Məsdəlveŋge 12 - Bible en Guidar

Əbbur nat muhurku

¹ Yawe apel sənək Moyis amna:

² Apel sit mə Israyelɗe: «An guluk də daway tuwək wiyna, də harambatə gap pay buhul va pay net koɗɗe nata.

³ Pay madodopoɗon na kaskəlni awra;

⁴ Sədərɓagan na, watəga pay naslslay nata, addəv əvoŋ kaklaw hoku kiyən hoku; tərəŋgən na zəga salala ɓa gəm təmbat na addəv gəla na Maŋgəlva ɓa gap pay naslslay nat toŋgu.

⁵ An waŋ tuwə, addəv əvoŋ kəlaw kiyən poɗo na də harambatə va pay net koɗɗe nata; sədərɓagani, watəga pay naslslay nata, addəv əvoŋ kaklaw sləre.

⁶ An pay naslslay nat agraka, vi wiyna awaniɓa waŋ məs tuwə, təkigən wət time nazva taka gəm bəŋga na maha sən məsdələv ama gizlirke nalma də Maŋgəlva vi matuya nawzla kurmbuɗuku, awaniɓa mukuɗuŋgulo, vi matuya na mambraya;

⁷ məsdələv dəkigin aba Yawe ya an aɗɗak matuya navvuyon mambray akata, watəsat məslslayət kana.» Aski əpel məs dəwəl sət muhuruk tuwə wiyna awaniɓa waŋkə.

⁸ «An təɓap na kawrah wət time ɓa, təgəmgən mukuɗuŋguleɗ sula awaniɓa biŋgeɗ na maha sula, taka ka naɗɗa əvəl nawzla kurmbuɗuku, an mbərən ka nawzaɓ-Maŋgəlva navvuyon mambraya; an məsdələv aɗɗak matuya navvuyon mambray akata, watəsat salala.»