Məsmaɗula 11 - Bible en Guidar

Əsən ətaf an dədaɗɗa pakə

¹ Azgan way nok aket iŋkile, vi dəmmbat abe na wakərəha.

² Azaɓet deleɗ nok gap gəlet buhul də dədopoɗo, vi kəsən mə tatwãh miy dədazzan pumo aka dəlvafuŋ di ɓa.

³ An buwən ayəmka, aka dəlvafuŋ adawziya; an wəlaŋga aɓəslək də dohoŋ awaniɓa də kəla disiŋ pak na a gəlan adassani.

⁴ Məzlək sləma aka əɓla na səmyã azlgək na ɓa, məzi haran ammba buna akkalan na zəga na bardaw nan ɓa.

⁵ Va kəsən gabba əmpəs may slesleŋɗe adasɗaŋ addəvət guluk dədaway ɓa, vaski, kəsən gabba wəza na Maŋgəlva ɓa, ndən məzəɗɗa zəga pakə.

⁶ Də mompumo aslga zeŋve noko, moskoy tamə kədaffeten vok ɓa, kəsən wəza awani dədassan dəɗah di ɓa, kuzuŋ pakgit wassoŋ moggeti.

⁷ Təki ndarara lawi, moggoni aza hara ɗəf dula paya.

⁸ An ɗəf azəvək diyɗa, dənnek addivit əzvaɗe an məpsən pakə, ya dəɗɗumon na ənziya nan addəv magamas wadayə, an dədazzan pak na zəga ɗari yi.

Wəzga' an bayma faɗə ( 11:9—12:8 ) Mənnek səm tak pay nan dətoŋ ɓa

⁹ Gawla, annek aka pay na gawla noko, mokrok dənan nek pay kədawman zuko, adaw va mokrok aŋgələ va an kədawla. Ya asən na, aket zəgeɗis pak na Maŋgəlva wakuk aba wətawwəna.

¹⁰ Azargən zəga nawraygən mokrok səzoko, akso' mbərayən səzoko, vi gawla gəm wirwir na zə ɗəf zəgeɗ ɗarəŋ.