Məsdəlveŋge 3 - Bible en Guidar

Əzaɓ-Maŋgəlva nawslere

¹ «An əzaɓ-Maŋgəlva nawsler ɗəf van akiyə: An zəga mamayã mizilin awaniɓa muguluŋguni aki nawtaw wəlan aba Yawe, dəsan məza heslepe azan ɓa.

² Dəɗigən van aka ki zəga mamayã nawvəl nani, dətawgən wəlan a ma tive na gizlirke nalma də Maŋgəlva; asna məsdəlveŋge, kirtin Aron, dəkso'ingin mbel ki təki nawzaɓ-Maŋgəlva tərwəslə.

³ Səddəv zəga an nawzaɓ-Maŋgəlva nawslere, an adawkiyaŋ ka əvəl nawzla kurmbuɗuk sən Yawe na, səlhã naka zəga naddəvən də səlhã naddəvən pakə

⁴ gəm kiritdəɓa sulegit sap də səlhã naketi də an naka gəɓani, dətawgən memɗeke mizilin sap azet kiritdəɓa.

⁵ Asna kirtin Aron dəzlanəngən aka təki nawzaɓ Maŋgəlva sap aza əvəl nawzla kurmbuɗuk məs dəsan aket motoffoɗe nakoffo neki; aski peŋ məhhətən məs məzəffok nek aka Yawe.

⁶ An səret gilew dit timeŋgiɗ məki sən Yawe ka əzaɓ-Maŋgəlva nawslere, zəga mamayã mizilin awaniɓa muguluŋgun məza heslepe azan ɓa adawkiya.

⁷ An time ɗəf aki kawvəl dəndəni, asna dəkigən aba Yawe.

⁸ Dəɗigən van aka ki zəga mamayã na əvəl nani, dətawgən wəlan aba gizlirke nalma də Maŋgəlva; asna kirtin Aron dəkso'ningin mbel nan ki təki nawzaɓ Maŋgəlva tərwəslə.

⁹ Səddəv əzaɓ-Maŋgəlva nawslere, an məs adawkiyaŋ ka peŋ məhhətən sən Yawe na, slu məs də səlhã: kuturun bayman pak kawtawən hərəkə, səlhã naka zəga naddəvən də səlhã naddəvən pakə

¹⁰ gəm kiritdəɓa sulegiti sap də səlhã naketi də an naka gəɓani, dətawgən memɗeke mizilin sap azet kiritdəɓa.

¹¹ Asna məsdələv dəzlagən aka təki nawzaɓ-Maŋgəlva; aski peŋ məhhətən sən Yawe.

¹² An əvəl nan də hãwĩ yi, asna dəkagən aba Yawe.

¹³ Dəɗigən van aka kini, dətawgən wəlan aba gizlirke nalma də Maŋgəlva; asna kirtin Aron dəkso'ningin mbel na zəga van ki təki nawzaɓ-Maŋgəlva tərwəslə.

¹⁴ An adawki aba Yawe ka peŋ məhhətən na, səlhã naka zəga naddəvən də səlhã naddəvən pakə;

¹⁵ kiritdəɓa sulegiti sap də səlhã naketi də an naka gəɓani, dətawgən memɗeke mizilin sap azet kiritdəɓa.

¹⁶ As na məsdələv dəzlegin zəgeɗis aka təki nawzaɓ-Maŋgəlva; aski peŋ məhhətən məs məŋgənən nek. Səlhã pak na Yawe yi.

¹⁷ Mahenziŋ aska, aŋga kəssoŋ pak na wasan faɗə: səlhã pak dit mbel pak na, kədawzəmaŋ ɓa.»