Məsdəlveŋge 20 - Bible en Guidar

Əzba məs mətakni

¹ Yawe apel sənək Moyisi:

² «Kənah sitgin mə Israyelɗe na: Ɗəfa, ɗəf sə weleŋgit mə Israyelɗe awaniɓa molhõyõ dəsan a Israyel, an agəmək taka səret kirtin apsən Molek, kawbayni yi: ɗiy naka dəlvəs dəskanəngən dit gərmeŋge;

³ Naw na, wanəkkpaŋ aka ɗəfəska, wanəgilgin səret ɗiy nani adan agəm səret kirtin apsən sən Molek vi kawraygən gəla salala nawa may karnokon iya salala nawa.

⁴ Ya an ɗiy nadak vet atipinik heret dəbayən ɗəfəs dədapsən taka səret kirtin sən Molek ɓa,

⁵ in sən kiyu wanəkkpaŋ aka ɗəfəska gəm aka mahəlfa nani, wanərsle səret ɗiy neti, ndəni dit ɗiy nammban məs dəɗɗaŋ polkoyo əzban Molek.

⁶ Ɗəf an dəku dəska heligi, wanəkkpaŋ akan, wanərsla səret ɗiy nani.

⁷ Məbbur heslepe səzokum kəssoŋgən salala vi intə Yawe Maŋgəlva nokum.

Əsap dət guluk məs mətakən

⁸ Mərme mahenziŋɗe nawa, məgəɗ wəza dənɗaŋ. Intə Yawe məzubbur heslepe nokum.

⁹ Vasna, an ɗəf aranək afəni awaniɓa mani, kawbayni; aranək afən dət mani mbel nan wamndoŋ akani.

¹⁰ An ɗəf akuwək dət ga meggeni, kawbeyti sulegiti, ɗəf məs dəkuwə dəndət guluk məs təkuwə.

¹¹ An ɗəf avoŋgətək ga afəni, awlak gabba afəni; kawbeyti sulegit pakə, mbel net wamndoŋ aketi.

¹² An ɗəf avoŋgətək ga wətəni, kawbeyti sulegit pakə; an aɗɗaŋgəs polkoyo mbərayni, mbel net wamndoŋ aketi.

¹³ An ɗəf avoŋgək də ɗəf mizilin va adawvoŋgoŋ dət gulku, an aɗɗaŋ sulegit pak daryawi; kawbeyti, mbel net wamndoŋ aketi.

¹⁴ An ɗəf asapatək waŋkə dət mata ka gil nani, wərba wiliyi; kawzleti də offo, ndəni gəm gil veti; vi ula gəbayəs adawsan a walaŋkum ɓa.

¹⁵ An ɗəf avoŋgək də zəga mamayã, kəbayingən ɗəf vani də zəga mamayã vani.

¹⁶ An guluk təzarək aza zəga mamayã kawvoŋ dəndəni, kəbayətgən guluk vatə gəm zəga mamayã vani; kawbeyti, mbel net aket adamndoŋgə.

¹⁷ An ɗəf agəmtək məlmən ka goni, məlmən na afəni awaniɓa nat mani, yas awla gabbata, nat tam tula nani, as zəga na zeŋgile yi; kawgilgiti səweleŋgit ɗiy neti ameheret ɗiyi net pak, vi awla gabbat məlməni, mambray nan akani yi.

¹⁸ An ɗəf avoŋgətək guluk pay də koɗo, awlak gabbata akolək met mbel nata, ndət sən kiyət tulek mbel nat dəvatdəvata, sulegit pak kawgilgiti səret ɗiy neti.

¹⁹ Kədawla gabbat mamsawoko awaniɓa gabbat mamndayok ɓa; vi atoruk zəga səmmbat ɗak məs mbelit taka, waslanən mambray net sulegiti.

²⁰ An ɗəf avoŋgətək ga madiyani, awlak gabba madiyani; sulegit pak waslanən mambray neti, wamtaŋ məza kirin ɓa.

²¹ An ɗəf agəmtək ga məlmən ka guluk nani, as ərayi; gabba məlmən awələ, wassoŋ ndarzlayɗe.

²² Mərme mahenziŋɗe naw dit tiveɗnanziya naw pakə, məgəɗ wəza dənɗaŋ, vi dələv nədawtoŋgukum addəvən kəssoŋgən akanəŋ adaptekkum ɓa.

²³ Kədazbanən mahenziŋ net kirtindələv məs nədaɓɓah səbokumiŋ ɓa; vi aɗɗaŋ wəza dəndit as paki nəzele.

²⁴ Nənah sukumək na: Dələv net ambra vokumiyi, Intə nədapsukum ka nokum, Dələv məs moŋvo də amama asan addəvən diyɗa! Intə Yawe Maŋgəlva nokum, məs duwelkum səret ɗiyi.

²⁵ Əmpa na, muɗeket zəgeɗ memeyẽɗ məza heslepe tay azet ɓa dit en də heslepe ezeti, gəm biŋgeɗ məza heslepe ezet ɓa dit en məs heslepe ezeti, vi kədawraygənən zukum dit zəgeɗ memeyẽɗis dit biŋgeɗis ɓa, may zəga mədaw də gədəvən aka dəlvafuŋ məs nuɗeket sukum nənah sukum na də heslepeŋgəŋ ɓa.

²⁶ Məssoŋ su məza heslepe ɓa vi məza heslepe ɓa nanə, in Yawe nəwelkum səweleŋgit ɗiy vi kəssoŋgən ka nawa.

²⁷ An ɗəfa awaniɓa gulku appanək kizən sit heligi, kawbeyti; kasketi dit gərmeŋge, mbel net wamndoŋ aketi.»