Məsmaɗula 4 - Bible en Guidar

Dəɗah əmta ki əssa egge

¹ Nəkkpaŋgək nula əzəmsahã temtem məzəɗɗa əgge. Əhəm net ɗiy məzuzəmaŋ sahã, ɗəf tay nabbah sit ɓa; gbogboŋ avet ɗiy məzəmgitin sahãyi ɓa na, net ɗəf tay nabbah sit ɓa.

² Ya naw ɗəɗah su ɗiy en dəmtaŋgə, ki en mederet əmpa.

³ Səmmbet sules na, Dəɗah ɗəf an muwani tagay ɓa, vi nan dula wəza mbərayən məs məɗɗan ammba pay ɓa.

⁴ Naw nulak əzəmsahã na ɗəfa, ədaw na wəza moggon nan pak kotoroki a walaŋgən də meggeni. As pak zəga ɗari, əzban səmyãyi.

⁵ Dərwa, van slakatta adawsani, ndən əmpər slu zəni.

⁶ Dəɗah əffet vok zloŋ, kivok sula sula də wəza nawya nadda ammba səmyã ɗarə.

⁷ Yaŋ nəwəl zəga ɗar əmpa ammba paya.

⁸ Ɗəf yaŋ takərgəni, məza masulan ɓa, wətən ɓa, məlmən ɓa, ɗəf nan tay ɓa. Wəza nan man awsla ɓa, haran dayday awba də ula arya ɓa. Ya naw nədaɗɗa wəza əbay zu na sən nawã di? As pak ɗari, wəza mbərayni.

⁹ Ɗiy sula adayaŋgək ki ɗəf taka, vi əfaɗ tay moggon ammba wəza neti.

¹⁰ Vi an taka azbərək na, masulan wasilgini. Ya əray aza ɗəf an takərgəni! An askotko, masulan tay nawsilgin ɓa.

¹¹ «Əmpa na, an avoŋgoŋguk a təki taka, zit wasan kãhə; ya ɗəf an takərgən na, mbar zən adaɗɗa kãh di?

¹² Ya an ɗəf askak wəla ɗəf taka na, ɗiy sula waskanən wəlani; Helege məɗəmən haran hoku aɓoh na go' ɓa.»

¹³ Ɗəɗah muzliya məssãhã də maɗɗulan ki məlĩ mazza ya dərwa, awsən əppan zən sən əsəɓ ɓa.

¹⁴ Kəta dəsan wiyən vanəs sə fərsəna agil kawzəm məlĩ dayday, awaniɓa məwan məssãhãyi addəv məlĩ nani.

¹⁵ Nulek ɗiy məzudawaŋ ammba pay pak əziweŋ aɓɓa wiyən an nawsan a gəla an maɓɓani.

¹⁶ Meŋge net ɗiy məs asan daya aket vetis tay ɓa. Də as pak sayit ɗiy en nazzoŋ abe annek na dəndən ɓa. As pak zəga ɗari, əkayan səmyãyi.

Kədawpel ɗiyɗa aba Maŋgəlva ɓa

¹⁷ Asla zuk aza ədaw nok an is tat əmbat addəv gəla na Maŋgəlva, azar go'o kəpakgən sləmoko ki əzaɓ-Maŋgəlva zevin net dərweŋge; Awsənnən na, mbərayən adaɗɗaŋgə ɓa.