Məsdəlveŋge 15 - Bible en Guidar

Ɗəf məs ban adayma

¹ Yawe apel sənək Moyis də Aron amna:

² məpel sit mə Israyelɗe; mənah sit na: «An gbəgba na ba ɗəf miyma armaka, ban miyma van heslepe yi.

³ An ban miyma van tazlba afuŋ awaniɓa asuk betemit kine, va asan pakə, ɗəf nan də heslepe yi.

⁴ Vini kan na, zəga nafna na ɗəf məs ban miyma avoŋ akan pak na wasan də heslepe; zəga məs asan akan pak na wasan də heslepe.

⁵ Ɗəf dərəŋgən zəga nafna nan van pakə, dəskoɓgin lukutɗe nani, dəslslaygən aret iŋkile, wasan də heslepe gap moskoyo.

⁶ Ɗəf dəsan aka zəga na ɗəf məs ban adayma asan ɗewsa akani, dəskoɓgin lukutɗe nani, dəslslaygən aret iŋkile, wasan də heslepe gap moskoyo.

⁷ Ɗəf dərəŋgən ɗəf vani, dəskoɓgin lukutɗe nani, dəslslaygən aret iŋkile, wasan də heslepe gap moskoyo.

⁸ An atufuk mifɗe aka ɗəf məs tay də heslepe ɓa, ɗəfəska dəskoɓgin lukutɗe nani, dəzlaygən aret iŋkile, ya wasan də heslepe gap moskoyo.

⁹ Mazaŋga an asan akan ədda malaka pakə, də heslepe yi.

¹⁰ Ɗəf awan pak dərəŋgən zəga səmmba ɗəfəs na, wasan də heslepe gap moskoyo; ɗəf an dəgəma, dəskoɓgin lukutɗe nani, dəslslaygən aret iŋkile, wasan də heslepe gap moskoyo.

¹¹ Ɗəf an ɗəf də gbəgba na əzəlaha ane azan tak dəɗa van ɓa pakə, dəskoɓgin lukutɗe nani, dəzlaygən aret iŋkile, wasan də heslepe gap moskoyo.

¹² Mesteɓe na dələv məs ɗəf ban adayma arəŋgəni, nakrapi yi, an mesteɓe na wəlaŋga yi na kakkõhni aret iŋkile.

¹³ Ya an ambələk səka gbəgba nani, ɗəf van dəgəɗgən lumu taka hã gap pay naslslay nani gəm dəskoɓgin lukutɗe nani; dəslslaygən aret iŋkile miyma, asna wasan salala.

¹⁴ Əvoŋ madodopoɗoni, dəkaygən mukuɗuŋguleɗ sula awaniɓa bəŋgəɗ na maha sula, dəmbatgən ama gizlirke nalma də Maŋgəlva aba Yawe, dipsingin sən məsdəlva.

¹⁵ Məsdələv dəɗɗagən matuya vi mambraya də taka, an dəmbər tamə, əvəl nawzla kurmbuɗuku; məsdələv dəzaɓgən-Maŋgəlva navvuyon mambray na gbəgba nan aba Yawe.

¹⁶ An ɗəf azongolko, dəslaygən aret iŋkile, ya wasan də haramba gap moskoyo;

¹⁷ lukutu may gəba məs əzoŋgol agəɗ azeti, kaskoɓti aret iŋkile, ya wassoŋ də haramba gap moskoyo.

¹⁸ An guluk təsapək də ɗəfa, dəslslayaŋgən aret iŋkile ya wassoŋ də haramba gap moskoyo.

Guluk məs bat adayma

¹⁹ An guluk tat dit koɗɗe, mbel tahəŋ əɗɗaŋ səzata, watəsat də heslepe lumu taka, ɗəf an dərəŋgət pak na wasan də heslepe gap moskoyo.

²⁰ Zəga məs təvoŋ akan pak gala təsat dit koɗɗe na wasan də haramba, zəga an təsat akan pak na wasan də haramba.

²¹ Ɗəf awan dərəŋgən zəga nafna nata, dəskoɓgin lukutɗe nani, dəslslaygən aret iŋkile, wasan də heslepe gap moskoyo.

²² Ɗəf awan dərəŋgən zəga məs təsat akan pak na dəskoɓgin lukutɗe nani, dəslslaygən aret iŋkile, wasan də heslepe gap moskoyo.

²³ An zəga tay aka zəga nafna nata awaniɓa aka zəga an təsata, an ɗəf arəŋgənək na wasan də heslepe gap moskoyo.

²⁴ An ɗəfa, gala adawsap dəndəta, koɗɗe nat azzoŋko, aɗɗaŋgək azani, ɗəf nan wasan də haramba pay buhulu; zəga nafna an avoŋ akan pak na wasan də heslepe.

²⁵ An guluk tədəmək koɗɗe addəv pay diyɗa day ki pay nata awaniɓa net koɗɗe nat azzekeŋke day ki pay nat təstəsə, pay na haramba nan wazzek va pay net koɗɗe nata; də harambatə, va təsat addəv pay net koɗɗe nat təstəsə.

²⁶ Va koɗɗe nat azzekeŋgi, zəga nafna məs təvoŋ akan pak tay va zəga məs təvoŋ aka pay net koɗɗe nata; zəga məs təsat akan pak tay də haramba va adassan də haramba pay net koɗɗe nat təstəse.

²⁷ Ɗəf awan dəriŋgit pak na wakkpaŋ də heslepe; dəskoɓgin lukutɗe nani, dəslslaygən aret iŋkile, wasan də haramba gap moskoyo.

²⁸ An koɗɗe nat akgrakaŋka, təgəɗgən lumu taka, səɓɓan na watəsat salala.

²⁹ Əvoŋ madodopoɗoni, tərəmgən mukuɗuŋguleɗ sula awaniɓa biŋgeɗ na maha sula təkisingin məsdələv ama gizlirke nalma də Maŋgəlva.

³⁰ Məsdələv dəzaɓgən-Maŋgəlva navvuyon mambray də an taka, an mbərən tamə, əvəl nawzla kurmbuɗuku; məsdələv dəɗɗagən matuya navvuyon mambray akat aba Yawe vi mbel məziyma səmmbata.

³¹ Kənah sitingin mə Israyelɗe dətaɗəngən ki zit də əssa a maŋgava an tahəŋ də heslepe azeti; asna amtaŋ na vi heslepe nazet ɓa, va wənah na vi akkpaŋganən gəla naw naweleŋgit də heslepe.»

³² Aski ərba wən aka ɗəf məs ban adayma awaniɓa aka əzongolo, məzəkkpaŋgan məs heslepe,

³³ guluk məs dit koɗɗe, ɗəf mizilin awaniɓa guluk məs gbəgba na əzəlah arəmə gəm ɗəf məs dəvoŋ dəndəta, heslepe yi.