Məsdəlveŋge 17 - Bible en Guidar

Mahenziŋ aka ənziya salala gəm əgagdakan Maŋgəlva ( 17:1—27:34 ) Mahenziŋ aket mbeli

¹ Yawe apel sənək Moyis amna:

² Apel sən Aron, sit kirtini gəm sit mə Israyelɗe pakə; anah sit na: Aŋki məs Yawe aɗi wən nan də wənəh na:

³ «An ɗəf səmmbet Israyelɗe atawək wəla wasliya, wəla time awaniɓa wəla hãw a dibirgidik awaniɓa a mapoho na dibirgidiki

⁴ məza əkan a ma gizlirke nalma də Maŋgəlva kawvəl sən Yawe aba təki nawzaɓ-Maŋgəlva məs Yawe asan ɓa, agəɗək mambraya vi aggbo'ik mbel məza aka təlni ɓa, ɗəf nani kawgilgini səwaleŋgit Israyelɗe.

⁵ Vasna mə Israyelɗe dəkeningin zəgeɗ memeyẽɗ məs adawtawaŋ wəlet a muyã; dəkesiningin sən məsdələv ma gizlirke nalma də Maŋgəlva sən Yawe; dətawəŋgən wəlet sən Yawe ka əzaɓ-Maŋgəlva nawslere;

⁶ məsdələv dəksu'gən mbel vet aka təki nawzaɓ-Maŋgəlva na Yawe a ma gizlirke nalma də Maŋgəlva gəm dəzlagən səlhã ka dəffokgən nek aka Yawe;

⁷ vasna azaɓaŋ-Maŋgəlva sit zeŋvit porsokɗes məs adawgakdaketin də əɗɗa matuya na polkoyoŋ ɓa. Mahenziŋ aska, wasan faɗ viti addəɗ na ɓa.»

⁸ Kənah sitgin əmpa na: Ɗəfa, ɗəf səmmbet Israyelɗe awaniɓa səmmbet molhõyẽɗ dəsan awalaŋkumu, məs dəzaɓ-Maŋgəlva də əvəl nawzla kurmbuɗuku awaniɓa əzaɓ-Maŋgəlva

⁹ məza əkan a ma gizlirke nalma də Maŋgəlva vi dəsangən ka əzaɓ-Maŋgəlva sən Yawe ɓa, ɗəf nani kawgilgini səweleŋgit ɗiy nani.

¹⁰ Ɗəfa, ɗəf səmmbet Israyelɗe awaniɓa molhõyẽɗ dəsson aweleŋti, an azəmək mbeli, ədagədəv naw wasan aka afən nan dəzəm mbeli, kawgilgin səra mahəlfa nani;

¹¹ vi zeŋgile na zəga pak aret mbel yi, ya naw nəpsukumuk tive kəɗɗeningin aka təki nawzaɓ-Maŋgəlva vi kərahaŋgən əvvuyon mambray nokumu. Vi mbəl awkiyaŋ əvvuy mambraya.

¹² Vini nənah sit mə Israyelɗe na: Ɗəf səmmbokum adawzəm mbel ɓa, molhõyõ dəsan awalaŋkum adawzəm mbel ɓa.

¹³ Ɗəfa, ɗəf səmmbet mə Israyelɗe awaniɓa molhõyẽɗ dəsan awaleŋti, ambatək hellekki, an arəmək slu nawra awaniɓa bəŋga məs nawzəma, asna dəggbogin mbelin afuŋ dəndəkgən kiyit də burɗuku;

¹⁴ vi zəŋgile zəga məs də gəɓa zən pak mbəl nanəŋ aka tay madarani, vini nənah sit mə Israyelɗe na kədawzəmaŋ mbel ɓa, vi zeŋgile zəga məs gəɓa zən pak mbel nanəŋ; ɗəf an dəzəm mbeli kawgilgini səret ɗiy nani.

¹⁵ Ɗəf awan di pak səmmbet kirtindəlva awaniɓa molhõyõ, dəzəm zəga məmtəni awaniɓa məpesekeni dəskoɓgin lukutɗe nani, dəslslaygən aret iŋkile, wasan də heslepe gap moskoyo; asna wasan salala.

¹⁶ An dəskoɓ lukutɗe nan ɓa, dəslslay aret iŋkile ɓa, asna wən na mambray nan akani yi.