Məsdəlveŋge 14 - Bible en Guidar

Ubbur məskokolo

¹ Yawe apel sənək Moyis amna:

² «Aŋki mahenziŋ naɗɗa pay əbbur na məskokolo: Pay əkiyən aza məsdələv na,

³ məsdələv dəgilgin a mapoho na dibirgidiki, dəsəŋgləkangəni. An kokolo nazan van anzaɗka,

⁴ məsdələv dəɗigən wən nani, vi kabbur ɗəf nani, dəkigən: biŋgeɗ məs dəslaŋ nampər sula medereti, seseme na wəlaŋga ɓəɓəl na Liban, gabaga pepreŋ məzəwiɗ diyɗa gəm gaslamba na isop.

⁵ Məsdələv dəɗigən wən nan kawtaw wəla bəŋga maddaabəŋ aka məsteɓe na dələv məs məmbaɗ iŋkile məzədawaŋ addəvən.

⁶ Dəgəmgən bəŋga məs dəpər madarani, wəlaŋga na wəlaŋga ɓəɓəl na Liban, gabaga pepreŋ məzəwiɗ diyɗa gəm gaslamba na isop; dəyopgin sap də bəŋga madaran nak aret mbel na bəŋga mətaw wəlan aket iŋkile məzədawaŋ neki.

⁷ Dəksu'gin aka ɗəf məskokolo naslslay nak təl buhul; dərbangən na heslepe tay azan ɓa; dəppangən bəŋga an madaran dəveŋgin kəladdesl muyã.

⁸ Ɗəf məbburun nak dəskoɓgin lukutɗe nani, dəfaɗgən deɓeke səzan pakə, dəslslaygən aret iŋkile, vasna wasan salala; siske na dəlgən a dibirgidiki, dəsangən məza ətoŋ a gizlirke nan ɓa pay buhul.

⁹ Əvoŋ mabuhuloni, dəfaɗəgən kini, eŋgemeni gəm ki harani; dəfaɗəgən deɗeke nan pakə; dəskoɓgin lukutɗe nani, dəslslaygən aret iŋkile, vasna wasan məza də heslepe azan ɓa.

¹⁰ Pay madodopoɗoni, dəgəmgən kirtit timeŋgiɗ ndargeyẽɗ sula məza heslepe azet ɓa gəm zagarak na əzva taka məza heslepe ɓa, gəpa kukuɗ kilo hoku, məvorən də mẽl kaɗɗa əvəla, gəm mẽl wəɗak na gufo.

¹¹ Məsdələv məzədawgən matuya naslslay ɗəfa, dəɗigən ɗəf naslslay də əvəl an aki sən Yawe ama gizlirke nalma də Maŋgəlva.

¹² Məsdələv dəgəmətgən ndargayãk maddaabəŋ dərbangən ka matuya nawzaɓan mambraya gəm mẽl wəɗak na gufo dəzokongən aba Yawe.

¹³ Dətawgən wəlat ndargayãk van a təki adatawaŋ wəla zəga na matuya vi mambraya gəm matuya nawzla kurmbuɗuku, a matuya; arbək na matuya nawzaɓan mambray tay va matuya vi mambraya: kana məsdələv adawsani; zəga an salala yi.

¹⁴ Məsdələv dətefgin mbel na zəga nawzaɓ-Maŋgəlva navvuyon mambraya; dəɗisəngən ɗəf naslslay aka metekɗeke na sləman dəzəŋ, aka van mizilin dəzəŋ gəm aka tələn mizilin dəzəŋ.

¹⁵ Məsdələv dəgəmgən wəɗak na gufo na mẽlẽ; dəmə'gən siɗikke aka van zlaɓay,

¹⁶ məsdələv dəgulgən van məttəl ɗəf ara mẽl naka van zlaɓay naka; dəksu'gən mə̃l nak də pərəm van təl buhul aba Yawe.

¹⁷ Mẽl an dəpəl aka vani, məsdələv dəɗisəngən ɗəf naslslay aka metekɗek sləman dəzəŋ, aka van mizilin dəzəŋ gəm aka tələn mizilin, a təki aɗi mbel na matuya nawzaɓan mambraya.

