Məsdəlveŋge 23 - Bible en Guidar

Pay net wəzləreɗ net mə Israyelɗe Pay naffete

¹ Yawe apel sənək Moyis amna:

² «Apel sit mə Israyelɗe; anah sit na: wəzləreɗ na pay na Yawe na, ndəɗaŋgə məs kədawyaŋ əkkal salala dəpaska. Əkkalɗe na pay an nalma də in yeŋki:

³ Ɗəf waɗɗa wəza nan pay sləre, ya pay mabuhulon na, pay naffet net ɗiy na Maŋgəlva, pay naffeti yi də əkkal salala, pay an məs kəɗɗaŋ na wəza kpak ɓa: pay naffet Yawe aɗiyə, a təki kəssoŋ də gəla pakə.

⁴ Eŋkiŋ wəzləreɗ meɓɓet na pay na Yawe, wəkkal salala məs kədawyaŋ də pay nan ta'ə.

Pak gəm wəzləra net peŋɗe məza wuɗo ɓa

⁵ Əvoŋ makəlaw kiyən poɗon na təla maddaabəŋ, də pay priŋpriŋ na, wəzləra na Pak na Yawe yi.

⁶ Pay makəlaw kiyən sle'en na təla vani, pay na wəzləra net peŋɗe məza wuɗo ɓa sən Yawe yi. Addəv pay buhul na, peŋ məza wuɗo ɓa kədawzəmaŋgə;

⁷ əvoŋ maddaabəŋ na, kəyaŋgən əkkal salala; wəza tay kədaɗɗaŋ dəpas ɓa.

⁸ Pay temtem buhuləs pak kəkiyaŋgən way məzlan kurmbuɗuk sən Yawe; pay mabuhulon na, əkkal na mahenziŋ dəgəɗgəni; wəza tatwãh tay kədaɗɗaŋ dəpas kpak ɓa.»

Wəzləra nawtəŋ əɗi maŋgaŋva

⁹ Yawe apel sənək Moyis amna:

¹⁰ «Apel sit mə Israyelɗe; anah sit na: An kətoŋgoŋgək aka dələv məs nəpsukum, an kəbəlaŋka, kəkinəngən maŋgav maddaabəŋ na əbəl nokum də hay akani sən məsdəlva;

¹¹ vit mazayən, pay naffet Yawe aɗi na, məsdələv dəzokongən maŋgav də hay akan van aba Yawe vi dətafkumgəni.

¹² Pay kədapsənən maŋgav van na, kəɗɗaŋgən əvəl nawzla kurmbuɗuk dət ndargayãk na wəzva taka məza heslepe azat ɓa sən Yawe,

¹³ sap də əvəl də gəpa kukuɗ kilo sləre məllaɓən də mẽlẽ aski yi way məzlan kurmbuɗuk sən Yawe, tursan naffeten makrani, gəm mbazla nawpesl litər taka də wəɗak nani.

¹⁴ Kədawzəmaŋ peŋ ɓa, hay məpsan ɓa, awaniɓa hay meleketen tak pay məɗiyən nawki əvəl də maŋgav də hay akan sən Maŋgəlva nokum ɓaɓa. Aski mahenziŋ məs akkpaŋ na azokum ɓa va saykum adawsan pakə, a təki kədassoŋ də gəla pakə.

Wəsləra na dəgəla

¹⁵ Kəŋɗaŋgən lumu taka təl buhul gərakə, təŋ səza zaya na pay naffete, va wənah na, təŋ səza pay kəkiyaŋ seser nawzokoni; adawzlẽh səddəv pay buhul təl buhuləŋ ɓa.

¹⁶ Hã gap aza zaya na pay naffet mabuhulon na, kəŋɗaŋgən əvoŋ kaklaw sle' asna kəpsənəngən əvəl na zəga na mabardaw meleketen sən Yawe.

¹⁷ A təki kəssoŋ pak na, kəkiyaŋgən way sula mədet də gəpa məhə̃sən kilo hoku nawzoket sənokumda: Eskiŋ zəgeɗ en dəsɓaŋ daabəŋ sən Yawe.

¹⁸ Mbəksa peŋ na, kəpsənəngən ndergeyẽɗ na wəzva taka taka buhul məza heslepe azet ɓa, medgeɗge taka, gəm ndergeyẽɗ sula, kətawningən wəlet ka əvəl nawzla kurmbuɗuk sən Yawe; də əvəl na zəga na mabardaw neti gəm mbazla nawpesl neti, way məhhətni, tursan naffeten makra Yawe yi.

¹⁹ Də porsok taka na, kəzaɓəngən-Maŋgəlva navvuyon mambraya; dit ndergeyẽɗ sula na wəzva taka taka, əzaɓ-Maŋgəlva nawrəh zazaya;

²⁰ Məsdələv dərbetigin də əzoket aba Yawe, ndergeyẽɗ sula aka ma taka də peŋ na hay məs dəsəɓ daabəŋ. Zəgeɗ en salala sən Yawe wassoŋ ka na məsdəlva.

