Məsdəlveŋge 8 - Bible en Guidar

Əɗi Aron dit kirtin aka wəza na məsdəlva ( 8:1—10:20 ) Wəzləra nawɗi ɗəf aka wəza

¹ Yawe apel sənək Moyis amna:

² «Agəm Aron dit kirtini, lukut nawgulo gəm mẽl nawɗi ɗəf aka wəza, medgeɗge taka an nawzaɓ-Maŋgəlva navvuyon mambraya gəm ndergeyẽɗ sula, gəm hĩlĩw net peŋɗe məza wuɗo aran ɓa.

³ Akkeleɗ ɗiy pak ama gizlirke nalma də Maŋgəlva.»

⁴ Moyis aɗɗak an Yawe aɗi sən wən nani, akkeletik ɗiy pak a ma gizlirke nalma də Maŋgəlva.

⁵ Ndəni Moyis anah sən əsap net ɗiy na: Aŋki məs Yawe aɗi wən nan naɗɗa.

⁶ Yas Moyis aki Aron dit kirtini, aslslayaŋ eret iŋkile;

⁷ agul sənək lukut məza van ɓa sən Aron, aynan sənək dadakən də maslapa na ngərayã, aska sənək lukut silipi gəm lukut na daya net məsdəlveŋge; akklak sənək taɓak na ngərayã na makra lukut na daya net məsdəlveŋge, ambək dəndəni;

⁸ alaw sənək taɓak na makrani gəm aɗi sənək Urim də Tummim kəladdəvən;

⁹ atər sənək kiyən də mətərkiya, aka mətərkiya nak də mirbizin, alawək uffiyo məzaɓən na meleŋge, dərbangən əɗi nan aka wəza, va Yawe aɗi wən nan sən Moyis.

¹⁰ Moyis agəmək mẽl na mahenziŋ. Apeslik təki nassa də zəga naddəvən pakə;

¹¹ akso'uk təl buhul aka təki nawzaɓ-Maŋgəlva, yas apesl təki nawzaɓ-Maŋgəlva gəm zəgeɗ na wəza təmtəmi, ŋgefleŋ də gabban pakə, vi kawɗiyit ka na wəza;

¹² amanək mẽl na mahenziŋ aka ki Aron appay sənəka vi kawɗiyən naɗɗa wəza.

¹³ Moyis akiyik kirtin Aron, agul sitik parmeleɗi, aynan sitik dedeket də maslapa gəm aɗupsitik kulpup na məsdələv aketi, va Yawe aɗi wən nan sən Moyis.

¹⁴ Azargənək medgeɗge nawzaɓ-Maŋgəlva navvuyon mambraya; Aron dit kirtin aɗiyinək vet aka medgeɗge nawzaɓ-Maŋgəlva vi mambray naka;

¹⁵ Moyis atawək wəlani, atef mbel; aɗi də van azet mohõ matuya vi kawpeslini; azlif mbel dəppaŋ nek aza gabba matuya apesl ka nawzaɓ-Maŋgəlva navvuyon mambray akani;

¹⁶ Moyis agəmək səlhã naddəvən pakə, pəɗak na memɗeke gəm kiritdəɓa də səlhã naketi, azlek aka matuya;

¹⁷ azlak medgeɗge vani, gəba nani, slu nani gəm sensen a mapoho na dibirgidiki, va Yawe aɗi wən nan sən Moyis.

¹⁸ Səɓɓani, akiyək Ndargayã naɗɗa əvəl nawzla kurmbuɗuku; Aron dit kirtin aɗiyənək vet aka ki ndargayã naka;

¹⁹ Moyis atawək wəlani, aksu'ik mbel nan ki matuya tərwəslə;

²⁰ Moyis atawanək ndargayã van də ŋgaɗakən, azlak kini, mətawan nani gəm səlhã;

²¹ Moyis askoɓək zəga naddəvən gəm tetewirge aret iŋkile, azlak slu na ndargayã van dəwənnan aka matuya; ndəni əvəl nawzla kurmbuɗuk dəffeten səngən makrani, nan way məhhətən sən Yawe yi, va Yawe aɗi wən nan sən Moyis.

²² Akiyək ndargayã masula'ən, ndargayã nawɗi ɗəf aka wəza; Aron dit kirtin aɗiyənək vet aka ki ndargayã naka.

²³ Moyis atawək wəlani gəm atefik mbeli; aɗiyik aza mətekɗeke na sləma Aron dəzəŋ, aka van mizilin dəzəŋ gəm aka tələn mizilin dəzəŋ.

²⁴ Moyis eki kirtin Aron gəm aɗek mbel aza mətekɗeke na sləmet dəzəŋ, aka vet mizilin dəzəŋ gəm aka tilit mizilin dəzəŋ; gəm Moyis aksu'ik mbel ki matuya tərwəslə.

²⁵ Agəmək səlhã, kuturun, səlhã naka zəga naddəvən pakə, pəɗak na memɗeke, kiritdəɓa sulegiti gəm səlhã naketi gəm mettile dəzəŋ.

²⁶ Səddəv hĩlĩw na peŋ məza wuɗo ɓa naba Yawe naka, agəmək peŋ məza wuɗo ɓa taka, peŋ na gəpa məllaɓən də mẽl mədan taka gəm peŋ va gbirdidi taka, azi aka səlhã də mettile dəzəŋ naka.

²⁷ Aɗiyək bayman pak aka dagrakay va Aron gəm aka dagrakay vet kirtini, apsənək də əzokon aba Yawe.

²⁸ Moyis amsakək ətefit səveti, azlak aka matuya aka əvəl nawzla kurmbuɗuk məs məŋgənən adaffeten makrani vi kawɗiyit aka wəza, ndəni way məhhətən sən Yawe.

²⁹ Moyis agəmək makra ndargayã na wəzləra nawɗi ɗəf aka wəza naka, azokonək dəzok, aski haran na Moyis va Yawe aɗi wən nani.

³⁰ Moyis agəmək mẽl na mahenziŋ gəm mbel dəssoŋ aka təki nawzaɓ-Maŋgəlva, aksu'ik sən Aron gəm azet lukuɗe nani, azet kirtini gəm lukutɗe net sap dəndəni; awelik Aron, lukuɗe nani gəm awelik kirtini gəm lukuɗe neti.

³¹ Moyis anah sənək sən Aron gəm sit kirtin na: «Məda slu ama gizlirke nalma də Maŋgəlva; adaki kədawzəməni sap də peŋ naddəv hĩlĩw nawɗi ɗəf aka wəza, va nəɗi wən nan də wənah na: Aron dit kirtin dəzəmnəngəni.

³² Sluw dəpəl də peŋ, kəzlanəngən aka offo.

³³ Addəv pay buhul kəzaraŋ na səma gizlirke nalma də Maŋgəlva ɓa, hã wəgrak pay nawɗi ɗəf aka wəza dətoŋgəni; vi addəv pay buhul kapsukumi wəza,

³⁴ Va məɗɗan dəpaŋka. Vaski Yawe aɗi wən nan kaɗɗani vi kazban matuya navvuy mambray səkokum.

³⁵ Wakəssoŋ ama gizlirke nalma də Maŋgəlva dəfəɗ də kapaya addəv pay buhulu. Vasna wakəɗɗaŋ wəza na Yawe məza kəmtaŋ na ɓa. Aski an məɗi su wən nani.»

³⁶ Aron dit kirtin azbanənək əpel an Yawe aɗi wən nan kəlaza Moyis pakə.