Məsdəlveŋge 4 - Bible en Guidar

Əzaɓ-Maŋgəlva navvuyon mambraya Əzaɓ-Maŋgəlva na daya net məsdəleŋge

¹ Yawe apel sənək Moyis də wənah na:

² Apelsit mə Israyelɗe vaŋka: An ɗəf agəɗək mambray məza wa' ɓa aka taka na əpel na ənziya an Yawe aɗi kaɗɗani ɓa, yaŋ agəɗ taka nereti:

³ An məsdələv mesiya na Maŋgəlva yi dəgəɗ mambraya yaŋ an agəɗ van areygit ɗiyi, dəkigən medgeɗge məza heslepe azan ɓa sən Yawe vi mambray an agəɗə.

⁴ Dəkagən medgeɗge van a gizlirke nalma də Maŋgəlva, aba Yawe; dəɗigən van aka ki medgeɗge vani, dətawgən wəlan aba Yawe.

⁵ Məsdələv mesiya na Maŋgəlva dəgimgin mbel na medgeɗge vani, dəkigin a gizlirke nalma də Maŋgəlva.

⁶ Məsdələv dəyopgən pərəm van aret mbeli, dəkso'igin mbel vetis tel buhul aba Yawe aza məzlara na gəla salala.

⁷ Asna məsdələv dəɗigən mbel vet aket mohoŋɗe na təki nawzaɓ-Maŋgəlva a təki nawzla tursan dəsan a ma gizlirke nalma də Maŋgəlva, aba Yawe, dəggbogin mbel na medgeɗge məs dəppaŋgə aza gabba matuya nawzla əvəl nawzla kurmbuɗuk məs dəsan a ma gizlirke nalma də Maŋgəlva.

⁸ Səlhã naza medgeɗge na əzaɓ-Maŋgəlva navvuyon mambray pak dətoruguni: səlhã naka zəga naddəvən də səlhã naddəvən pakə

⁹ gəm kiritdəɓa sulegiti sap də səlhã naketi də an naka gəɓani; dətawgən memɗeke mizilin sap azet kiritdəɓa.

¹⁰ Va adatawnən slu na medgeɗge na əzaɓ-Maŋgəlva nawslere; asna məsdələv dəzlagən aka təki nawzaɓ-Maŋgəlva na əvəl nawzla kurmbuɗuku.

¹¹ Gəba na medgeɗge, slu nani, sapgən də kini gəm tetewirgeni, zəga naddəvən gəm seŋseni,

¹² va wənah na, slu na medgeɗge məs dəpəl pakə, dəgilgənəngən sə dibirgidiki, aka təki salala, a təki naggbo' moŋglo məs səlhã almisi, akoffo net motoffoɗe aka təki adaggbo'on moŋglo məs səlhã almis adapsani.

Əzaɓ-Maŋgəlva net ɗiy pakə

¹³ An əsap net Israyelɗe dəgəɗ mambray məza wa' ɓa, ya wən nan dəppas a ma heret ɗiy ɓa, azlahaŋgək ki taka na əpel na ənziya an Yawe aɗi kaɗɗani ɓa, aɗɗaŋgək an dəslə naɗɗa ɓa.

¹⁴ An məsənni mambray an aɗɗaŋ na, əsap net ɗiy dəkigən medgeɗge, naɗɗa matuya vi mambraya, dəkinəngən a ma gizlirke nalma də Maŋgəlva.

¹⁵ Ɗiy gugriɗ na əsap net ɗiy dəɗiyəngən vet aka ki medgeɗge, kawtaw wəlan aba Yawe.

¹⁶ Məsdələv mesiya dətafgən mbel na medgeɗge dəkegin a gizlirke nalma də Maŋgəlva.

¹⁷ Məsdələv dəyopgən pərəm van aret mbel an ataf neki, dəkso'gin mbel vet təl buhul təkzləm məzlzlara na kəlappaka aba Yawe.

¹⁸ Asna dəɗigən mbel vet aket mohoŋɗe naka təki nawzaɓ-Maŋgəlva məs dəsan aba Yawe, addəv gizlirke nalma də Maŋgəlva, dəggbo'gən mbel en dəppaŋ beymet aza gabba təki nawzaɓ-Maŋgəlva na əvəl nawzla kurmbuɗuk məs dəsan ama gizlirke nalma də Maŋgəlva.

