Məsdəlveŋge 18 - Bible en Guidar

Əɗi ki əsap dət ma gəla noko

¹ Yawe apel sənək Moyis amna:

² Apel sit mə Israyel anah sit na; intə Yawe Maŋgəlva nokumu.

³ Kədaɗɗanən an dədaɗɗa aka dələv na Eziptə ɓa, a təki məs kəssoŋ də gəla lahəŋ ɓa; kədaɗɗanən an dədaɗɗa aka dələv na Kana'an ɓa, a təki nedawtoŋgukum ɓa; kədazbanən mahenziŋ net ɓa;

⁴ məzban tivenanziya nawa gəm məzək sləma aka izbet mahenziŋɗe nawa. Intə Yawe Maŋgəlva nokumu.

⁵ Məɓesən mahenziŋ nawa gəm wəyak naw pakə: də əɗɗa wəza dənɗaŋgi yi ɗəf adawsan madarani. Intə Yawe.

⁶ Ɗəfa, ɗəf səmmbokum adawvoŋgət həlfən ɓa. Intə Yawe.

⁷ Kədawsən gabba afuk ɓa, kədawsən gabbat mok ɓa; adan moktə kədawsən gabbat ɓa.

⁸ Kədawsən gabbat ga afuk ɓa; gabba afuki kpakə.

⁹ Kədawsən gabbat məlmuk ɓa, təsat məlmuk na afuko awaniɓa nat moko, təsat muwa eŋgil anokum da awaniɓa muwa appaka kədawsən gabbat ɓa.

¹⁰ Kədawsən gabbat wətən wətuk ɓa may gabbat wətət wətuk ɓa, gobbok anoki yi.

¹¹ Kədawsən gabbat wətət ga afuk wətən afuk ɓa; məlmuktə.

¹² Kədawsən gabbat mamndayok ɓa; mbelit takahəŋ də afuko.

¹³ Kədawsən gabbat mamsawok ɓa; vi mbelit takahəŋ dət moko.

¹⁴ Kədawsən gabba maddiyok də əddər azat ɗak nan kawvoŋ dəndət ɓa, mamndayoktə.

¹⁵ Kədawsən gabbat atuk ɓa; vi ga wətuktə, kədawsən gabbat ɓa.

¹⁶ Kədawsən gabbat ga məlmuk ɓa; gabba məlmuki yi.

¹⁷ Kədawsən gabbat guluk gəm nat wətət ɓa; kədawsən gabbat wətən wətət ɓa, gabbat wətət wətət ɓa; mbelit takahəŋ; aska zəga net wili yi.

¹⁸ Kədawɗiyət mesuk ɓa, wasilgin wəgay an ɗak nok tat madarata.

¹⁹ Kədawsap dət ɗak an tat dit mbel ɓa, vi salalatə ɓa.

²⁰ Kədawvoŋgət ga ɗəf ɓa, wakkpoŋgok məs heslepe.

²¹ Kədapsən wutuk vi kawzlan sən Molek ɓa, kədawraygən iya na Maŋgəlva nok ɓa. Intə Yawe.

²² Kədawvoŋ də ɗəf mizilin va dət guluk ɓa; wən daryawi.

²³ Kədawvoŋ də zəga mamayã ɓa, wakkpaŋgok məs heslepe; guluk tədappan zət sən zəga mamayã dəsapgən dəndət ɓa, əmzlah mbərayni yi.

²⁴ Kədakkpaŋgaŋ məs heslepe də əzban ədaw zev eskis ɓa; vi sən ədaw zev aski kirtindələv nədarɓah səbokum assoŋ də heslepe.

²⁵ Ədaw net akkpaŋganək dələv net də heslepe, vini nətaw wən aka mambray nani; yas dələv van eptek ɗiy veti.

²⁶ Nokumu, məɓesən mahenziŋ naw də wəyak nawa, kədaɗɗaŋ wəza də taka na ədaw daryaw zeŋvit eskis ɓa, wətdələv də molhõyõ məs dəsan də gəla awalaŋkum pakə;

²⁷ ɗiy en dəssoŋ daabəŋ kikum pak aɗɗetinik ədawɗe daryawɗes pakə, ndəni dələv akkpaŋ də heslepe.

²⁸ Vasna dələv aptekkum na ɓa va aptek kirtindələv en dəssoŋ daabəŋ kikum, məs dəkkpaŋganən də heslepe.

²⁹ Ya ɗəf awan di məs dədadaw daryaw pak kawgilgini səret ɗiy nani.

³⁰ Məɓesən mahenziŋ nawa, kədaɗɗaŋ wəza dit mahenziŋɗe mbəreyit va net ɗiy en dəssoŋ daabəŋ kikum aka dəlvəŋ ɓa, ya kədakkpaŋgaŋ məs heslepe də ədaw zeŋvit es ɓa. Intə Yawe, Maŋgəlva nokum.