ɓa, naw nəmnah daway məkiyən dəɗah kini.

⁴ Vi addəv mekeleŋ ɗari ade, arah guzli adaddani, iya nan waɗam arah guzliyo;

⁵ vi nan dula pay ɓa, tay əffet day ki ɗəf an naka.

⁶ Kəta ɗəf nan dəzəv gabal-gabal təl sula zlaŋgə ya dərah nek addəv əssa nan ɓa, pak ədda akki taka yi ɓa sa?

⁷ Əzəm sahã na ɗəf pak na vi əzəmi yi, ya dəbə ɗah ɓa.

⁸ Miy məs maɗɗula arah day ki dərwa di? Əter wəray miy məssahã dəsən əssan dit ɗiy adawrah di?

⁹ An hara ɗəf awələ adayək ki an makra ɗəf adawsime. As van pak zəga ɗari, əzban səmyãy.

Əpel na maɗɗula

¹⁰ An dəsan pak arahək iya nan far səkkay ya məsənniyə naway ɗəf di; atoŋ na aba ətawwən də məday kiyən ɓa.

¹¹ An əpel adayka, wawan wən ɗarə: ətərwəray miy sən ɗəf di?

¹² Naway dəsən an dədawtər wəray sən ɗəf addəv ənziya nan duɗukko adawtoŋ va zeŋgile ɗarəŋ di? Ya naway nawnah sən an dədaɗɗa ammba pay dərɓagan di?