¹⁸ Mẽl an dəpəl aka vani, məsdələv dəppaygən aka ki ɗəf naslslaya; məsdələv dəɗɗagən matuya navvuyon mambray aba Yawe.

¹⁹ Məsdələv dəzaɓgən-Maŋgəlva navvuyon mambraya; dəzaɓgən-Maŋgəlva navvuyon mambray aka ɗəf naslslay vi mambray nani; səɓɓan na dətawgən wəla zəga nawzaɓ-Maŋgəlva nawzla kurmbuɗuku.

²⁰ Məsdələv dəpeŋgitigin aka təki nawzaɓ-Maŋgəlva na əvəl nawzla kurmbuɗuku gəm əvəl na zəga na mabardaw; məsdələv dəzaɓgən-Maŋgəlva navvuyon mambray akani; asna wasan salala.

Ubbur na məskokolo məssahã

²¹ An ɗəf van məssahã yi an van aləm na azet zəgeɗis pak ɓa, dəkigən ndargayãk taka vi matuya nawzaɓan mambray də wəzokon vi kawzaɓ-Maŋgəlva navvuyon mambray akani, gəpa kukuɗ kilo hoku məvorən də mẽlẽ, mẽl wəɗak na gufo ka əvəla

²² gəm mukuɗuŋguleɗ sula awaniɓa biŋgeɗ na maha sula, an van adalma azani; taka ka nawzaɓ-Maŋgəlva vi mambraya, mbərni ka əvəl nawzla kurmbuɗuku.

²³ Dikigin sən məsdələv aka əvoŋ madodopoɗoni, ama gizlirke nalma də Maŋgəlva aba Yawe vi dəslslaygəni.

²⁴ Məsdələv dəgəmətgən ndargayãk na matuya nawzaɓan mambraya gəm mẽl wəɗak na gufo; məsdələv dəzoketgin aba Yawe.

²⁵ Dətawgən wəlat ndargayãk na matuya nawzaɓan mambraya; məsdələv dətefgin mbel na zəga na matuya nawzaɓan mambraya; dəɗisəngən ɗəf naslslay aka metekɗeke na sləman dəzəŋ, aka van mizilin dəzəŋ gəm aka tələn mizilin dəzəŋ.

²⁶ Məsdələv dəmə'gən mẽl siɗikke aka van zlaɓay,

²⁷ məsdələv dəksu'gən mẽl səka van zlaɓay nak təl buhul də van məttəl ɗəf aba Yawe.

²⁸ Məsdələv dəppaygən mẽl naka van sən ɗəf naslslay aza metekɗeke na sləman dəzəŋ, aka van mizilin dəzəŋ gəm aka tələn mizilin dəzəŋ, a təki məs məɗi mbel na zəga na matuya nawzaɓan mambraya.

²⁹ Mẽl an dəpəl ambra vani, məsdələv dəppay səngən ɗəf naslslay aka kini, vi kaɗɗa matuya navvuyon mambray səkan aba Yawe.

³⁰ Waɗɗa də taka səret mukuɗuŋguleɗi awaniɓa kirtit biŋgeɗ na maha, an van aləm azan pakə,

³¹ an van aləm azan pakə, də taka dəzaɓgən-Maŋgəlva navvuyon mambraya, də an mbərni əvəl nawzla kurmbuɗuk ammba əvəla; məsdələv dəzəməɗgən Maŋgəlva navvuyon mambray aka ɗəf naslslay aba Yawe.»

³² Aski dədah naɗɗa an ɗəf tay də gbəgba na kokolo ya aɓap na kawrah zəga va an dəzlə vi kawpeslin ɓa.

Tellef addəv gəla

³³ Yawe apel sənək Moyis gəm Aron amna:

³⁴ «An kətoŋgoŋgək aka dələv na kana'an məs nəpsukum ka nokum na, an nəgilginik tellef na kokolo aza gəla naka dələv nokumu,

³⁵ afən gəla dəlgən ənah sən məsdəlva: In tat ulan na tellef tay addəv gəla nawa.

³⁶ Məsdələv dəɗigən wən na wəgilgitin zəgeɗ səddəv gəla van tak ətoŋ nan addəvni, məsdələv dətoŋgən əsəŋgləkan tellef naddəv gəla; asna zəga naddəv gəla vanəska wasan də heslepe ɓa; səɓɓan kan na məsdələv dətoŋgən vi kawsəŋgləkan gəla vani.

