Məsdəlveŋge 7 - Bible en Guidar

Əzaɓ-Maŋgəlva vi mambraya

¹ «Aŋki matuya nawzaɓ-Maŋgəlva nawfaɗ aka mambraya: zəga salalay sawɓa.

² Wəla zəga na matuya nawfaɗ aka mambray na, a təki məs adawtawən wəla zəga naɗɗa əvəl nawzla kurmbuɗuk adawtawəni, asna məsdələv dəkso'gən mbel nan ki matuya tərwəslə;

³ səlhã nan pakə, kuturun gəm səlhã naka zəga naddəvən, anan adawki ka əvəla,

⁴ kiritdəɓa sulegiti sap də səlhã naketi də an naka gəɓani, dətawgən memɗeke mizilin sap azet kiritdəɓa;

⁵ as kan na məsdələv dəzlegin aka təki nawzaɓ-Maŋgəlva: as peŋ məhhətən sən Yawe yi. Vaski matuya nawfaɗ aka mambray adawsani.

⁶ Zəŋvit məsdəlveŋge mezeŋgleket pak waɓap əzəma, a matuya yi əzəm nani: zəga na matuya yi.

⁷ Va əzaɓ-Maŋgəlva na mambraya vaski əzaɓ-Maŋgəlva nawfaɗ aka mambraya: əzaɓ-Maŋgəlva nan takay viyit sulegit pakə. Zəga na əzaɓ-Maŋgəlva vani, kana məsdələv dəzaɓ-Maŋgəlva navvuyon mambray adassani.»

Haran na məsdəlva

⁸ Məsdələv dəzaɓ-Maŋgəlva na əvəl nawzla kurmbuɗuk məs ɗəf akiyə, gəba na zəga naɗɗa əvəl nawzla kurmbuɗuk van na məsdələv dəzaɓ-Maŋgəlva vani.

⁹ Əvəl na zəga na mabardaw an mədan aka gulo pak gəm əvəl an mədan addəv mesteɓe awaniɓa a kazliya kana məsdələv məs dəɗɗa adassani.

¹⁰ Əvəl na zəga na mabardaw awan di pak, məllaɓən də mẽlẽ də an məllaɓni də mẽl ɓa, pak sit kirtin Aron adassani, duɗakanəngən dakadaka.

Əzaɓ-Maŋgəlva nawslere

¹¹ Aŋki matuya dəwəl sən əzaɓ-Maŋgəlva nawsler məs nawki sən Yawe.

¹² An əzaɓ-Maŋgəlva sap də əya gəlya amban adawkiya, asna dəvəlgən ammba əzaɓ-Maŋgəlva sap də əya gəlya van: Gəpa məpəpəla məza wuɗo ɓa məllaɓən də mẽlẽ, gbirdidi məkete'it də mẽlẽ gəm gəpa kukuɗ məslahan də gəpa məpəpəla məllaɓən moggon də mẽlẽ;

¹³ mbəksa gəpa məpəpəla na, də peŋ na gəpa məhəsən adawki əvəl nani, mbəksa əzaɓ-Maŋgəlva də əya gəlya na matuya nawslere;

¹⁴ dəvəlgən taka səza əvəl məkiyən sən Yawe pakə, sən məsdələv məs dəksu' mbel nawzaɓ-Maŋgəlva nawsler adawsani.

¹⁵ Sluw mədan na əzaɓ-Maŋgəlva nawslere də an nawgagdakani, kawzəmən dəpas dəpas a təki mədani, məza əppa zəga ka pumo ɓa.

¹⁶ «An ammba an aynə naɗɗa yi awaniɓa əvəl də makra yi, əzaɓ-Maŋgəlva na əvəl nan dəpas dəpas adawzəmən; vit pumo nani, kawzəmni an dəpələ;

¹⁷ slu na əzaɓ-Maŋgəlva məs dəpəl hã pay mohoko'ən hara na, kawzlani akoffo.

¹⁸ An ɗəf azəmək slu na əzaɓ-Maŋgəlva nawsler aka pay mohoko'əni, ɗəf an dəzaɓ-Maŋgəlva van na Maŋgəlva wataf ɓa; wazlək sləma akan ɓa: slu van mərayni; ɗəf an dəzəma, akkpaŋgək məs mambraya.

