Məsdəlveŋge 13 - Bible en Guidar

Valmak

¹ Yawe apel sənək Moyis də Aron amna:

² «An ikslife, mərsla awaniɓa zəga kiɗivir məzəwiɗ gəɗokko tay aka gəba zə ɗəfa, ya an akkpaŋgək huwwa va kokolo aka gəba zə ɗəfa, asna kəkanəngən sən məsdələv Aron awaniɓa sən taka səret məsdəlveŋge kirtini;

³ məsdələv dəsəŋgləkangən gbəgba' na gəba zən vani. An deɗekeɗ na təki van akkpaŋgək babara, an tay gəɗokko aka gəba zəni, asna gbəgba' zev kokolo yi; sədərɓaga əsəŋgləkani, məsdələv dərbangən na də heslepe yi.

⁴ An zən kiɗivir babar məzəwiɗ van tay gəɗokko ɓa, deɗeke nadak dəkkpaŋgan babar ɓa, məsdələv dəɗigən ɗəf nan a mapoho lumu taka.

⁵ Pay mabuhuloni, məsdələv dəsəŋgləkaŋgəni: an gbəgba' van tay a gəlan va lahəŋka, məza dənzler ɓa, məsdələv dəɗigən masula'ən a mapoho pay buhul əmpa.

⁶ Pay mabuhuloni, məsdələv dəsəŋgləkangən əmpa: an gbəgba' van tay əggraka dənzlər ɓa, məsdələv dərbangən na də heslepe yi ɓa: aska maslslawayay yi; ɗəf nani dəskoɓgin lukutɗe nani asna wasan salala.

⁷ Ya an mərsla van azəmək gəba zəni səza məsdələv asəŋgləkan vi karban na salala yi na, ɗəf nani dəmndangən aza məsdəlva vi dəsəŋgləkangən əmpa.

⁸ Məsdələv dəsəŋgləkangəni: An mərsla van awanək zən aka gəba zəni, məsdələv dərbangən na də heslepe yi: Kokolo yi.

⁹ An kokolo armak ɗəfa, sən məsdələv adawkanəni.

¹⁰ Məsdələv dəsəŋgləkangəni: an ikislif tay babar aka gəba zəni, dəɗekeɗ nadak akkpaŋgaŋgək babarɗe gəm gəba zən tay ŋgoɓoɓŋgoɓoɓu,

¹¹ kokolo məzvay azani; məsdələv dərbangən na də heslepe yi; ayan na zən əɗiyən a mapoho ɓa vi arbək na də heslepe yi.

¹² Ya an kokolo van tay tukpurkpum aka gəba zəni, an azəmək gəba zən pakə təŋ səka kiyən gap aza təlni, va məsdələv asəŋgləkani,

¹³ Məsdələv dəsəŋgləkangəni: An kokolo azəmək gəba zən pakə, dərbangən na də heslepe yi ɓa; də akkpaŋ bar pak na də heslepe yi ɓa.

¹⁴ Ya pay mula gəba zən tay ŋgoɓoɓŋgoɓoɓu, wakkpaŋ də heslepe azani.

¹⁵ Məsdələv dəsəŋgləkangən gəba zən an ŋgoɓoɓŋgoɓoɓu gəm dərbangən na də heslepe yi: gəba zə ɗəf ŋgoɓoɓŋgoɓoɓ na salalay ɓa, kokolo yi.

¹⁶ Awaniɓa an huwwa ŋgoɓoɓŋgoɓoɓ akkpaŋgək babara, ɗəf nan dəlgən ərah məsdəlva.

¹⁷ Məsdələv dəsəŋgləkangəni: Adan huwwa van akkpaŋ babara, məsdələv dərbangən na huwwa məza heslepe ɓa yi: huwwa na kokolo yi ɓa.

¹⁸ An yoro tay aka gəba zə ɗəfa, yaŋ anzaɗə,

¹⁹ ya gəla yoro van akislifike, awaniɓa tay kiɗivirre piriŋge, məsdələv dəsəŋgləkangəni.

²⁰ Məsdələv dəsəŋgləkangəni: an zən kiɗivirre van tay kpum aka gəbani ya an deɗekeɗ akkpaŋgaŋgək babarɗe, məsdələv dərbangən na də heslepe yi: asna kokolo yi, məzutəŋ a gəla huwwa.

²¹ An vaski ɓa, pay an məsdələv asəŋgləkanəka, an dərah deɗeke babar ɓa, zən kiɗivirre van tay kpum ɓa ya tay əwiɗ ɓa, məsdələv dəɗigən ɗəf nan a mapoho əvoŋ buhulu.