³⁷ Dəsəŋgləkangən tellef vani: an tellef naza gəla van tahəŋ va vov mazakalyãkalyã awaniɓa pəreŋpəreŋgi, an tahəŋ əɗɗa vov aza zə gəla,

³⁸ məsdələv wagil səddəv gəla vani, dəmsangən ma gəla van pay buhul.

³⁹ Məsdələv wamil pay mabuhulon vi kawsəŋgləkani: an tellef van anzləraŋgək aza zə gəla,

⁴⁰ məsdələv dəɗigən wən nan vi dəhokingin gərmeŋge məs tellefi, vi kazget a mapoho na walaŋgəla-metiŋgin aka dagərgiya.

⁴¹ Dərrokgən gədəv gəla van pakə dəgbogən dələv an arrok a mapoho na walaŋgəla-metiŋgin aka dagərgiya.

⁴² Dəndaŋgən gərmeŋge mbirti, dəkiningin a gilet en neki gəm dəndəgən dələv maɓɓan dəkkəɗgən zə gəla vani.

⁴³ An tellef van agəɗək əmpa sədərɓagani, məhok gərmeŋge, mərrok zəni gəm məmsak əkkəɗni,

⁴⁴ asna məsdələv dəlgəni, dəsəŋgləkangən: an tellef awanək zən aza gəla vani, kokolo məs abbur na ɓa yi; gəlaska salala yi ɓa.

⁴⁵ Kakrapni gəla, gərmeŋge pakə, wəleŋɗe gəm zən məkkəɗən, kasakən a mapoho na walaŋgəla-metiŋgin aka dagərgiya na geŋgir.

⁴⁶ Ɗəf dətoŋ addəv gəla van səza məmsani va mahenziŋ aɗi wən nani wasan də heslepe azan gap moskoyo.

⁴⁷ Ɗəf dəvoŋ addəv gəla vani, dəskoɓgin lukutɗe nani, ɗəf dəzəm addəv gəla vani dəskoɓgin lukutɗe nani.

⁴⁸ Ya an məsdələv atoŋko, asəŋgləkanək na tellef dənzlər aza gəla van sədərɓaga məmsak əkkəɗən ɓa, məsdələv dərbangən na gəla van salala yi, adan məbburni kokoklo vani.

⁴⁹ Vi kawpesl gəla səza mambray nani, dəkaygən biŋgeɗ sula, wəlaŋga na wəlaŋga ɓəɓəl na Liban, gabaga pepreŋ məzəwiɗ diyɗa gəm gaslamba na isop.

⁵⁰ Dətawgən wəla bəŋga maddaabəŋ aka məsteɓe məs iŋkile miyma addəvəni.

⁵¹ Dəkaygən wəlaŋga na wəlaŋga ɓəɓəl na Liban, gaslamba na isop, gabaga pepreŋ məzəwiɗ diyɗa gəm bəŋga an madarani; dəyopgin aret mbel na bəŋga mətaw wəlan gəm aret iŋkile na mahenziŋ naka; dəksu'gin təl buhul aza zə gəla.

⁵² Vaski adawpesl gəla səza mambray nani, də mbel na bəŋga, dit iŋkile miyma, də bəŋga madarani, də wəlaŋga ɓəɓəl na Liban, də gaslamba na isop gəm gabaga pepreŋ mizəwiɗ diyɗa.

⁵³ Dəppangən bəŋga madaran dəveŋgin digilgən sə walaŋgəla-metiŋgini dəlgən kəlawra; dəzəməɗgən Maŋgəlva navvuyon mambray aka gəla. Asna gəla van wasan salala.»

⁵⁴ Aski tive mərban nazba vi gbəgba na kokolo gəm na bargagay pakə,

⁵⁵ vi kokolo na lukutu awaniɓa na gəla

⁵⁶ ofkokko na zə gəla, mərsla gəm kiɗivirre na zə ɗəf məzəwiɗe;

⁵⁷ tive nazbaska, mahenziŋgi yi aka kokolo vi karban pay an salala yi ɓa gəm pay an salala.