Məsmaɗula 5 - Bible en Guidar

¹ Kədawgəm zuk əhã' mok əpel ɓa, mokrok adaɗɗa kakara əgilgin əpel aba Maŋgəlva ɓa. Vi Maŋgəlva nan tay a disiŋ ya noko is tat afuŋgu. Vasna əpel nok dəsan siɗikke!

² Vi addəv əgəggrəŋ diyɗay əssine adazzani, əpel na dərwa dəddəv əpel diyɗa yi adazzani.

³ An kinanək mok aba Maŋgəlva, kədalya daknahan ɓa, vi ənnek tay dit dərweŋge ɓa; an kinan mok aba Maŋgəlva vini aknahani.

⁴ Dəɗah an kinan mok ɓa ki iynan mok məza is əknahan ɓa.

⁵ Kədappan mok əreɗ zuk əɗɗa mambray ɓa, ya kədawnah aba maslən na Maŋgəlva na: «Əzlzlaɓi yi ɓa.» Kami Maŋgəlva adawda gədəv aka əpel nok kawraygən wəza na vok di?

⁶ An əssineɗ tahəŋ diyɗa, zəgeɗ ɗarəŋ gəm əpel diyɗa, nok ageslne sən Maŋgəlva.

Ərban gagdaka

⁷ An kulak tay əzəmgənən sãhã na məzuray aka dəlva, təstəs gəm ədaw təstəs tay ɓa, adawgəɗ suk gərəŋ ɓa; vi a disiŋ ki dəf daya məday kiyən nawgan tayi, a disiŋ kiyit tam əmpa na mədayaŋ kiyit tahəŋ.

⁸ Zəga nawrəh naka dələv na, net ɗiy paki yi, məlĩ dayday səza inse adawraha.

Arya tay də ətərwəray ɓa

⁹ Ɗəf məŋgəl deleɗi wabə dit deleɗ ɓa, məŋgəl arya tay an adawrəh ɓa. As van zlaŋ zəga ɗari yi.

¹⁰ An ərah awanək zəni məzəzəmnən wawaŋgə, ya mə ərah miy na afən an ulan də harani ɓa di?

¹¹ Sin na məgəɗ wəza nekəŋgə, də azəm siɗikke awaniɓa azəm diyɗa pakə; ya əba na məsarya appan əffet dəleŋgin ɓa.

¹² Mbərayən nawhəmgən tay nəwəl ammba paya: arya məs afən azaɓan nawki sən tatwãha.

¹³ Arya vanəs tay əza addəv əgəggrəŋ də wən ɗarə; ndən bok wəyən na, zəga tay a van ɓa.

¹⁴ Va agil səddəvət man zən mekeleŋ, wamndan va ade: zəga tay adawka avan səddəv ərah na wəza nan ɓa.

¹⁵ As vani, tatwãh nawhəmgəni əmpa, əmbat nan va ade: miy ərah nan na agəɗ wəza ka səmyã di?

¹⁶ An dəday əmpa na, tay ətoŋgən ənziya nan pak addəv guzliyo; tay əhəm sawɓa, zən appar ɓa, pay pak gədəvən mədani.

¹⁷ Aŋki moggon an nəwəl azawa, an dəslə na: wəzəma də əsa gəm ənan nek addəv wəza an ɗəf adaɗɗa ammba pay addəv əvoŋ an Maŋgəlva apsən pakə, vi aski haran nani.

¹⁸ Ɗəf an Maŋgəlva apsən arya də ərah negge, apsənək gagdak nawzəmni, dəgəmgən haran nani, dənnekgin də wəza nani, aski əvəl na Maŋgəlva.

¹⁹ Zevin azga sləma diyɗa aka əzva na ənziya egge nan ɓa, vi Maŋgəlva aknahək makran də ənneke.