Məsdəlveŋge 6 - Bible en Guidar

Tive va məɗi sit məsdəlveŋge Əvəl nawzla kurmbuɗuku

¹ Yawe apel sənək Moyis amna:

² «Aɗi wən nan sən Aron dit kirtin na: Vaŋ kədaɗɗaŋ əvəl nawzla kurmbuɗuku: əvəl nawzla kurmbuɗuk van dəzləgən aka slayoffo na təki nawzaɓ Maŋgəlva, dəvoŋgən kim hã təki dadaŋgə, offo na təki nawzaɓ Maŋgəlva dəsangən gidigidi.

³ Məsdələv dugulgən lukut na helege na ngərayã azani gəm dəynangən bente na helege na ngərayã ammbani; dəndagən moŋglo na əvəl nawzla kurmbuɗuk məs səlhã almis səka təki nawzaɓ Maŋgəlva, dəzigən a maŋgava təki nawzaɓ Maŋgəlva;

⁴ dəgbukgən lukutɗe səzani, dəgulgin mbirti; dəgilginigin moŋglo məs səlhã almis sə dibirgidik aka təki na matuya.

⁵ Offo na təki nawzaɓ Maŋgəlva tamə, adamta ɓa dəsangən gidigidi; də mompumo pak, məsdələv dəɗi sitgin motofɗe, dəzaɓangən əvəl nawzla kurmbuɗuku gəm dəzlagən slu məs səlhã azan na əzaɓ-Maŋgəlva nawrəh zazaya.

⁶ Offo dəsangən pay pak wəzla aka matuya məza əmta ɓa.

Əvəl də zəga na mabardaw

⁷ Aŋki mahenziŋ naɗɗa aka əvəla: kirtin Aron dərbanəngən aba Yawe, aba təki nawzaɓ-Maŋgəlva.

⁸ Məsdələv dəndəgən, gəpa van zloŋ taka na əvəla, mẽlẽ, gəm zəga məffok nek məs dəsan aka əvəl pakə, ya kawzlan aka təki nawzaɓ Maŋgəlva: tursan məzəffok moggoni, zəga na əɗɗumon sən Yawe.

⁹ An dəpələ, Aron dit kirtin dəzəmnəngəni; dəzəməngən aka təki na mahenziŋ məza wuɗo aran ɓa; dəzəməngən a daŋgla na gizlirke nalma də Maŋgəlva;

¹⁰ awdanən də gəpa məslahəŋ də wuɗo ɓa. Aski haran net məs nəpsit səddəv peŋ salala məhhətən məs məvay; nan tay va matuya vi mambraya awaniɓa matuya nawzaɓan mambraya.

¹¹ Kirtin Aron mezeŋgleket pak waɓap əzəmaŋgə; vi aska haran nokum faɗi yi, səddəv peŋ məhhətən sən Yawe; ɗəf mbərən məs dərəŋgən pak wasan salala.»

¹² Yawe apel sənək Moyis:

¹³ «Aŋki zəga məs Aron dit kirtin adawkiyaŋ sən Yawe pay nawɗiyit aka wəza də əman mẽl aketi: Gəpa kukuɗ kilo hoku va zəga na əvəl pay pakə, pəɗak nan də mompumo pəɗak nan mbərən tamə də moskoyo;

¹⁴ Də mẽl adawdanən addəv kasliya, kəkigən məslahan moggoni; kəvəl səngən məppesen nan ka miŋginit dəffokgən moggon aka Yawe.

¹⁵ An məɗiyi wətən Aron a gəlan ka məsdələv mesiya, dəɗɗagən məstaka: aska əvəl nahhət naɗɗa pay paki; kawzlan bayman pak sən Yawe.

¹⁶ Əvəl na məsdələv də zəga na mabardaw pak kurmbuɗuk adawzlanən baymani: zəga tay adawzəmaŋ ɓa.»

Əzaɓ-Maŋgəlva nawrah əvvuyon mambraya

¹⁷ Yawe apel sənək Moyis dawnəh na:

¹⁸ Apel sən Aron dit kirtini, anah sən na: Aŋki mahenziŋ na matuya vi mambraya: zəga mamayã na matuya vi mambray na a təki na ətaw wəla zəga naɗɗa əvəl nawzla kurmbuɗuki ətaw nan aba Yawe; zəga məs dəsan salalay.

¹⁹ Məsdələv dədawgən matuya vani, ndən dədawzəmən a matuya, a daŋgla na gizlirke nalma də Maŋgəlva əzəm nani.

²⁰ Zəga dəne aza slu na matuya pak wasan salala; an mbel asoyoŋgək aza lukutu gəm aza zəni, kəskoɓigin a matuya;

²¹ Mesteɓe na dələv məs mədan addəvən na, nakrapi, ya an addəv məsteɓe na təbəz pepreŋ mədani, nan kakkõhni, kakkeɗen aret iŋkile.

²² Zəv məsdələv mizilin pak waɓap əzəma: vi zəga an salalay.

²³ Əzaɓ-Maŋgəlva navvuyon mambray məs məka mbel nan addəv gizlirke nalma də Maŋgəlva vi kavvuyon mambray addəv gəla na Maŋgəlva pakə, nan kawzəmni ɓa. Nawzlay akoffo.