Məsdəlveŋge 16 - Bible en Guidar

Pay navvuyon mambraya ( 16:1-34 )

¹ Yawe apel sənək Moyis dərɓaga əmta net kirtin Aron sula gala adawzaraŋ aba Yawe.

² Yawe anah sənək Moyisi: Anah sən Aron məlmuk na adawtoŋ addəv gəla na Maŋgəlva balsən məzlzlara aba ma akoti ɗarɗar ɓa, vasna, an nəgilik aka ma akoti addivit enene, amtə na ɓa.

³ Zəga an Aron adawgəm vi kawtoŋ addəv gəla na Maŋgəlva yaŋka: Medgeɗge taka ka matuya vi mambraya gəm ndargayã taka ka matuya nawzla kurmbuɗuku;

⁴ dəslslaygən tagay asna dəgulgən lukutɗe naɗɗa matuya va wənah na: lukutu, bente ammbani, maslapa addakən gəm gabaga mətəvəɗən aka kiyəni, pakgit məɗɗeɗ na helege na ngərayã;

⁵ əsap net mə Israyelɗe, dəpsəngən porsokɗe sula nawzaɓ-Maŋgəlva navvuyon mambraya gəm ndargayã taka ammba əvəl nawzla kurmbuɗuku.

⁶ Aron dəzaɓgən-Maŋgəlva vi mbərayən nan də medgeɗge, dəzaɓgən-Maŋgəlva navvuyon mambray aka zək nan gəm aka gəla nani.

⁷ Dəgimgin porsokɗe sula neki, dəziwgitigin aba Yawe ama gizlirke nalma də Maŋgəlva.

⁸ Aron dəgəɗgən vẽpəlwa aket porsokɗe sula neki vẽpəlwa taka vi kawsən an na Yawe gəm kawsən an na Azazel.

⁹ Aron dərbangən porsok məs vẽpəlwa abət akan vi Yawe, dəzaɓgən-Maŋgəlva vi mambraya.

¹⁰ Porsok məwelin sən Azazel, kawziwgin madaran aba Yawe vi kaɗɗa matuya navvuyon mambray akan də wərɓahən sən Azazel awra.

¹¹ Aron dəzaɓgən-Maŋgəlva də medgeɗge vi mambray nani, gəm dəzaɓgən-Maŋgəlva navvuyon mambray nan gəm na gəla nani,

¹² dəndəgən slay offo nziliwnziliwi də kasliy səka təki nawzaɓ-Maŋgəlva naba Yawe naka gəm tursan nawzla mətakaɗən va ɗəf zloŋzloŋ sula, dəkegin balsən məzlzlara.

¹³ Dəzigən tursan akoffo naba Yawe, enene na tursan dəsoŋgən kalmakalma aka ma akoti naka miziwe. Vasna amtəna ɓa.

¹⁴ Dətefgin mbel na medgeɗge, dəksu'gin də pərəm van aka ma akoti dəka təkzləmən nammba pay nampum; gəm əmpa dəksu'gin mbel vet təl buhul də pərəm van aba ma akoti.

¹⁵ Dətawgən wəla porsok na matuya vi mambray net ɗiyi, dəkigən mbel nan balsən məzlzlara; va agəɗ də mbel na medgeɗge vas adaɗɗa də an na porsok: dəksu'gin aka ma akoti gəm aba ma akoti.

¹⁶ Dəɗɗagən matuya navvuyon mambray na əɓoŋ net mə Israyelɗe addəv gəla salala, va ənahən na mambray net pakə; vas adaɗɗan addəv gizlirke nalma də Maŋgəlva məs dəsan awalaŋ mambray neti.

¹⁷ Pay adawtoŋ addəv gəla salala vi kaɗɗa matuya navvuyon mambraya, ɗəf adassan addəv gizlirke nalma də Maŋgəlva ɓa, gap ndən vit sədaka: dəɗɗagən matuya navvuyon mambray nani, na gəla nani gəm na əsap net mə Israyelɗe.