²¹ Pay an dəpas na, kəyengin ɗiyi, kəɗɗaŋgən əkkal na mahenziŋ; wəza tatwãh tay kədaɗɗaŋ dəpas ɓa. Va saykum adawsan pak dəsangən mahenziŋ məs addəɗ ɓa a təki kəssoŋ də gəla pakə.

²² Pay kədakkalanən zəga sə guli nokum na, kədakkalanən fefek fefek ɓa, kədaffeken gəlan ɓa, kəppangən sən məssahã gəm molhõyõ. Intə Yawe Maŋgəlva nokum.»

Wəzləra na wəzva meleketeni

²³ Yawe apel sənək Moyisi, amna:

²⁴ «Apel sit mə Israyelɗe na: əvoŋ maddaabəŋ na təla mabuhuloni, pay naffet nokumi yi, pay məs kədaɗɗumo wəni, kədawtibirewən də əkkal salala yi.

²⁵ Wəza tatwãh tay kədaɗɗaŋ kpak ɓa, kəkiyaŋgən way məhhətən sən Yawe.»

Pay metiŋgin navvuyet mambrayɗe

²⁶ Yawe apel sənək Moyisi, amna:

²⁷ «Balsən aska, Əvoŋ kəlaw na təla mabuhulonəska, pay metiŋgin navvuyon mambrayi, kəɗɗaŋgən əkkal salala, kəɗɗaŋgən meme, gəm kəpsənəngən way məhhətən sən Yawe;

²⁸ wəza tatwãh tay kədaɗɗaŋ dəpas kpak ɓa, vi pay metiŋgin navvuyon mambrayi, dəpaski əzəməɗ Maŋgəlva akokum navvuyon mambray aba Yawe Maŋgəlva nokum.

²⁹ Vasna, ɗəf an dəgəɗ meme aka pay vanəs ɓa na, kawgilgini səret ɗiy nani;

³⁰ ya ɗəf an dəgəɗ wəza pay nan pak na, wanəzan səret ɗiy nani.

³¹ Kədaɗɗaŋ wəza kpak ɓa: mahenziŋ məza addəɗ ɓa yi ammba saykum va adawsan pak a təki kədassoŋ də gəla pakə.

³² Pay naffet vikumi yi, pay naffet məs kədaɗɗaŋ meme. Təŋ səza əvoŋ vaytak na təla gap mazayən nan də moskoyo, kərmanəngən pay naffet nani.»

Wəzləra net gizlirkeɗe

³³ Yawe apel sənək Moyisi amna:

³⁴ «Apel sit mə Israyelɗe na: pay kəlaw kiyən sle' na təla mabuhulon na, wəzləra net gizlirkeɗe yi, dədanziyan pay buhul sən Yawe;

³⁵ pay maddaabəŋ, naɗɗa əkkal salala; kədaɗɗaŋ wəza tatwãh kpak ɓa.

³⁶ Addəv pay buhuləs pak na, kəpsənəngən way məhhətən sən Yawe. Əvoŋ madodopoɗo'ən kəkkalaŋgən na mahenziŋ gəm kəpsənəngən way məhhətən sən Yawe: əbayma wəzlərayi; kədaɗɗaŋ wəza tatwãh kpak ɓa.

³⁷ Wəzləreɗ na Yawe en na pay yeŋki, məs kədawyaŋ əkkal salala, kapsən way məhhətən, əvəl nawzla kurmbuɗuku awaniɓa zəgeɗ na mabardaw, əzaɓ-Maŋgəlva nawki zazaya awaniɓa mbazla nawpesle, zəga naɗɗa pak də pay nani,

³⁸ mbəksa pay naffet na Yawe, mbəksa əvəl nokum, mbəksa əsway nokum, mbəksa əvəl nokum də mokrokum papar məs kədapsənən Yawe.

³⁹ Mbəksa asna, əvoŋ kəlaw kiyən sle na təla mabuhuloni, dərɓaga kəkkalən zəga na mabardaw, kəddoŋgən malaka nawɗi ki Yawe addəv pay buhul; pay maddaabəŋ wasan pay naffete, pay madodopoɗo'ən wasan pay naffete;

⁴⁰ pay maddaabəŋ na, kəkayaŋgən uwa net wəleŋɗe lelewɗe avokum, va gogozlo, kəkslohoŋgən kiyvet wəleŋɗe məndəfti, awaniɓa kekelguzlo səllohẽɗi, kənnekenəngən zukum gap pay buhul aba Yawe Maŋgəlva nokum.

⁴¹ Kəddoŋgən malaka vanəs kaɗɗa wəzləra na Yawe, pay buhul addəv wəzva; mahenziŋ as məs addəɗ na ɓa yi ammba saykum pakə: təla mabuhulon na, kəɗɗanəngən wəzləra vanəska.

⁴² Kəssoŋgən addivit gizlirkeɗe pay buhul; wətdələv na Israyel pak na, dəsangən addəv gizlirke.

⁴³ Vi va saykum adawsan pak kəsənəngən na nəɗiyik mə Israyelɗe addəv dələv na Eziptə. Intə Yawe Maŋgəlva nokum.»

⁴⁴ Yaŋ kan Moyis anah sit mə Israyelɗe va mbar adalmaŋ də Yawe pay net wəzləreɗ en na pay di.