Məsdəlveŋge 22 - Bible en Guidar

Əzəm na zəga an məpsən Maŋgəlva

¹ Yawe apel sənək Moyis:

² «Anah sən Aron dit kirtin na, dəziweŋgən ɓa' səza əvəl an salala məs mə Israyelɗe akiyaŋ suwəni, vi adawraygənən iya naw məza heslepe ɓaŋka; intə Yawe.

³ Anah sit na: Va sayit kirtukum adawsani, ɗəf səddəv uwa nokum məs heslepe azan dəzar aza əvəl an salala məs mə Israyelɗe apsənən Yawe, ɗəf nan kawgilgini səbawa. Intə Yawe.

⁴ Ɗəf səddəv uwa na Aron, məskokolo arəmə awaniɓa məvivi na, adawzəm əvəl salala tak məbburni ɓaɓa; vaski yi'e də ɗəf məs dərəŋgən ɗəf məs dəne' aza kigəbaya, may ɗəf an dəzoŋgolə,

⁵ may ɗəf dərəŋgən səmmbet gilew dit timeŋgiɗi məkkpaŋganən ɗəf də heslepe awaniɓa ɗəf məkkpaŋgan ɗəf də heslepe, heslepe zeŋvin awandi pakə.

⁶ Ɗəf an dəkkpaŋ də heslepe də tive vas pak na, wasan də heslepe gap moskoyo gəm adawzəm əvəl an salala tak dəslslay eret iŋkile ɓaɓa;

⁷ an pay abətək ləŋgə, wasan məza heslepe azan ɓa: asna wazəm əvəl na mahenziŋ, vi zəga nawzəm nani yi.

⁸ Adawzəm zəga məmtəni awaniɓa məpeseken ɓa, wakkpaŋgan məs heslepe; intə Yawe.

⁹ Dərmanən an nawɓesəni gəm dəslanən ziti, vi adawslaŋ mambray sən wən na zəga nawzəm net ɓa; an araygənənka, wamtaŋgə; in Yawe tə nakkpeŋget məza heslepe ɓa.

¹⁰ Ɗəf ɗar tay nawzəm zəga na mahenziŋ ɓa; məsgəla də məgəɗ wəza sən məsdələv pak adawzəm zəga na mahenziŋ ɓa;

¹¹ balam an məsdələv albah dəlbəhə də balam an muwan eŋgil pak waɓapaŋ əzəm way nani.

¹² Wətən məsdələv muguluŋgət təɗi ɗəf ɗarə, tədawzəm zəgeɗ salala məgimit səka əvəl net zəgeɗ na matuya ɓa;

¹³ an wətən məsdələv təkkpaŋgək gagəbaya awaniɓa tuɗakək də zələt hara na, an wətət tay ɓa, ya təmilik eŋgil ana afətda va təsat goruk lahəŋka, asna watəɓap əzəm way na afəta, də tive tay aba ɗəf ɗar dəzəmgən ɓa zlaŋ.

¹⁴ An ɗəf dəsən akan ɓa, yaŋ azəm əvəl salala, asna, dəfaɗgən an azəm van sən məsdəlva də əzleɓ taka səddəv əvəl salala an azəm van muɗakan sle' akani.

¹⁵ Adawraygənən əvəl salala net mə Israyelɗe məs adawgəmaŋ sənən Yawe ɓa;

¹⁶ An azəmaŋgək əvəl salala, asna wakrək sitinin mambray məs nawzaɓ-Maŋgəlva navvuyon mambraya, vi intə Yawe məzuɗiyit aka wəza.»

Tive nawel zəgeɗ memeyẽɗ nawzaɓ-Maŋgəlva

¹⁷ Yawe apel senek Moyisi:

¹⁸ «Apel sən Aron, sit kirtini gəm sit mə Israyelɗe pakə; kənah sitgin na: An ɗəf səmmbet mə Israyelɗe awaniɓa molhõyõ dəsan də gəla a Israyel, man aka əki əvəl nawzla kurmbuɗuk va an adawkiyaŋ sənən Yawe ammba an məs man aynə naɗɗa awaniɓa əvəl də makra paparə,

¹⁹ an mokum aka Maŋgəlva dətafkumgəni, məki zəga mamayã mizilni məza heslepe azan ɓa, mərman sə gazlaŋ net wasliɗe, net timeŋgiɗi awaniɓa net gilewi;

²⁰ kədawkiyaŋ zəga mamayã də heslepe azan ɓa, vi kawtafkumi ɓa.

²¹ An ɗəf azaɓək-Maŋgəlva nawrəh zazay sən Yawe vi kaknahan an man aynə naɗɗa, awaniɓa əvəl də makra papar də zəga mamayã mərman səret wasliɗe awaniɓa səret timeŋgiɗ dit gilewi, an man aka kawtafsən na, zəga mamayã van dəsan məza heslepe azan ɓa; heslepe adawsan azan ta'sa ɓa:

²² adawsan zəga məmayã daŋgar ɓa, tələn mərslan ɓa, məs soɓo azan ɓa, məs bargagay azani may mərsla azani ɓa. Kədawɗiyaŋ səretis aka matuya na Yawe kapsən ka way məzlan kurmbuɗuk ɓa.

²³ An təl wasliya, awaniɓa time may hãw tay taka zek, mbərən duɗukko na, wakəɓap əvəl də mokrok paparə, ya an əvəl ammba an kiynan mok naɗɗay yi na, kawtafni ɓa.

²⁴ Kədawkiyaŋ zəga mamayã məs gelen məɗeti, məɓeheti, məgdihti may mətewit kapsən Yawe ɓa; kədaɗɗaŋ vas aka dələv nokum ɓa.

²⁵ Kədawtafaŋ zəgeɗ memeyẽɗ vas səva molhõyõ vi kawkiyit ka zəga nawzəm sən Maŋgəlva nokum ɓa; an dəmbər sitis dəki heslepe aketi, kawtefti yi səvokum ɓa.»

²⁶ Yawe apel sənək Moyis amna:

²⁷ «Wət wasliya, wət time awaniɓa wət hãwã wassoŋ pay buhul aza meti dərɓaga uwa neti; təŋ səza pay madodopoɗon na, kawtefti an məkiyti sən Yawe va əvəl nawzla kurmbuɗuku.

²⁸ Kədawtawaŋ wəla zəga mamayã va wasliya, time awaniɓa hãwã sap də wətən aka pay taka ɓa.

²⁹ An mənokum tat ətawaŋ suwən wəla zəga nawzaɓ-Maŋgəlva nawfet aka Yawe na, məɗɗa də tive moggon nawtafa:

³⁰ dəpas dəpas adawzəmnəni məza əppa zəga ka pumo ɓa. Intə Yawe.

³¹ Kərmanəngən əpel na ənziya an nəɗi naɗɗa, kəɗɗaŋgən wəza dənndən. Intə Yawe.

³² Kədawraygənən iya naw salala ɓa, vi salala nan awaleŋgit mə Israyelɗe; intə Yawe məzəkkpoŋgokum salala.

³³ In məs nəgilgukum səka dələv na Eziptə vi nəsaw sukumgən Maŋgəlva, intə Yawe.»