²² An gegesiŋ tay ənzlərgən zəni, məsdələv dərbangən na də heslepe yi: asna huwwa kokolo yi.

²³ Ya an gəba zən kiɗivirre məzəwiɗ van tay a gəlan va lahəŋka, məza dənzlərgən zən ɓa, asna gəla yoro yi; məsdələv dərbangən na heslepe tay azan ɓa.

²⁴ Zəga an maɓɓani: An gəba zə ɗəf akislifike vi offo azlaka, ya təki an azlə van tay kiɗivirre piriŋge awaniɓa məkkpokun na,

²⁵ məsdələv dəsəŋgləkangəni: an deɗekeɗ na təki kiɗivirre məzəwiɗ van akkpaŋgangək babara ya an arbək na tay əzəm gəba zəni, asna kokolo yi məzətəŋ a gəla əzla na offo; məsdələv dərbangən na də heslepe yi: gbəgba na kokolo yi.

²⁶ An məsdələv asəŋgləkanəka, deɗeke na təki kiɗivirre van tay babar ɓa, təki van tay kpum əzəm gəba zən ɓa, tay əwiɗ ɓa na, məsdələv ɗəɗigən ɗəf nan a mapoho əvoŋ buhulu.

²⁷ Pay mabuhuloni, məsdələv dəsəŋgləkangəni: an tay ənzlergən zən aka gəba zəni, məsdələv dərbangən na də heslepe yi: asna kokolo yi.

²⁸ Ya an zən kiɗivirre məzəwiɗ van tay a gəlan va lahəŋka, dənzlərgən zən aka gəba ɓa, an tay əwiɗ ɓa, asna ikislif na əzla na offoy; məsdələv dərbangən na heslepe tay azan ɓa: as gəla huwwa na offoyi.

²⁹ An huwwa agəɗək aza ɗəf mizilin awaniɓa gulku aka kiyən awaniɓa a madomoni,

³⁰ məsdələv dəsəŋgləkan huwa vani: an tay kpum balsən gəba, an deɗekeɗ tahəŋ futfut pəreŋ pəreŋ, məsdələv dənahgən wat na heslepe yi: bargagay yi, va wənah na kokolo naka ki ɗəfa awaniɓa na modomo ɗəfa.

³¹ An məsdələv asəŋgləkanək na, bargagay van dəkkpumon zən balsən gəba ɓa, də deɗekeɗ nadak tahəŋ tuturɗe ɓa zlaŋgə, məsdələv dəgilgingən məsgbəgba' nan səret ɗiy gap əvoŋ buhulu.

³² Aka pay mabuhuloni, məsdələv dəsəŋgləkanəgən gbəgba vani: an bargagay dənzlərgən zən aka gəba zən ɓa gəm deɗekeɗ tahəŋ pəreŋ pəreŋ ɓa, an dəkkpumon zən balsən gəba ɓa,

³³ ɗəf nan dəfaɗgən təki məza gbəgba ɓa vi məsdələv wagilgin səret ɗiy vi lumu taka əmpa.

³⁴ Pay mabuhuloni, məsdələv dəsəŋgləkangən bargagay vani: an dənzlərgən zən aka gəba zən ɓa gəm an dəkkpumon zən ɓa na məsdələv dərbangən na heslepe tay azan ɓa; sə dərɓaga əskoɓ lukut nan na wasan məza heslepe ɓa.

³⁵ Ya an bargagay van anzlərək aka gəba zən sə dərɓaga məsdələv anah wat na salala yi,

³⁶ məsdələv dəsəŋgləkangəni: Adan bargagay anzlərək aka gəba zəni, məsdələv wakayan na deɗekeɗ sədak na pəraŋgaŋ sam ɓa; ɗəf nan də heslepe yi.

³⁷ Ya an bargagay van tay a gəlan va lahəŋka gəm deɗekeɗ tuturɗe agilyoŋko, bargagay van anzaɗka heslepe tay azan ɓa; asna məsdələv dərbangən na heslepe tay azan ɓa.

³⁸ An gəba zə ɗəf mizilin awaniɓa gulku tay kiɗivirre əwiɗe, babara,

³⁹ məsdələv dəsəŋgləkangəni: an zən kisliffe van tay əwiɗ ɓa, maslslawayay aka gəbani, ɗəf nani heslepe tay azan ɓa.