¹⁸ Dəgilgən kəlaza təki nawzaɓ-Maŋgəlva naba Yawe, dəɗɗagən matuya navvuyon mambray aka zək nani; dəgimgin mbel na medgeɗge gəm na porsok dəɗigin aket mohoŋɗe na təki nawzaɓ-Maŋgəlva təslə.

¹⁹ Dəksu'gin mbel aka təki nawzaɓ-Maŋgəlva də pərəm van təl buhulu, dəpeslgən vi mambray net mə Israyelɗe vi dəkkpaŋgən salala.

²⁰ An agrakək matuya vi kawpesl gəla na Maŋgəlva, vi kawpesl gizlirke nalma də Maŋgəlva, vi kawpesl təki nawzaɓ-Maŋgəlva, dəkigən porsok madarani.

²¹ Aron dəɗigən van aka ki porsok madarani: dərbangən mambray net mə Israyelɗe gəm əɓoŋ net pakə, va wənahən na dəɗigən mambray net pak aka ki porsok; asna ɗəf an nalhan dəɓɓahəgən awra.

²² Porsok dəkagən mambray net pak akan də muyã. An mərɓani a kapta-muyã,

²³ Aron dəlgən addəv gizlirke nalma də Maŋgəlva, dəkgbukgin lukutɗe na helege na ngərayã agul dawtoŋ addəv təki nawzaɓ-Maŋgəlva dəɗigin adaka.

²⁴ Dəslslaygən aret iŋkile a matuya, dəgulgin lukutɗe nan en mbirti, dəgilgəni dəɗɗagən əvəl nawzla kurmbuɗuku gəm net ɗiy; asna dəzaɓgən-Maŋgəlva navvuyon mambray nani gəm net ɗiy;

²⁵ dəzlagən səlhã na zəga mətaw wəlan ammba əzaɓ-Maŋgəlva vi mambray pak aka matuya.

²⁶ Ɗəf dəlhan porsok sən Azazel dəskoɓgin lukutɗe nani gəm dəslslaygən aret iŋkile; asna dəmndangən a dibirgidiki.

²⁷ Kawgilgin Medgeɗge gəm porsok nawzaɓ-Maŋgəlva vi mambray məs məka mbel net addəv təki nawzaɓ-Maŋgəlva vi navvuyon mambray nak a ma poho na dibirgidiki kawzleti, gəba neti, slu neti gəm senseti

²⁸ Ɗəf dəzle, dəskoɓgən lukutɗe nani gəm dəslslaygən aret iŋkile; asna dəmndangən a dibirgidiki.

²⁹ As mahenziŋ məs addəɗ na ɓa vikum yi: aka əvoŋ kəlaw na təla mabuhuloni, kəɗɗaŋgən meme, wəza tay kədaɗɗaŋ kof ɓa, vas adawsan sən wətdəlva də molhõyõ nawalaŋkum pakə.

³⁰ Arbək na aka payəski adawzaɓən-Maŋgəlva navvuyon mambray məs nawpeslkum. Vaski kədassoŋ məslslaykum səza mambray nokum aba Yawe.

³¹ Pay naffet aɗiyəŋ na, pay naffet nokumi yi, pay naɗɗa meme. Mahenziŋ məza addəɗ ɓa yi.

³² Ɗəf an nawzaɓ-Maŋgəlva navvuyon mambraya, məsdələv məɗiyən aka wəza də əppay sən mẽl na mahenziŋgi, ndəni dədaɗɗa wəza na məsdələv agəla afəni. Dəgulgən lukutɗe na helege na ngərayã, lukutɗe naɗɗa matuya;

³³ dəɗɗagən matuya navvuyon mambray vi naɗɗa wəza addəv gəla na Maŋgəlva; vi gizlirke nalma də Maŋgəlva gəm vi matuya; dəɗɗagən aket məsdəlveŋge gəm aket ɗiy en dəkkalaŋ pakə.

³⁴ Wəkkal təl taka ama wəzva nazban matuya navvuyon mambray net mə Israyelɗe pak na, mahenziŋ məza addəɗ ɓa yi. Məɗɗani an Yawe anah sən Moyis.