Məsdəlveŋge 21 - Bible en Guidar

An məzaɓan dəwəl sən wəssa net məsdəlveŋge Ənziya net məsdəlveŋge

¹ Yawe anah sənək Moyis na: «Apel sit məsdəlveŋge kirtin Aron dawnah sit na: Məsdələv adakkpaŋ məs heslepe azan vi əmta na ɗəf nan ɓa,

² an ɗəf nan na gugo: va mani, afəni, wətən mizilin, muguluŋguta, gəm məlməni ɓa ɓa;

³ viyət məlmən ŋgbuɓɓo, an na ɗəf mbərəntə ɓa na, neret ɗiy nantə'e, wakkpaŋ məs heslepe vita.

⁴ Ndən məs dəsan daya na daŋgla nani, adarnokon zən vi kawraygən iya nan ɗar ɓa.

⁵ Məsdəlveŋge adawtawaŋ ɗuŋgul aket ɓa, adawfaɗnən meŋgevet eŋgeme net may əntar gəba zit ɓa.

⁶ Wassoŋ məwelit sən Maŋgəlva neti, adawraygənən iya na Maŋgəlva net ɓa; adan ndəɗaŋ dədawkinən way məhhətən sən Yawe, əzəm na Maŋgəlva neti, dəssoŋgən salala.

⁷ Adawgəmaŋ ɗak məku a gisbe may məraygət səŋgil ɓa; adawgəmaŋ ɗak məs tuɗak də zələt appat ɓa; vi sən Maŋgəlva məwel məsdəlva.

⁸ Kəɗigən ka ɗəf salala, vi ndən dədawka zəga nawzəm sən Maŋgəlva noko; məza heslepe ɓa kədawlani, vi ndəni dədawki way sən Maŋgəlva noko; dəsangən salala azoko, vi salala nan in Yawe məzəkkpaŋgokum salalaŋka.

⁹ An wətən məsdələv təraygənək zət də əku a gizbe, afət təraygəni, kawzləti akoffo.

¹⁰ Dəwəlsən daya net məsdəlveŋge, ndən məs dəsan daya neret milmiŋgiɗin, məs məpesl mẽl na mahenziŋ akan, məs məɗiyən aka wəza vi kawgul lukutɗe, adappan kiyən nzoryokko may əŋgeret lukutɗe nan ɓa.

¹¹ Kigəbay tay adaddan azan ɓa, ka ndən karəh heslepe ɓa, dəsan na afəni may nat man zlaŋ.

¹² Adawgilyen səddəv gəla na Maŋgəlva ɓa, vi adawraygən gəla na Maŋgəlva nan ɓa, vi məwelni də əpeslin də mẽl na Maŋgəlva nani. Intə Yawe.

¹³ Dəgəmgən waŋ ŋgbuɓo ka goni.

¹⁴ Adawgəm gagəbay ɓa, guluk məs tuɗak də zələt ɓa, gulut məs təraygən zət də əku a gisbe ɓa; dərəŋ na dəgəmgən waŋ goruk səddəv mahəlfa nani.

¹⁵ Vasna araygən na mahəlfa net ɗiy nan də uwa nan ɓa. Vi in Yawe nəɗiya.»

An nawtak wəza na məsdəlva

¹⁶ Yawe apel sənək Moyisi:

¹⁷ «apel sən Aron na: va sayit kirtuk adawsan pak, an tay də zən kpik ɓa na, adadder əpsən zəga nawzəm sən Maŋgəlva nan ɓa.

¹⁸ Vasna, an ɗəf tay kpik ɓa na, adawzar azan ɓa: va daŋgarə, awaniɓa vədal, ɗəf məs məŋkənən məndapən awaniɓa ɗəf an ziw nan tay təstəs ɓa, awaniɓa ɗəf məs van may tələn walwal,

¹⁹ ɗəf məs tələn awaniɓa van aŋgəslə,

²⁰ məs seŋkeni awaniɓa mənzakalyã'ən, ɗəf məs haran forro, ɗəf məs kurtiya, məs mərsla azani, awaniɓa ɗəf məs mərgani.

²¹ Uwa na məsdələv Aron naddəv tay dədazzan əki way məhhətən sən Yawe ɓa; adan kpiki ɓa, adawki əzəm sən Maŋgəlva nan ɓa.

²² Waɓap əzəm zəga nawzəm na Maŋgəlva nani, an salala diyɗa gəm an salala.

²³ Ya kan na adadder hã gap aza məzlzlara ɓa, awaniɓa aza təki nawzaɓ-Maŋgəlva ɓa, vi tay dəmbər azani, vi adawraygən gəla naw də zəga naddəvən ɓa, vi intə Yawe məzəkkpeŋget salala.»

²⁴ Vaski Moyis apel sən Aron, sit kirtini gəm sit mə Israyelɗe pakə.