¹⁹ Səlhã nazan pak na, dətawgən gəm dəzlagən aka matuya.

²⁰ Dəgəɗgən də medgeɗges va agəɗ də medgeɗge na əzaɓ-Maŋgəlva navvuyon mambraya, vas adaɗɗani. An məsdələv azbanək mahenziŋ navvuyon mambray aket ɗiyi, mambray nan wavvuyu.

²¹ Dəgilgingən medgeɗge sə dibirgidik, dəzlagən va azla medgeɗge maddaabəŋ. Aski matuya vi mambray na əsap net ɗiyi.

Əzaɓ-Maŋgəlva na məlyã

²² An məlĩ yi dəgəɗ mbərayən, məza wa' ɓa azlahək ki taka na əpel na ənziya an Yawe Maŋgəlva nan aɗi kaɗɗani ɓa, asna araygənəka,

²³ an mənah səni mambray an agəɗə, dəkigən porsok məza də heslepe azan ɓa vi matuya.

²⁴ Dəɗigən van aka ki porsok, dətawgən wəlan a təki məs adatawan wəla zəga naɗɗa əvəl nawzla kurmbuɗuk aba Yawe. Aski əzaɓ-Maŋgəlva vi mambraya.

²⁵ Məsdələv dəvan dəgəmgən mbel na porsok nawzaɓ-Maŋgəlva vi mambraya, dəɗigən aka moho təki naɗɗa əvəl nawzla kurmbuɗuku; asna dəkkeslgin mbel an dəppaŋ aza gabba təki nawzaɓ-Maŋgəlva nawzla.

²⁶ Səlhã pak na, dəzlagən aka təki nawzaɓ-Maŋgəlva va adawzla əzaɓ-Maŋgəlva nawslere. An məsdələv azbanək mahenziŋ nawrah əvvuyon mambraya aka wətən məlyã vi mambray an agəɗə, mambray nan wavvuyu.

Əzaɓ-Maŋgəlva na məzuraya

²⁷ An məzurayə dəgəɗ mambray məza wa' ɓa, azlahək ki taka na əpel na ənziya an Yawe aɗi kaɗɗani ɓa, akkpaŋ də tive vas məs mambraya,

²⁸ an mərban səni mambray an agəɗə, dəkigən hãw muguluŋgən məza heslepe ɓa, vi mambray nan məs agəɗə;

²⁹ dəɗigən van aka ki hãw nawtaw wəlan vi mambraya, dətawgən wəla zəga van a təki adatawaŋ wəla zəga naɗɗa əvəl nawzla kurmbuɗuku.

³⁰ Məsdələv dəkaygən mbel də pərəm vani, dəɗigən aket mohoŋɗe naka təki naɗɗa əvəl nawzla kurmbuɗuku; asna dəkkeslgin mbel an dəppaŋ beymet aza gabba təki nawzaɓ-Maŋgəlva.

³¹ Dətorgən səlhã nazan pak va adawtorun pay na əzaɓ-Maŋgəlva nawslere, məsdələv dəzlagən aka matuya ka tursan məzəffok sən Yawe. An məsdələv aɗɗak mahenziŋ navvuyon mambray aka ɗəf an dəgəɗ mambraya, mambray nan wavvuyu.

³² An time aki ka matuya na mambraya, dəkigən time muguluŋgən məza heslepe ɓa.

³³ Dəɗigən van aka ki zəga na matuya vi mambraya, dətawgən wəlan ka matuya vi mambraya, a təki məs adawtawaŋ wəla zəga naɗɗa əvəl nawzla kurmbuɗuku.

³⁴ Məsdələv dəkaygən mbel na zəga van də pərəm vani dəɗigən aket mohoŋɗe naka təki naɗɗa əvəl nawzla kurmbuɗuku; asna dəkkeslgin mbel en dəppaŋ aza gabba təki nawzaɓ-Maŋgəlva.

³⁵ Dətorgən səlhã nazan pak va adawtor an na time na əzaɓ-Maŋgəlva nawslere, məsdələv dəzlagən aka təki nawzaɓ-Maŋgəlva, sap aza peŋ məhhətən sən Yawe. An məsdələv aɗɗak mahenziŋ navvuyon mambray aka ɗəf an dəgəɗ mambraya, mambray nan wavvuyu.