Məsdəlveŋge 26 - Bible en Guidar

¹ Kədawzaɓaŋ tuyeɗe ɓa, zəgakamaŋgəlva may serek naɗɗa wəza dənɗaŋ ɓa, kədawɗiyaŋ gərəm məzaɓən nappu' aban ɓa; vi intə Yawe Maŋgəlva nokumə.

² «Mərma pay naffete, məɗi ki təki nawzaɓ-Maŋgəlva nawa. Məgeslne su in Yawe.»

Wəzaɓ temtemi

³ An mənokum tat ədaw aket mahenziŋɗe nawa, an kərmanənək əpel na ənziya, kəɗɗaŋgək wəza dənɗaŋ,

⁴ wanəzi sukum buwən də pay nani; dələv wazaɓ zəga, wəleŋɗe na guli wawaŋgə;

⁵ wərga hay wanzi anokum da hã gap aza wəɓuh megezlembirke, wəɓuh megezlembirke wanzi hã gap aza əzlga; wakəzəmaŋ way nokum kpe'i, wakəssoŋ aka dələv nokum fendeŋgi;

⁶ Wanəki zazay aka dəlva; wakəvoŋgoŋ məza zəga əzzan əzlzloɓokum ɓa; wanəzet zəgeɗ memeyẽɗ mbəreyit səka dəlva; wəgay atoŋ na aka dələv nokum ɓa.

⁷ Wakəgəmən gebbet məzuzelɗe nokumə, waskotoŋ a ma masalam nokumə;

⁸ Sle' suwalaŋkum wagəmaŋ megebbet ɗiy səkatə, səkat wagəmaŋ megebbet gabal kəlaw, wakəbeyin məzuzelkumən də masalam nokum;

⁹ wanəkkpaŋ kəla zokum, wanəpsukum uwa, wanənzlər gukum; wanərma wənmiyna naw də mənokum;

¹⁰ Wakəzəmaŋ zəga na mabardaw an məzvan farə, wakəgilginən zəga na mabardaw an məzvan kawzi an meleketen a gəlani;

¹¹ wanəɗi təki nassa naw awalaŋkum; nəzelkum na ɓa;

¹² wanəbbal awalaŋkum; wanəsaw Maŋgəlva nokum, wakəssoŋ ɗiy nawa.

¹³ In Yawe Maŋgəlva nokumtə, məs dəgilgukum səka dələv na Eziptə, vi kədassoŋ belemɗe net əmpa ɓa; intə nəŋzliw wəleŋɗe na zuk nokum, nədawgukum wəlokum ɗiliwwe.

Əraya

¹⁴ «An kəɓe'eŋ suwən ɓa, kəzbanən əpel na ənziya ɓa,

¹⁵ an kəzgetinik mahenziŋɗe nawa, an kəzelinik tiveɗnanziya nawa, yaŋ kəzbanən əpel na ənziya ɓa, kəŋzləwən wənmiyna naw vaska,

¹⁶ asna an nədawgəɗ sukum yaŋka: Wanəgeslne' gukum də ətara gəm gamba naddakan horokum may navviren zeŋgilokum. Wakəslgannən guli nokum sam mekeleŋ məzuzelɗe nokum dədawzəmnəni.

¹⁷ Wanəsil də mənokum məzuzelɗe nokum dəbaykuməngəni; məzuzelkumən wazəmaŋ məlĩ akokum, wakənzoŋ məza mərɓohokumi dayday ɓa.

¹⁸ An kəprəmənən maw ɓa'e na, wanəzga' sukum day ki lahəŋ təl buhul sən mambray nokum.

¹⁹ Wanərsla gbogboŋ na əkaɓ nokum, wanəkkpaŋgan təki a disiŋ kiykum ŋgbãyŋgbãy va təbza gəm dəlvafuŋ nokum ŋgbãyŋgbãy va təbəz pepreŋge;

²⁰ wakəyanən zukum samə, dəlvafuŋ agəɗ na zəga əmpa ɓa, wəleŋɗe naka dələv awaŋ na əmpa ɓa.

²¹ An mənokum tat ərganən mokrokum də ina, kaprəmən maw ɓa, wanərgukum day ki lahəŋ təl buhul, gala mambray nokum.

²² Wanəslin zəgeɗ memeyẽɗ nawra akokum, wampirnin kirtukum, wazetin zəgeɗ memeyẽɗ nokum, wakkpaŋgokumən ŋgbəra'ə, hã kpaŋgit tiveɗ nokum hələw hələwə.

²³ An kəprəmən wəzga naw ɓa'a, an kəzbanənək ərga mokrokum də in dərəŋgə,

²⁴ naw pak wanəsil akokum, naw pak wanərgukum day ki lahəŋ təl buhul sən mambray nokum.

