Məsmaɗula 10 - Bible en Guidar

¹ Zikɗeɗ mimtit awvavrahanən gəm awraygənən mẽl moggon na mədə tursan. Zəga na dərwa siɗikke waraygən maɗɗula gəm gagdaka.

² Makra məsmaɗɗula dəka dəzəŋ nani, ya makra dərwa na dəka zlaɓay nani.

³ An dərwa tay ədaw aka tive zlaŋgə, əɗɗum nan mbəksəni; ndən ərban sit ɗiy pak na dərway.

⁴ An daya nok adək gədəv akoko, kədappan wəza nok ɓa, an kəsokuk ɓatɓat na wavvuyon suk mbərayən nok metiŋgin an kəgəɗə.

⁵ Mbərayən tay nəwəl ammba paya, va əzlzlaɓ na məlyã.

⁶ Məɗiyi dərwa aka təki an gagdak diyɗa, məsaryeɗ dərəŋ afuŋgu;

⁷ Nulek belemɗe aket pilseŋge, ɗiy na sləma tamə ədaw də tilit va belemɗe.

⁸ Məso' vovu, wabət addəvən, məɓəsl gəla, dohõ wabəla

⁹ Məhõk gərmeŋge, gərəm wakap vani, məpɗak wəleŋɗe tamə warah tatwãhã.

¹⁰ An ma zlimbe adiŋgbliske ya mətakaɗani man ɓa na, asna ɗəf zən adawsoko; ətərwəray na maɗɗula na ərəh gabba zəga pakə.

¹¹ An dohõ abələk ɗəf məmbəɗan dohõ, ərəh na məmbəɗan dohõ tay ɓa.

Kədawpel diyɗa ɓa

¹² Əpel na məsmaɗɗula annek zə ɗəfa, ya əpel na dərwa wazani.

¹³ Ətəŋ gabba əpel nani zəga na dərway, əkgrak əpel nani ətem mbərayni.

¹⁴ Dərwa anzlərgən əpele; ɗəf dəsən an dədaɗɗa abe ɓa. Nawa dədawnasən an dədaɗɗa dərɓagan di?

¹⁵ Dərwa awbay zən ama wəza, dəsən tive naddo a walaŋgəla ɓa.

¹⁶ Əray akoko, is dələv məs məlĩ nok gawla gəm ɗiy gugriɗ na wəza naddəvuk dəŋglaŋ əzəm də pummo pumu.

¹⁷ Neneki azoko, is dələv məs məlĩ nok dəsan gebbet milyeŋge gəm ɗiy gugriɗ na wəza nok məzəmaŋ də pay nani vi kawrah gbogboŋgo məza vi sən kawsa ɓa!

¹⁸ Biyən məkyakən də tampəla wapələ, ɗəf məs azga sləma ɓa, biyən nan wayəmə.

¹⁹ Awdaŋ waya vi kasmaya, mbazla vi kanneken zə ɗəfa ya dala awzlan agəla as pakə.

²⁰ Addəv kpum na mokroko kədawran məlĩ ɓa, kədawran məsarya sə giziŋ anokda dayday ɓa, vi bəŋga na disiŋ waka ɓaɓəlmani, zəga məs persleken warban an məpelin.