Məsmaɗula 12 - Bible en Guidar

¹ Aɗɗumon an dəzəməɗuk pay kədawman zuk na gawla, tak əzza na pay daryaw gəm əzva məs kədawnah na: Nattəman moggon nassa addəv ənziya egge ɓa.

² Tak pay də əkeɗeɗe nan adawtəpani, təla dit ŋgərzleɗ adawzimbi'eŋgi, slaybuwən dəmilgəni, sikke na buna.

³ Pay nani, məgaŋ gəla wakkereŋ sən geslne, ɗiy guromɗe waɓe'eŋgi, məzusəraŋ waziwginin əsəra, vi tahəŋ diyɗa ɓa, tak heret gil məzulaŋ dəki məppan foŋgo naza gəla adawsan girifgirifi.

⁴ Tak sləmok tay əprəm geŋgere naka tive, ɓaɓəlma əsər adawɓəta, əhəm na gəmnda adafɗahan ɗəfa, gəm əya gəlyeɗe pak adassoŋ ɓatə.

⁵ Əpeŋ ki mossorgo geslne tayi, əbbal aka tive geslne tayi, pay teŋɗeke adaffuyo Heyɗeŋ adassan gədakə, zəga nanneken waya, anneken ɓa; naway pak wambat eŋgil ananda faɗə. Məzuhəmaŋ tahəŋ əsuləkaŋ aka tive.

⁶ Helege na təbəz babar wapələ, mesteɓe na meleŋge wakkrapaŋgə, bəbər net iŋkile wawɗih ama vov net iŋkile, zəga nakdah helege dəkan sə vovu wabət addəv vov net iŋkile adaka.

⁷ Burɗuk wamndan aka dəlvafuŋ sə təki ade əmpəs məpsən ɗəfa wamndan aza Maŋgəlva.

⁸ Zəga ɗari yi, zəga ɗari yi məsmaɗula anahə, zəga pak zəga ɗari yi.

An məduduɗukoni ( 12:9-14 ) Əbaymani

⁹ An dəzleɓ aza maɗɗula na məsmaɗula na, arbanək an asən sit ɗiyi; aslaka, akosonuko, azaɓetik wənməkkpaŋgaɗe diyɗa.

¹⁰ Məsmaɗula addəv əpel nanneke, averik an dədaɗɗa gesiŋ, əpel an təstəsi.

¹¹ Əpel net məsmaɗɗulet tay va təbəz ma popyoŋ, ɗiyen dəvernin tahəŋ va təbəzɗe məkkpe'ti; as pak məzutaɗa taka dəɗɗa.

¹² Wətuwa, asla zuko vi wəver ɗerewelɗe diyɗa məza meŋge ɓa gəm wəyak diyɗa awyan ɗəfa.

¹³ Əggrak na əpele: pak aprəmka. Ageslne sən Maŋgəlva gəm aɓe' sən an apeli, vi aski wəza na ɗəf pakə.

¹⁴ Wəza pak Maŋgəlva watawwən akani, aka an dəsan məɗamən dəsan moggoni awaniɓa mbərayən pakə.