Məsdəlveŋge 25 - Bible en Guidar

Wəzva nappan guli əffete

¹ Yawe apel sənək Moyis səka gərəm na Sinay:

² Apel sit mə Israyelɗe; anah sit na: An kəgapaŋgək aka dələv məs nəpsukumu, dələv dəffetgən wəzva buhul sən Yawe:

³ kəslgagən guli nok wəzva sləre; addəv wəzva buhul kətawgən megezlembirke noko gəm kuɓuhgən uwa nan wəzva sləre;

⁴ wəzva mabuhulon dəsangən ka naffete, guli dəffetgən əffet na Yawe wəzva taka: kədaslga guli nok ɓa, kədawtaw kiva megezlembirke nok ɓa,

⁵ kədawpet zlalwã məs digil ɓa, kadawɓuh mokkoy na megezlembirke məs mətawni kivan ɓaɓa, dəsangən ka wəzva naffet na dəlva.

⁶ Kəzəmaŋgən an məs dəlvafuŋ agilgin addəv wəzva vanəska, isi, balam noko, balamək noko, məgəɗ wəza nawrəh koɓeɗi, awaniɓa məsgəlok neŋgil anokda gəm ɗiy en dəssoŋ anokda.

⁷ Zəga mamayã nok tamə gəm zəgeɗ memeyẽɗ nawra naka dələv noko, wazəmaŋ an dəsan aka dələv pakə.

Wəzva nawpəl kiyit ɗiyi

⁸ Kəŋgəɗgən pay naffet na lumu taka təl buhul na wəzva buhul, va ənah na əzva buhul təl buhul; ənziya na wəzva buhul təl buhuləs tay ərban wəzva kaklaw poɗo kiyən vaytakə.

⁹ Təla mabuhulon də əvoŋ kəlaw na təla vani, kəffonəgən gozloro vi kaɗɗəla; pay metiŋgin navvuyon mambray na, kuffonəngən gozloro aka dələv nokum pakə;

¹⁰ wəzva makaklaw sle'en kəɗinəngən ka salala, kətəlaŋgən ma nappet ɗiy naka dələv van na kiyti; dəsan sukumgən ka pay nawpəl kiyit ɗiyi; naway pak sərokum dəmilgin a təki nani, naway pak sərokum dəmilgin aza mahəlfa nani.

¹¹ Wəzva makaklaw sle'en dəsan sukumgən ka pay nawpəl kiyit ɗiyi: kədazlgaŋ ɓa, kədawpeteŋ zlalwã ɓa, kədawɓuhnən megezlembirke məza mətawni kivan ɓaɓa,

¹² vi wasan wəzləra nawpəl kiyit ɗiyi, dəsan sukumgən ka zəga an salala. Kəzəmaŋgən zlalwã məzugilyen a gulyo.

¹³ Aka wəzva nawpəl kiyit ɗiyis na, nawaydi pak sərokum dəmndangən a təki nani.

¹⁴ An mənokum tat əman vokum na, an zəga kəvəl sən məlmuko, awaniɓa zəga kədalbəh səvani, ɗəf sərokum adappət məlmən ɓa:

¹⁵ An kalbəh zəga səva məlmuk na, kəɗɗumgən aket wəzveɗe en dətoŋgon təŋ səza wəzva nawpəl kiyit ɗiyi; nan tamə, dəvəl sukgən də əzga sləma aket wəzveɗe en dəppaŋ nawgap aza wəzva an dədazzan nawpəl kiyit ɗiyi.

¹⁶ An wəzvaɗe tahəŋ dəppaŋ diyɗa, wəlbah nan tam wasan diyɗa; an wəzvaɗe dəppaŋ siɗikkeŋgə, wəlbah nan warrehi: vi zəga na mabardaw van məŋɗan dəŋɗe avəl suko.

¹⁷ Ɗəf səmbokum adappət məlmən ɓa; vaski kədawgeslne sən Maŋgəlva. Vi intə Yawe Maŋgəlva nokum.

¹⁸ Məgəɗ wəza dit mahenziŋɗe nawa; mərme tiveɗnanziya nawa, məgəɗ wəza dənɗaŋ: vasna wakəssoŋ fendeŋ aka dələv vani.

¹⁹ Dələv wagəɗ zəga, wakəzəmaŋ kpe'i, wakəssoŋ akan fendeŋgi.