²⁵ Wanəsilgin masalam akokum nampəl ki wənmiyna, wakəkkalaŋ addivit walaŋgəleɗe gugriɗ nokum. Wanəslən gəbaymərma a walaŋkum, kappokumi ava məzuzel nokum.

²⁶ Pay nədawgəm way sə bokum; may wagəɗə, gil kəlaw wadanən way nokum aka gulo taka; way an adawkiyaŋ sukumən wasan siɗikke, wakəzəmaŋgə ya kəbaŋ na ɓa.

²⁷ Də as pak an kəprəmən maw ɓa, an kərgannək mokrokum də ina,

²⁸ in zək naw wanəsil akokum addəv ədagədəva, wanəzgasukum təl buhul vi mambray nokum.

²⁹ Wakəzəmən sluwit kirtukum mezeŋgleket dit muguluŋgiti.

³⁰ Wanəzet gəleɗe-nettuyeŋge nokum, wanəzet gəla matuyaɗe na tursan nokum; wanəzget gəbayɗe nokum aket matuyaɗe sit tuyeŋge nokum gəm wanəzelkum.

³¹ Wanəkkpaŋget walaŋgəleɗe nokum kiməskiya, wanəpzlu gəla nakkam nokum; məŋgən tursan nenek nokum affok na nek akaw ɓa;

³² wanəraygən dələv nokum dəvawa, məzuzelkumən en dəzzoŋ də gəla adak waggətaŋgə.

³³ Wanətrayokum aret ɗiy nammba dəlva, wanəptu masalam akokum; dələv nokum wakkpaŋ muyã ɗarə gəm walaŋgəleɗe nokum kiməskiɗe.

³⁴ Asna dələv wannek də pay naffet nani, aka pay nawrayəs pak wakəssoŋ aka dələv net məzuzelkuməni, dəpaski kan dələv van adawfaɗ ki pay naffet nani;

³⁵ Aka pay nawrayəs pakə, waffeti, vi kawfaɗ ki pay naffet məs dəɓap ərah əffet gala kəssoŋ də gəla adak ɓa naka.

³⁶ Ɗiy en səmbokum məs dəssoŋ mederet aka dələv net məzuzelkuməni, wanəddeketi. Ɓaɓəlma gaslamba təttaka məs dədawbəta warɓeheti; wanzoŋ va ɗəf adanzan sən masalam, waskotoŋ məza ɗəf dədarɓihit ɓa.

³⁷ Wargislen aza zit va səba masalam, mbara ɗəf tay dədarɓehet dayday ɓa. Aɓapaŋ na əziw abet məzuzeltin ɓa;

³⁸ wakəmtaŋ a guwa, dələv net məzuzelɗe nokum wazəmkum.

³⁹ Ɗiy en səmmbokum məs dəssoŋ mederet aka dələv net məzuzelkuməni, waddakaŋ sən mambray neti gəm vi mambrayɗe net migilti, sap azan neti waddakaŋgə.

Maŋgəlva waɗɗumon wənmiyna nani

⁴⁰ Ya waɗiyaŋ marava aka mambray net də an net migilti, də wənah na aɗɗaŋgək vurum azawa, argaŋgək makra də ina.

⁴¹ Ndəni naw tam nərga makraw dənɗaŋ yaŋ nəke aka dələv net məzuzelɗe neti; asna pay mbərən wavoŋgənən kiɓəɓəl neti, watafən əzga' vi mambray neti.

⁴² Wanəɗɗum aka wənmiyna naw də Yakob, wənmiyna naw də Isak gəm wənmiyna naw də Abraham; wanəɗɗum aka dəlva.

⁴³ Vasna, pay adappanən dələv net friki, pay adawfaɗ pay naffet aka pay adappanən addəv əraya, wafaɗaŋ aka heslepe net vi azgetinik tiveɗnanziya nawa gəm azelinik mahenziŋɗe nawa,

⁴⁴ Mbara pay adossoŋ aka dələv net məzuzelɗe neti, nəzget ɓa, nəzel gala nawzet gəm nappan wənmiyna naw dənɗaŋ ɓa, vi intə Yawe Maŋgəlva neti.

⁴⁵ Wanəɗɗum aketi, aka wənmiyna naw dit dihigiɗti məs nəgilgit səka dələv na Eziptə a ma haret ɗiy-ɗarə, vi nəsawgən Maŋgəlva neti, in Yawe.»

⁴⁶ Eŋkin wəhayã, tiveɗnanziya gəm mahenziŋ en Yawe aziwgit aka walaŋgən dit mə Israyelɗe aka gərəm na Sinay, də ma Moyis.