⁴⁰ An muhur ki ɗəf appətka, kiyən məklãhni; salala yi.

⁴¹ An muhur kiyən appətək sə kəlabani, mirbizin kəlãhã yĩ; heslepe tay azan ɓa.

⁴² Ya an aka dadawar kiyən kəlãhã awaniɓa aka mirbizin kəlãhã an huwwa tay ɓihhe, kokolo dədawtəŋ aka kini awaniɓa a mirbizni.

⁴³ Məsdələv dəsəŋgləkangəni: an aka kiyən kəlãhã awaniɓa aka mirbizin zəga tay babar pəreŋpəreŋ va kokolo na gəba zə ɗəfa,

⁴⁴ məskokoloyi, də heslepe yi; məsdələv dərbangən na də heslepe yi; kokolo dərma aka kini.

⁴⁵ Məskokolo məsgbəgba' vaska lukutɗe nan dəssoŋgən məŋgereti, muhur kiyən məfaɗən, dətərgən mani, dəngəzlgən vaŋvəl na: heslepe, heslepe;

⁴⁶ də heslepe yi an gbəgba' məgəɗ heslepes tay azani; dəsangən takərgən a mapoho na dibirgidiki.»

Tellef aza lukutu

⁴⁷ «An tellef na kokolo arbək aza lukutu, lukut na zeŋze na time awaniɓa na helege na ngərayã,

⁴⁸ gabaga, lukutuk na helege na ngərayã awaniɓa na zeŋze na time, gəba milmisin awaniɓa zəga məɗɗan də gəba milmisin pakə,

⁴⁹ an zəga agəɗək manzakalyãkalyã awaniɓa pepreŋge aza lukut awaniɓa gəba milmisin, aka gabaga awaniɓa lukutuk məzətəɗa, awaniɓa aka zəga məɗɗan də gəba milmisin pakə, asna urduf na kokolo yi: məsdələv dəsəŋgləkaŋgəni.

⁵⁰ Məsdələv dəsəŋgləkangə tellef vani, asna dətakgən zəga məs tellef van dəɗigən temme əvoŋ buhulu.

⁵¹ Pay mabuhuloni dəsəŋgləkangən tellef vani: an tellef van anzlərək aza lukutu, aza gabaga awaniɓa lukutuk məzətəɗa, awaniɓa aza gəba milmisin; zəga awandi məɗɗan də gəba milmisin pakə, asna kokolo məs abbur na ɓa yi, tellef naza zəga van də heslepe yi.

⁵² Kawzla lukut vani, gabaga awaniɓa lukutuk na zeŋze awaniɓa na helege na ngərayã, awaniɓa zəga na gəba milmisin məskokolo arbə azan pakə adan kokolo məs abbur ɓa yi na, zəga nan nawzla yi.

⁵³ An məsdələv asəŋgləkanəka, tellef van dənzlər aza lukut ɓa, aza gabaga ɓa, awaniɓa lukutuk məzətəɗa, awaniɓa aza zega na gəba milmisin pakə,

⁵⁴ məsdələv dəɗigən wən nan kaskoɓ zəga məs tellef vani, asna dətakgən addəv lumu taka əmpa.

⁵⁵ An məskoɓni tellef vani, məsdələv dəsəŋgləkangəni: an tellef van dədəɗ ɓa, dənzlər ɓa, zəga vani də heslepe yi; akoffo kədawzlani, aŋgənək sə kəlabani awaniɓa sə kəla dərɓagani.

⁵⁶ An məsdələv asəŋgləkanka, tellef van agrakək səza məskoɓən, dətawgən səza lukut awaniɓa səza gəba milmisin, səza gabaga awaniɓa lukutu.

⁵⁷ Ya an zəga arbək aza lukutu, aza gabaga awaniɓa aza lukut məzətəɗa, awaniɓa aza zəga na gəba milmisin pakə, kokolo yi məzutəŋga: kəzlagən zəga məs tellef vani.

⁵⁸ Lukut, gabaga awaniɓa lukutuk məzətəɗa, awaniɓa zəga na gəba milmisin pakə məs kəskoɓu yas tellef nan aggrakə, kəskoɓugən masula'ən wakkpaŋ məza heslepe ɓa.»

⁵⁹ Aŋki əpel aka wən na tellef məs dərbə aza lukut na zeŋze awaniɓa na helege na ngərayã, aza gabaga awaniɓa lukutuk məzətəɗa, aza zəga na gəba milmisin, aski tive narban na heslepe tay azani awaniɓa tay ɓa.