Məsdəlveŋge 19 - Bible en Guidar

Mbar Maŋgəlva aŋgəl wəgəɗ sən wəza di

¹ Yawe apel sənək Moyis amna:

² Apelsən sap net mə Israyelɗe; anah sit na: Məssoŋ salala, vi in Yawe Maŋgəlva nokum salala nani.

³ Naway suwalaŋkum pak dəgeslne sət man də afəni, gəm dəɓe'sən payɗe naffet nawa. Intə Yawe, Maŋgəlva nokum.

⁴ Kədakkpaŋgaŋ kəlazet meŋgilveɗ ɗar məɗɗet na təbəz məhəsən ɓa. Intə Yawe, Maŋgəlva nokum.

⁵ An munokum tat əzaɓ-Maŋgəlva nawrəh zazay səva Yawe, məɗɗa də tiven vi nətafkumgəni:

⁶ əzaɓ-Maŋgəlva van dəpas dəpas adawzəməni gəm vit pumpum nani; an dəpəl hã pay mohoko'ən na kawzlani;

⁷ an ɗəf azəmək aka pay mohoko'ən, as slu məs dərayi, kawtafni ɓa;

⁸ ɗəf an dəzəma, aslanək mambraya, vi araygənək zəga məpsən Yawe; kawgilgini ɗəf nan səret ɗiy nani.

⁹ An mənokum tat əpet aka dələv nokumə, kədawpet guli nok hã gərak ɓa, an naffek agəla əpet na kədaffekin ɓa;

¹⁰ kədaɓɓut mokkoy na megezlembirke nok gərak ɓa, uwa nan an diyo' afuŋ na, kədakman ɓa; kətoŋgən kiyən kəppangən sən məssahã gəm sən molhõyõ. Intə Yawe, Maŋgəlva nokum.

¹¹ Kədawhalaŋ ɓa, kədawaŋ wən ɓa, ɗəf adawbəɗan meggen ɓa.

¹² Kədaswayaŋ də uwawən də iya naw ɓa; vasna wakəraygən iya na Maŋgəlva noko. Intə Yawe.

¹³ Kədappət meggok ɓa, kədawhalən ɓa; əfaɗ na məgəɗ wəza adawsan a vok gap pummo ɓa;

¹⁴ kədawran goryom ɓa, kədawɗi zəga aba daŋgar ɓa; vaski kədawgeslne sən Maŋgəlva nok in Yawe.

¹⁵ Kədataw wən də vurum ɓa: kədabbah sən ɗəf məssahã gəm ɗəf gagdak ɓa, ataw wən aka məlmuk təstəsə;

¹⁶ kədawraygən iya na məlmuk ɓa, kədataw wən nawbay məlmuk ɓa. Intə Yawe.

¹⁷ Kədawzel məlmuk ɓa, kədaɗɗa sosokko dazgasən ɓa vi mbərayən an agəɗ adakkpaŋ akok ɓa;

¹⁸ kədamndagan mbərayən də mbərayən ɓa, kədarma wən na məlmuk a mokrok ɓa: kəŋgluwgən meggok va kəŋglu ki zuko. Intə Yawe.

¹⁹ Məɓesən mahenziŋɗe nawa: kədarka'git zəgeɗ memeyẽɗ zeŋvit temtem ɓa; kədaslga zeŋve temtem sula addəv guli taka ɓa; kədawgul lukut na gabaga məslahan məhon də gaɗmay temtem ɓa.

²⁰ An ɗəf avoŋgətək balamək məbasa na ɗəfa, ya məpəlni kiyət ɓa, ɗəf nan dəfaɗgən va mahenziŋ aɗi wən nani; kawbeyti ɓa vi məpəlni kiyit ɓa;

²¹ ɗəf van dəkigən ndargayã ama gizlirke nalma də Maŋgəlva sən Yawe kawzaɓ-Maŋgəlva nawzaɓan mambraya;

²² an məsdələv aɗɗak mahenziŋ navvuyon mambray məs ɗəf van agəɗ aba Yawe aka time nawzaɓan mambraya, asna mambray nan wavvuyu.

²³ An kətoŋgoŋgək aka dələv məs nəpsukumə, an kəmpaŋgək wəlaŋga məzuwa awan di pakə, kulanəngən uwa nan va zəga məs heslepe addəv əzva hoku; kədawzəmnən ɓa;

²⁴ əzva mapoɗo'ən, uwa nan pak kepsini sən Yawe addəv əzləra nawgagdakani;

²⁵ əzva masle'eni, kəzəməngəni; vaski zəga nawrəh na mabardaw nokum adawmbat abe abe. Intə Yawe Maŋgəlva nokum.

²⁶ Kədawzəmaŋ a təki məzi mbel ɓa; kədaɗɗaŋ tetele ɓa, kədaskaŋ helig ɓa;

²⁷ kədarslanən mamba kikum gədulək ɓa, kədawfaɗnən meŋgevet eŋgemekum ɓa;

²⁸ kədantaranən zukum vi karban na a gəlabay kənanaŋgə ɓa, kədaɗɗan gawla aza gəba zukum də əntarən ɓa. Intə Yawe.

²⁹ Kədawraygət wətuk də əppat əɗɗa əku a gizbe ɓa vi dələv wakkpaŋ məgəɗ əku a gizbe gəm wakna dit ɗiy məɗɗaŋ ɗarɗarə;

³⁰ mərma pay naffet nawa, məɗi kigəla nawa. Intə Yawe.

³¹ Kədaskaŋ helig ɓa; kədawkeyetin ɓa; vi wakkpagokum də heslepe. Kədoŋ adak ɓa, vi wakkpaŋgokum məs heslepe. Intə Yawe Maŋgəlva nokum.

³² Asil aba ɗəf ki babara, aɓe' sən mazza; vaski kədawgeslne' sən Maŋgəlva noko intə Yawe.

³³ An molhõyõ adek əsan də is aka dələv anokumda, kədappətnən ɓa;

³⁴ molhõyõ vanəska kulanəngən va wətdəlva, va taka na walaŋkum; kəŋgluwgən va kəŋglu kizuko; vi nokum van kəssoŋgək mohoyẽɗ aka dələv na Eziptə. Intə Yawe Maŋgəlva nokum.

³⁵ Kədaɗɗaŋ vərəm addəv əsla zəga ɓa: zezek na zəga, gagdak nani may gədəvən;

³⁶ vərəm adawsan aza məsləgagdak na zəga nokum ɓa, mətəma nawsla zəga, marga gəm gufo nawsla mẽlẽ, dəssoŋ təstəsə. Intə Yawe Maŋgəlva nokum məs dəgilgukum səka dələv na Eziptə.

³⁷ Məzbet mahenziŋɗe naw dit tiveɗnanziya naw temtem pakə, Məgəɗ wəza dənɗaŋ. Məgəɗ wəza dənɗaŋ. Intə Yawe.