²⁰ Kuzuŋ wakənahaŋ na: «Miy mədawzəm aka əzva mabuhulon adan məzlək na ɓa may məkkalan zəga na mabardaw nam ɓa di?»

²¹ Məprəm kana! Wanəɗɗa wəzaɓ naw dəlgən akokum addəv wəzva masləre'ni, waki zəga na mabardaw nawtər wəray ammba wəzva hoku.

²² Wəzva madodopoɗo'ən, wakəslgaŋgə, ya zəga na mabardaw məzvan kədawzəmaŋgə hã gap aza wəkkal zəga na mabardaw na wəzva ma vaytakani, wakəzəmaŋ zəga məzvani.

Tive nawbit təkiya

²³ Kədawvəlaŋ dələv ka faɗ ɓa vi dələv nawi; molhõyẽɗ kənanaŋ anawda ɗarə, məsgəleŋgiɗu kənanaŋ;

²⁴ vi aka dələv məs nawsan ka nokum baymanəŋ na, kəppaŋgən tive sən ɗəf nawbit təki an məvələn.

²⁵ An dəmən tay aka məlmuko yas adaŋgla əvəl təki nan səzani, ɗəf an nawzəmgəla, va wənah na, həlfən na gugo dədegən əbit məs məlmən avələ.

²⁶ An ɗəf tay də məlmən nawbitin ɓa, yaŋ ndən sən kiyən kpak arah zəga nawbitin,

²⁷ dəŋɗetgin wəzvaɗe dətoŋgoŋ təŋ səza məvəlni, dəfaɗgən an dəpəl sən ɗəf məs dəlbaha, vi dəmndangən ətaf təki nani.

²⁸ Ya an ndən sən kiyən dərah zəga nawbitin ɓa, zəga məvələn van wasan ava ɗəf an dəlbəha, hã gap aza wəzva nappet belemɗe mə Ibriɗe; kappan səni də wəzva nappet belemɗe mə Ibriɗe, ɗəf van wagəm zəga nani.

²⁹ An ɗəf tay əvəl gəla a walaŋgəla-metiŋ mətərwəslən də zlava na dəlva, tive nawbitin tay hã gap də wəgrak na wəzva məs məvələn akani; əvoŋ dəŋɗeyi nawbitin.

³⁰ An məbitni yi addəv wəzva ŋgbuɓɓo ɓa, gəla məs dəsan addəv walaŋgəla-metiŋgin mətərwəslən də zlava na dələv van, wasan faɗ sən ɗəf an dəlbəha, siskiŋ sit kirtini; agil na səvan də wəzva nappet belemɗe mə Ibriɗe ɓa.

³¹ Gəleɗe nawra məs mətərwisltiyi də zlava na dələv ɓa, kaɗiti yi va gulyeŋge naka dəlva; tive nawbitit tay, pay nappet belemɗe mə Ibriɗe na, kappani gəla vani.

³² Dewe di pak mə leviɗe tahəŋ də tive nawbit walaŋgəleɗe gugriɗ net mə leviɗe dit gəleɗe nawray net en naddivit walaŋgəleɗe vetiski.

³³ An mə levi maɓɓan dəlbəh dayday sə walaŋgəla-metiŋ an neti, kawbayni wən nan pay nappet belemɗe mə Ibriɗe, vi gəleɗe na walaŋgəleɗe gugriɗe net mə leviɗeŋgə, haran neti yi aweleŋgit mə Israyelɗe.

³⁴ Dəwəlsən guli an na mapoho net walaŋgəleɗe gugriɗ neti, kawɓapi yi əvələn ɓa, vi haran neti faɗə.

Dəmən sit məssehẽŋɗe

³⁵ An məlmuk tay dit dimneŋge akani, yaŋ awɓap əfaɗ suk ɓa na, kərmagən vani, dəsan molhõyõ awaniɓa məsgəlok zlaŋ, vi dəzgəlgən kiyən amoŋgovoko.

³⁶ Kədapsən dəmən namndan dit iŋkile may də tive nawndəreh ammban ɓa; vaski kədawgeslne sən Maŋgəlva noko, appan məlmuk dəsangən amoŋgovoko.

³⁷ Kədapsən koɓeɗ vi kawrəh iŋkile aket ɓa, kədapsən əzəm vi kawndəreh ammban ɓa.

