Məsdəlveŋge 5 - Bible en Guidar

An dərbə appaka

¹ An miziwe aɓoŋguk dawnah an asənə məs awəl də harani awaniɓa əsway an aprəmə, yas dərban ɓa, agəɗək mambraya, aslanək wən nan akani.

² Awaniɓa an ɗəfa məza dəsən akan ɓa arəŋgənək zəga namə'ã, mogogoy na zəga nawra, zəga mamayã nengili məmtəni, zəga mamayã muzliya məmtəni, vasna akkpaŋgək məs mambraya, araygənəka.

³ Zəga an mbərən narba: məza də əsən akan ɓa ɗəf arəŋgənək ɗəf məs də haramba, ya an məprəman səni na, nan van wakkpaŋ məs mambraya;

⁴ awaniɓa ɗəf məza dəsən akan ɓa, apelik əpel nasway kpõy, məs naynani awaniɓa nawpəl kini, aka əttok an ɗəf adasway kpõy pakə, səza aprəm gabbani, wakkpaŋ məs mambraya.

⁵ An ɗəf akkpaŋgək məs mambray vi agəɗək taka səmmbet zəgeɗ məŋɗetiski, dərbangən mambray vani,

⁶ asna dəkigən hãw muguluŋgun taka sən Yawe vi mambray an agəɗə, time awaniɓa hãwã, va matuya vi mambraya; asna məsdələv dəzbangən mahenziŋ navvuyon mambray akani.

Əzaɓ-Maŋgəlva net məssehẽŋɗe

⁷ An ɗəf tay də ərah gala nawrah zəga mamayã muzliya ɓa, waɓap kawki mukuɗuŋguleɗ sula awaniɓa biŋgeɗ na maha sula sən Yawe vi mambray nani, taka vi əzaɓ-Maŋgəlva na mambraya mbərən tamə vi əvəl nawzla kurmbuɗuku.

⁸ Dəkigin sən məsdəlva dəɗɗagən matuya vi mambray daabəŋ; dəŋzlugən wəlan səza muffur wəlan məza əboŋ kiyən ɓa;

⁹ dəkso'gin mbel na bəŋga na matuya vi mambray aza zə təki nawzaɓ-Maŋgəlva; asna dətiɗgin mbel en dəppaŋ aza gabba təki nawzaɓ-Maŋgəlva; aski matuya vi mambraya.

¹⁰ Də an masula'ən, dəɗɗagən əvəl nawzla kurmbuɗuk də əzban mahenziŋ nani. An məsdələv azbanək mahenziŋ navvuyon mambray məs agəɗə akani mambray nan wavvuyu.

¹¹ An ɗəf tay dit mukuɗuŋguleɗ sula ɓa awaniɓa biŋgeɗ na maha sula ɓa, waɓap əki gəpa zəga na kilo hoku ka matuya vi mambray an agəɗə. Adawmə mẽl ɓa gəm adawɗi tursan ɓa, vi matuya na mambray yi.

¹² Dəkigən sən məsdəlva; məsdələv dəndəgən van zloŋ taka ka zəga naɗɗumoni dəzlagən aka təki nawzaɓ-Maŋgəlva aka peŋ məhhətən sən Yawe; aski matuya vi mambraya.

¹³ An məsdələv aɗɗak mahenziŋ navvuyon mambray akan vi mambray taka an agəɗ səmmbet zəgeɗiski, mambray nan wavviyə. Məsdələv dəzban mahenziŋ va na mahenziŋ na əvəla.

Əzaɓ-Maŋgəlva vi mambraya

¹⁴ Yawe apel sənək Moyis amna:

¹⁵ An ɗəf azlzlaɓək dəpsən an dəslə napsən Yawe ɓa, agəɗək mambraya, dəkigən sən Yawe, səret gilew dit timeŋgiɗi, ndargayã məza heslepe tay azan ɓa əlbəh nan dəsangən mətawən də koɓo addəv gəla na Maŋgəlva ka əzaɓ-Maŋgəlva nawzaɓan wən nani.

¹⁶ Ɗəf dəgəɗ an naɗɗay ɓa aka təki salala, dəzaɓangən an agəɗ də əfaɗən gəm əɗi taka səddəv sle na əlbah na ndargayã nak sən məsdəlva. An məsdələv aɗɗak mahenziŋ navvuyon mambray akan də ndargayã nawzaɓ-Maŋgəlva nawzaɓan wən nani, warah əvvuy mambray nani.

¹⁷ An ɗəf agəɗək mambray məza wa' ɓa, agəɗək taka səra əpel na ənziya an Yawe atakə, araygənəka, waslan mambray nan akani,

¹⁸ dəkigən ndargayã məza heslepe azan ɓa səret gilew dit timeŋgiɗi, nawki dala va mətawən ammba əzaɓ-Maŋgəlva nawzaɓan mambraya sən məsdəlva. An məsdələv aɗɗak mahenziŋ navvuyon mambray məs məɗɗan wa'i ɓa akani, mambray nan wavvuyu.

¹⁹ As əzaɓ-Maŋgəlva nawzaɓan mambrayi; vi ɗəf nan araygənək gesiŋgesiŋ aba Yawe.

²⁰ Yawe apel sənək Moyis amna:

²¹ An ɗəf agəɗək mambraya, araygənək sən Yawe, awəsən wən sən meggen mə Ibrid aka zəga an məzaɓan avani, aka dəməna, awaniɓa zəga an ahalə, awaniɓa də əmõh zəga na meggen mə Ibrid,

²² mbərən ɓa arahək zəga məzan yaŋ awə wən akani, asway dəkan kawɗaman mambraya.

²³ Ɗəf an dəgəɗ mbərayən, araygənəka; dəmndagangən zəga an ahãlə, awaniɓa an amõh səva meggen mə Ibrid, awaniɓa an məzaɓan avani, awaniɓa zəga an dəzə yas araha.

²⁴ Zəga məs asway akan addəv uwawən pak dəfaɗəgən baymani, gəm taka səddəv sle na əlbah na zəga vani dəpsəngən sən afən zəga pay adawsənən na araygənəka.

²⁵ Dəkigən ndargayã məza heslepe tay azan ɓa sən məsdəlva, səret gilew dit timeŋgiɗi aba Yawe vi kawzaɓan an agəɗə, zəga vani dəsan nawki dala va miziwgin ammba əzaɓ-Maŋgəlva nawzaɓan mambraya.

²⁶ An məsdələv azbanək mahenziŋ akan aba Yawe, mambray zev awan agəɗ di pak wavvuyu.