Məsdəlveŋge 9 - Bible en Guidar

Wətəŋ wəza na Aron dit kirtini

¹ Addəv əvoŋ madodopoɗoni, Moyis ayak Aron dit kirtini, gəm ɗiy gugriɗ na Israyel.

² Anah sənək Aron na: Akay wət wasliya vi matuya na mambraya gəm ndargayã ka matuya nawzla kurmbuɗuku, sulegit pak məza heslepe azet ɓa, ya kəkigin aba Yawe.

³ As na kəpeligin wənəŋ sit mə Israyelɗe: Məgəm porsok vi matuya na mambraya, wət wasli tamə gəm wət time na wəzva taka, sulegit pak məza heslepe azet ɓa, vi matuya nawzla kurmbuɗuku,

⁴ medgeɗge gəm ndargayã vi nawzaɓ-Maŋgəlva nawsler kawvəl sən Yawe, gəm əvəl də gəpa məslahan də mẽlẽ; vi dəpaŋki Yawe adarban zən azokum.

⁵ Akiyənək ama gizlirke nalma də Maŋgəlva zəgeɗ an Moyis aɗi wən nan siti, ndəni ɗiy pak addereŋ aziwweŋ aba Yawe.

⁶ Moyis amna: «Aŋki an Yawe aɗi sukum wən nan naɗɗa, vi gagdak na Yawe dərbəgən azokum.»

⁷ Ndəni Moyis anah sən Aron na: Addər aza təki nawzaɓ Maŋgəlva, azaɓ-Maŋgəlva navvuyon mambray gəm əvəl nawzla kurmbuɗuk noko, vi kaɗɗa mahenziŋ navvuyon mambray noko gəm net ɗiyi, Asna kərbangən əvəl net ɗiy vi kaɗɗa mahenziŋ navvuyon mambray net va Yawe aɗi wən nani.

⁸ Aron alək a təki nawzaɓ Maŋgəlva, atawək wəla wət wasli kawzaɓ-Maŋgəlva navvuyon mambray nani;

⁹ kirtin Aron akisənək mbeli; ayopuk pərəm van areti yas aɗi aket mohonɗe na təki nawzaɓ Maŋgəlva; akgbo'ik mbeli aza gabba təki nawzaɓ Maŋgəlva;

¹⁰ azlak səlhã, kiritdəɓa gəm memɗeke mizilin na zəga mətaw wəlan aka təki nawzaɓ Maŋgəlva, va Yawe aɗi wən nan sən Moyis;

¹¹ azlak slu də gəba nani a mapoho na dibirgidiki.

¹² Atawək wəla zəga na əvəl nawzla kurmbuɗuku; kirtin Aron apsininik mbeli yas aksu' ki təki nawzaɓ Maŋgəlva tərwəslə;

¹³ Apsənənək slu na əvəl nawzla kurmbuɗuk va məpiweni, sap də kini, yas azla aka təki nawzaɓ Maŋgəlva;

¹⁴ askoɓik herɗe dit tetewirgeɗi yas azle aka təki nawzaɓ Maŋgəlva sap də əvəl nawzla kurmbuɗuku.

¹⁵ Akiyək əvəl net ɗiyi: Agəmək porsok nawzaɓ-Maŋgəlva navvuy mambray net ɗiyi, atawək wəlani, azaɓək-Maŋgəlva va azaɓ-Maŋgəlva na an maddaabəŋ.

¹⁶ Akiyək əvəl nawzla kurmbuɗuku, avəl sənək də əzban tive nani.

¹⁷ Akiyək əvəl na zəga na mabardaw: Andək van zloŋ taka yas azla aka təki nawzaɓ Maŋgəlva, mbəksa əvəl nawzla kurmbuɗuk də mompumo.

¹⁸ Atawək wəla medgeɗge də ndargayã məs əsap net akiyaŋ vi əzaɓ-Maŋgəlva nawrəh zazaya; kirtin Aron apsininik mbeli yas aksu' ki təki nawzaɓ Maŋgəlva tərwəslə.

¹⁹ Səlhã na medgeɗge gəm na ndargayã, gəm kuturni, səlhã naka zəga naddəvəni, kiritdəɓa gəm memɗeke mizilin na,

²⁰ aziyinik aka mekret zəgeɗ neki, yaŋ azle aka təki nawzaɓ Maŋgəlva.

²¹ Aron akiyək mekreti gəm metetile dəzəŋ aɗɗak matuya aba Yawe də wəzokon va Moyis aɗi wən nani.

²² Aron aslanək van kan aka əsap net ɗiyi, aɗɗa sitik zazaya ndəni amsak aprik səza aggrak əzaɓ-Maŋgəlva navvuyon mambraya, əvəl nawzla kurmbuɗuku gəm əzaɓ-Maŋgəlva nawrəh zazaya.

²³ Moyis də Aron atoŋgoŋgək addəv gizlirke nalma də Maŋgəlva, yas agilyoŋ kaɗɗa wəzaɓ aket ɗiyi. Gagdak na Yawe arbə a maheret ɗiy pakə:

²⁴ Offo agilik səba Yawe azlak əvəl nawzla kurmbuɗuku gəm səlhã naka matuya. Ɗiy pak awlanənka; aŋzlaŋgək vaŋvəl sən ənneke yas appu'oŋ afuŋ də ma gidifti.