³⁸ In Yawe Maŋgəlva nokumtə məs dəgilgukum səka dələv na Eziptə vi kapsukum dələv na Kana'an, vi nəsawgən Maŋgəlva nokum.

Tive nawman zəga va an dəsle azet ɗiyi

³⁹ An məlmuk mə Ibriɗ na maŋgovok akkpaŋgək məssahã, yaŋ avəl kiyzən suko, kədappan dəgəɗgən wəza na balam ɓa;

⁴⁰ wasan suk va məgəɗ wəza nawrəh koɓeɗi awaniɓa va məsgəloko; wasan məgəɗ wəza nok hã gap wəzləra na wəzva nawpəl kiyit ɗiyi;

⁴¹ asna, nan dəgilgən sənokda dit kirtin pak kamndan addəv mahəlfa nani; wamndan aka təki net efiŋgiɗni.

⁴² Vi ɗiy en nəgilgit səka dələv na Eziptə na, gewleɗ nawəŋgə; kawvilti va adawvəlaŋ belemɗe ɓa.

⁴³ Kədassok akan kərək ɓa, vaski kədawgeslne sən Maŋgəlva noko.

⁴⁴ Dəwəl sit belemɗe mezeŋgleket dit muguluŋgiti məs kədalbəha, kəlbehningin səvet ɗiy-ɗar məs dəssoŋ kiykum tərwəsliŋki;

⁴⁵ wakəɓap əlbahaŋ səmmbet kirtit məsgəleŋgiɗkum məs dəzzoŋ əssa anokum da, awaniɓa səddəvit hilfiŋgiɗit məs dəssoŋ də gəla anokumda dərɓaga aziyənən suwerit aka dələv nokumə. Wassoŋ sukumən va zəga nawray vokumə

⁴⁶ Məs kədappaŋ nawzəmgəla sit kirtukum vi dərɓogokum na dəssoŋgən ka nawray vet faɗə. Neti, waɗɗaŋ sukumən wəza hã faɗə, milmiŋgiɗkum mə Israyelɗe, ɗəf nanokda adawsan kərək aka məlmən ɓa.

⁴⁷ An molhõyõ awaniɓa məzgəlok nanokda tay dit koɓeɗi, an tay əzban məlmuk dəmna, yaŋ məlmuk avəl zən sən molhõyõ məzgəlokəska, awaniɓa sən ɗəf na mahəlfa na molhõyõ,

⁴⁸ tive tay nawman məlmuk dərɓaga məvələn dayday: taka səmmbet milmiŋgiɗin waɓap əmani;

⁴⁹ An madiyani awaniɓa wətən madiyani waɓap əmani, awaniɓa həlfən na gugo'; awaniɓa ndən sən kiyən an zəga van tay, waman kiyən.

⁵⁰ Addəv askəs na, dəslereŋgən də ɗəf məs dəlbəha, dəŋɗangən wəzva aka walaŋ avəl zən də an nappet belemɗe mə Ibriɗe, dəgəɗgən na koɓeɗ nawvələn dəslaŋgən də əŋɗa na wəzva, gba nawfaɗ sən ɗəf məgəɗ wəza ama wəsɓəta.

⁵¹ An wəzvaɗe nawgap aza wəzləra nappet belemɗe mə Ibriɗe appaŋgək diyɗa'e na, dəmndangən vadaysa net koɓeɗ məs məlbəhən.

⁵² An wəzvaɗe siɗikke dəppaŋ nawgap wəzva nappet belemɗe mə Ibriɗe, waŋɗani, dəfaɗgən ezet wəzveɗe en dəppaŋgə.

⁵³ Ɗəf waɓap wəsan wəzva kpototo ana ɗəf məs dəlbah da va məgəɗ wəza ka koɓeɗi, adawsan akan kərək dorok ɓa.

⁵⁴ An məmani də tive taka səmmbet es ɓa na, wagil na kiyən dit kirtin də wəzva nappet belemɗe mə Ibriɗe.

Intə Daya Maŋgəlva nokum

⁵⁵ Vi mə Israyelɗe na, məɗɗaŋ wəzaŋgə; məɗɗaŋ wəza nawəŋgə, ndəɗaŋ məs nəgilgit səka dələv na Eziptə. Intə, Yawe Maŋgəlva nokum.