¹⁹ Sluw dərəŋgən zəga məs də heslepe pak awzəmnən ɓa, nan nawzlayi. Ɗəf salala pak wampər slu vani;

²⁰ Ya ɗef an salalay ɓa, an azəmək slu na əzaɓ-Maŋgəlva nawsler də Yawe, asna nan kawgilgini səret ɗiy nani;

²¹ An ɗəf arəŋgənək zəga də heslepe awan di pakə, ɗəf məs heslepe azani, zəga mamayã məs salalay ɓa awaniɓa zəga mamayã məs mətak ma ɗəf pak gəm məs salalay ɓa yas ampər slu məzaɓ-Maŋgəlva nawrəh zazay məpsən sən Yawe, kawgilgini ɗəf nan səret ɗiy nani.»

Tive va ɗiy adadawaŋgə

²² Yawe apel senək Moyis amna:

²³ Apel sit mə Israyelɗe anah sit na: «Səlhã pakə, na wasliya, na time awaniɓa na hãwã, kədawzəmnən ɓa;

²⁴ səlhã na zəga mamayã məmtəni gəm səlhã na mogogoy wagəɗ wəza awan di pakə, ya kədawzəmnən ɓa.

²⁵ Ɗəf an dəzəm səlhã na matuya məs agəɗ ka peŋ məhhətən sən Yawe, ɗəf nan kawgilgini səret ɗiy nani.

²⁶ Mbel pakə, na bəŋga awaniɓa na zəga mamayã, aŋga kəssoŋ pak na kədawzimin ɓa;

²⁷ ɗəf dəzəm mbel aweddi pakə, asna kawgilgini ɗəf nan səret ɗiy nani.»

²⁸ Yawe apel sənək Moyis amna:

²⁹ Apel sit mə Israyelɗe anah sit na: Ɗəf an dəki matuya nan nawsler sən Yawe, dəkigən əvəl nan sən Yawe səddəv əzaɓ-Maŋgəlva nawsler nani;

³⁰ dəkigən peŋ məhhətən sən Yawe dəvani, va wənəh na slu məs səlhã azani; gəm makrani məs ada əvəl də wəzokon aba Yawe;

³¹ As na məsdələv dəzlagən slu məs səlhã aka təki nawzaɓ-Maŋgəlva, makran tamə kana Aron gəm sit kirtin adawsani

³² gəm mettile an dəzəŋ kəpsənəngən məsdəlva, haran an kəgəmaŋ səra əzaɓ-Maŋgəlva nawsler nokumi yi.

³³ Mettile dəzəŋgəska kirtin Aron məs dəkenin mbel gəm səlhã nawzaɓ-Maŋgəlva nawsler duɗakanəngəni.

³⁴ Arbək na makran nawzokoni gəm mettile nawgəma, nəgimik sivet mə Israyelɗe, səka əzaɓ-Maŋgəlva nawsler neti, yas nipsin sən məsdələv Aron dəndit kirtini, va a gəla zəga an avayaŋ pay pakə, səra an net Israyelɗe.

³⁵ Aski haran na Aron gəm haran net kirtin səddəv əvəl nawzla kurmbuɗuk sən Yawe, təŋ səza mərbet vi kaɗɗa wəza na məsdələv aba Yawe,

³⁶ an Yawe aɗi wən nan napsiti yi, təŋ səza əɗi net aka wəza də əppay sit mẽl aweleŋgit mə Israyelɗe; as mahenziŋ məs adder ɓa vikumi, wasan faɗə.

³⁷ Aski matuya na əvəl nawzla kurmbuɗuku gəm nawvəla, na əzaɓ-Maŋgəlva vi mambraya gəm əzaɓ-Maŋgəlva nawzaɓan mambraya, nawɗi ɗəf aka wəza gəm əzaɓ-Maŋgəlva nawslere,

³⁸ məs Yawe aɗi wən nan sən Moyis aka mossorgo na Sinay, aka pay aɗi wən nan sit mə Israyelɗe a muyã na Sinay ka dəkiyaŋ sənəngən zəga nawvəl net sən Yawe.