Məsmaɗula 3 - Bible en Guidar

An məpelin aka zeŋgile ( 3:1—11:8 ) Zəga pak də pay nani

¹ Zəga pak pay nan tay, zəga pak na pay nan tay ammba disiŋ.

² Pay na uwa gəm pay namta, pay nampa zəga gəm pay naptu zəga məmpani,

³ pay nawbay ɗəf zamə gəm pay nawmbəlgəni, pay naɓzluni gəm pay narkani,

⁴ pay nawhəma gəm pay nawmasa, pay nanɗəsa gəm pay nawpepɗeke,

⁵ pay nazget gərmeŋge gəm pay nakkelet gərmeŋge, pay naklak va ɗəf awla ɗəfa gəm nappan əklak va ɗəf awla ɗəfa,

⁶ pay nawkaya gəm pay nawzani, pay nawzaɓani gəm pay nazgani,

⁷ pay na əŋgarani gəm pay na ərmahən, pay nassa ɓatɓatə gəm pay na əpele,

⁸ pay na əŋgla gəm pay na əzele, pay na əgaya gəm pay na zazaya.

⁹ Ərah miy məgəɗ wəza adawra səddəv an adaɗɗa di?

¹⁰ Nulak gəggrəŋ an Maŋgəlva apsit kirtin Adam vi dəssoŋgən nda'nda'ə.

¹¹ Maŋgəlva tay əɗɗa zəga pak lelewe aka pay nani; aɗiyək əsən ənziya faɗ a makra ɗəfa məza ɗəf əɓap əprəm gabba an Maŋgəlva adaɗɗa təŋ səza ətəŋ nan hã gap aza əkgrak nan ɓa.

¹² Nəsənka zəga tay moggon viyən məday ki ənneken zəni gəm əɗɗa zəga moggon addəv ənziya egge nan ɓa.

¹³ Ya, ɗəf məzuzəma, məzusa gəm mərah nenek addəv tatwãh na wəza nan pak na, əvəl na Maŋgəlva yi.

¹⁴ Nəsənka an Maŋgəlva adaɗɗa pak na, nan wasan faɗə; zəga tay nasləraɓ akan ɓa, zəga tay nagdah səzan ɓa, Maŋgəlva aɗɗak ka ɗiy dəgeslne'eŋ sənəngəni.

¹⁵ An dəsan kakaŋka asanək lahəŋka, ya an nawsani asanək lahəŋka, ya Maŋgəlva wakayan an dəɗamə.

Pak tay əggrak də əmta

¹⁶ Nulak egge əmpa na, a təki na ətawwəna adaki daraw asani, a gəla ədaw təstəsə daraw dəsani.

¹⁷ Nənahək də makraw na: Maŋgəlva watawwən aka ɗəf təstəs gəm məsdaraw, vi pay tay vi zəga pakə gəm wəza naɗɗa pakə.

¹⁸ Nənahək də makraw aka an dəwəl sit kirtin Adam na, Maŋgəlva dəsle ka dulanəngən sən kiyit na net van va zəgeɗ memeyẽɗiŋgə.

¹⁹ Vi an dədaɗɗa aket kirtin Adam gəm an dədaɗɗa aka zəga mamayã pakə zəga takay. Va ɗəf adamta, vas zəga mamayã adamta vi tahəŋ də əmpəs pakə. Əday na ɗəf ki zəga mamayã tay ɓa, pakgən zəga ɗari yi.

²⁰ Beymet akki taka adawmbataŋgə, səza burɗuk azzoŋ beymeti ya aza burɗuk adamndoŋ beymeti.

²¹ Naway dəsən na zeŋgilet kirtin Adam ndəni məsupeŋ a disiŋ, zeŋgilet zəgeɗ memeyẽɗi ndəni məzupirken kəlafuŋ di?

²² Nulak na moggon tay nawday ki an ɗəf dənnek addəv wəza nani ɓa ɓa, vi aski haran nani. Naway nawmilgin kawla an dədaɗɗa dərɓagan di?