Məsmaɗula 2 - Bible en Guidar

¹ Naw nəpelik a makraw na: «Asna a nula nazok də ənneke, attəman neneke!» As van pak na zəga ɗari.

² Nənahək na: «Wəmas na zəga na dərway yi!» Wənneke: «As van nan mi adawtər di?»

³ Ninanək a makraw nappan ki zu addəv mbazla, hara na, də ədaw addəv maɗɗula gəm nəppanək zu addəv zəga na dərwa, kawla an dəsan moggon vihit kirtin Adam addəv an adaɗɗaŋ ammba disiŋ pay nanziya egge neti.

⁴ Nəɓaygənək wəza nawa: nərkək gəleɗe, nəmpək megezlembirkeɗi;

⁵ nəgəɗə gulyeŋge net teɓi, nətawək muyã təki temtemi gəm nəmpək wəleŋɗe məzuwa zeŋvit temtem addivti;

⁶ nəso'uk bobokɗe vi kapsit iŋkile sit wəleŋɗe siddivti.

⁷ Nəlbahək belemɗe mezeŋgleket dit muguluŋgiti, in tat dit məɗɗaŋ wəza eŋgil anawda, wasliɗe gəm gilew tahəŋ zletete daykiyit ɗiy en dəssoŋ daabəŋ kiyu a Yerusalem.

⁸ Nəkkalək təbəz babara də meleŋge, arya net milyeŋge də an net dilveŋge ka nawa; in tat dit məyaŋgəlya mezeŋgleket dit muguluŋgiti, gəm an nanneken zit kirtin Adam diyɗa gəm gil diyɗa.

⁹ Nəsawək ɗəf na sləma. Nədayək kiyit milyeŋge en dəssoŋ daabəŋ kiyu a Yerusalem pakə. Də as pak na in tat də maɗɗula.

¹⁰ An haraw aŋgəl pak nətak ɓa; nətak makraw səddəv ənnek temtem ɓa, vi makraw annekik də wəza naw pakə: aski haran naw səddəv wəza naw pakə.

¹¹ Nəɗɗumuk aka wəza nəgəɗə, aka tatwãh nəzəm də wəɗɗani, aka wəza an nəzəm tatwãh dayə. As pak na! Zəga ɗari gəm əmbat ammba səmyãy, ərəh tay aka an nəgəɗ ammba dələv ɓa.

¹² Nəkkpaŋganək haraw kawla maɗɗula, wəteme gəm dərwa. Ɗəf an dədawsan məlĩ sədərɓagaw na mbar adawsan di? An aɗɗaŋ far adaɗɗa!

¹³ Aŋki an məs nəwələ: maɗɗula adayə ki zəga na dərwa, va ətərwəray na əkeɗeɗe aday ki guzliyo.

¹⁴ Məs maɗɗula tay də haran a təki an dədahə, ya məza əsən akan ɓa tay ədaw ara guzliyo. Sulegit pak wəgrak net wasan məstaka.

¹⁵ Nəpelik də makraw na: an dədawra ɗəf məza əsən akan ɓa warahu anawa'e, mi atərəw nəssaw də maɗɗula day kiyən di? Nənahək sən kizu na, as pak zəga ɗari.

¹⁶ Vi kazgəti ki məsmaɗɗula də ɗəf məza əsən akan ɓa faɗ addəv əvoŋ an dədazzani: məsmaɗɗula akan tay əmta va ɗəf məza əsən akan ɓa, vimi vas di?

¹⁷ Nəzelik ənziya egge, vi nərahək an dədaɗɗa ammba pay tay nek azaw ɓa. Pakgən zəga ɗari, əmbat ammba səmyãy.

¹⁸ Nəzelik əzəmsahã na wəza an nəgəɗ ammba paya, an nəgəɗ pak wanəppan sən ɗəf nazzan dərɓagawa.

¹⁹ Naway dəsən di? Wasan məsmaɗɗula sa awaniɓa məza maɗɗula akan ɓa, wasan məlĩ aka zəga an nəgəɗ pak məs nəzəmsãhã ndəndəni, an nəgəɗ də əɗɗa maɗɗula ammban: as vani zəga ɗari əmpa.

²⁰ Əɗɗum na makraw amtək səka əzəmsahã na wəza məs nəgəɗ ammba pay pakə.

²¹ Ta' nan na, ɗəf aɗɗak wəza nani də əɗɗa maɗɗula, də əsəna gəm ərah əmbat abe abe: ya sən ɗəf məs dəgəɗ wəza ɓa adappan haran nani. As vani, zəga ɗari, tatwãh metiŋgini.

²² Vasna, mə dəpəl sən ɗəf səddəv əzəmsahã na wəza nan gəm səddəv an makran adawkayan məs azəm sahã ammba pay di?

²³ Ənziya nan pak na, tatwãhi, gəggrəŋgi, əzəmsahãy yi, addəv dəfəɗ zlaŋgə makran awvoŋ ɓa: as van zlaŋ zəga ɗari.

²⁴ An moggon aza ɗəf na, əzəma gəm əsay ənan ərah na wəza nani, naw nulak na as van səva Maŋgəlva ade.

²⁵ «Ya naway də zəga nawzəm gəm nawrah ənnek an intə ɓa di?»

²⁶ Sən Ɗəf təstəsə, ndən əpsən maɗɗula, əsəna, gəm ənneke, ya sən ɗəf məgəɗ mbərayən, ndən əpsən gəggrəŋ nawsapani, nakkalani kapsən ɗəf an moggon aba Maŋgəlva. As van zəga ɗari, əmbat ammba səmyãy.