Məsmaɗula 1 - Bible en Guidar

Zeŋgile tay də ətərwəray sa? ( 1:1—2:26 ) Pak tay əmbat va enene

¹ Əpel na Məsmaɗula, wətən Davit, məlĩ na Yerusalem.

² Ɗar net zəgeɗ ɗarə, Məsmaɗula anahə, ɗar net zəgeɗ ɗarə, pakgən zəga ɗari.

³ Wətərwəray mi ɗəf adawrah səddəv wəza adaɗɗa ara payəŋ di?

⁴ Sayit ɗiy toŋgu, Sayit ɗiy meɓɓet payə, dəlvafuŋ nan tay va lahəŋ a gəlani.

⁵ Pay tay əgilye, tay ətəpa, tay əkkpaŋ kəla gəlan də təki adawgilye.

⁶ Səmyã tay əddan də dohoŋ gəm əkkpaŋ kəla disiŋ, səmyã tay əɓla əɓla ndən kpaŋ mbatə, ndən kpaŋ a gəlani.

⁷ Məlpəŋɗe pak addəv pehe adawsapaŋgə, ya pehe van dəknah ɗah ɓa; də təki məlpeŋɗe adaddoŋgu, dədaki adaddoŋ laha əmpa.

⁸ Zəgeɗ pak məyanən ɗəfəŋ, tay va nawnahən ɓa, hara ɗəf awba də ula ɓa, sləma ɗəf aknah də əprəm ɓa.

⁹ An dəsan lahəŋka, ndən dədawsanə'e, an dəgəɗ lahəŋka ndən dədaɗɗa əmpa: zəga tay meleketen ammba pay ɓa!

¹⁰ Awnahaŋ na: «Mula, aŋ nan meleketeni!» Far ndak na zəga van asanək ɗah daabəŋ kimə.

¹¹ Əɗɗumon an dətoŋ lahəŋ tay ɓa an dədazzan apəl na an naɗɗumon ɓa, azet ɗiy en dədazzoŋ səɓɓan ɓa.

Əsən na məsmaɗɗula

¹² In Məsmaɗula, nəsawək məlĩ aka Israyel, a Yerusalem.

¹³ Ninanək a makraw kawkayani gəm kawkoson an dətoŋ ammba disiŋ pak də maɗɗula. Wəza tatwãh Maŋgəlva apsən ɗəf titire.

¹⁴ Nulak wəzeɗe en dədaɗɗa ammba pay pakə; nərahək na zəga ɗari, əmbat ammba səmyãy.

¹⁵ Zəga an doɗɗo, kawɓapi əpiɗiwin ɓa, kawɓapi ənɗan zəga an tay ɓa ɓa.

¹⁶ Nəpelik də makraw dawnəh na: «Ɗəf matəŋgu nan addəv maɗɗula, nədayək kiyit ɗiy en dəssoŋ daabəŋ kiyu aka Yerusalem.» Nərahək maɗɗula gəm wəsən diyɗa,

¹⁷ Nəziwginik a makraw kawsən maɗɗula gəm kawsən wəteme gəm zəga na dərwa; nəsənək as pak na, əmbat ammba səmyãy.

¹⁸ Vi maɗɗula diyɗa awki tatwãh diyɗa; məzəkay wəsən azani, wəzəmsahã adawkay azani.