Məsdəlveŋge 11 - Bible en Guidar

Mahenziŋ aka əsso salala gəm məza salala ɓa ( 11:1—15:33 ) Zəgeɗ en nawmə'əŋ ɓa gəm zəgeɗ en nawmə'a

¹ Yawe apel sənək Moyis də Aron də wənah sit na:

² Məpel sit mə Israyelɗe: «Səret zəgeɗ memeyẽɗ naka dəlvafuŋ pakə, eŋkin məs kədawzəmaŋgə:

³ en məs də eperkeperke muɗakani ya tahəŋ əmpəranən zəga naddəvti, eskiŋ kədawzəman səret zəgeɗ memeyẽɗi.

⁴ Səret zəgeɗ memeyẽɗ məzəmpəranən zəga naddəvti gəm səret zəgeɗ məs eperkeperke net muɗakani, en nawzəmən ɓa yeŋki: zlogomo vi ampəran zəga naddəvən ya eperkeperke nan duɗak ɓa: Zəga nawmə'i azokum;

⁵ koyɗoŋ, vi apəran zəga naddəvəni, ya eperkeperken duɗak ɓa: Zəga nawmə'i azokum;

⁶ mandava, vi aw'oron zəga naddəvən ya eperkeperken duɗak ɓa: Zəga nawmə'i azokum;

⁷ vedem, vi tay də eperkeperke muɗakani, ya ampəran zəga naddəvən ɓa: Zəga nawmə'i azokum.

⁸ Kədawzəmaŋ slu net ɓa, kədarəŋgənən mogogoy net ɓa; Zəga nawmə' nokumi yi.

⁹ Səmmbet zəgeɗ naret iŋkile pakə, eŋkiŋ kədawzəmaŋgə: Zəga an də persleken naŋkoro gəm də kosloproko aka gəbani, wakəɓapən əzəmənə;

¹⁰ ya an tay də persleken naŋkor ɓa, tay də kosloproko aka gəban ɓa, zəgeɗ memeɗeŋɗe naret iŋkile awaniɓa zəgeɗ mekeret naret iŋkile, na pehe awaniɓa na məlpa, zəgeɗ nawmə' nokuməŋ;

¹¹ wassoŋ zəgeɗ nawmə' nokum; kədawzəmən slu net ɓa, mogogoy net dəsangən zəga nawsẽ' nokum:

¹² zəga neret iŋkile məza persleken naŋkor ɓa, kosloprokon ɓa, zəga nawsẽ' nokumi yi.

¹³ Səret biŋgeɗi, eŋkiŋ kədawsẽ'eŋgi; kawzimti ɓa, nawmə'ən: gazla, Ziyna, molyom,

¹⁴ makarzaya, mogdokɗe zeŋvit temtemi,

¹⁵ gaŋgrekeɗ zeŋvit temtemi,

¹⁶ herkeseŋ, gbuzlu, harawaharawa, bazlamɗe zeŋvit temtemi,

¹⁷ gbuzlu, naweggedi, ekirtikirti,

¹⁸ harawaharawa, bəŋga mərəm kilfi, mogdok na pəlwa,

¹⁹ hemsemse, aŋkarɗe zeŋvit temtemi, bazlay muyã gəm dabarga.

²⁰ Zəgeɗ memeɗeŋɗe məs persleket pakə, məzədawaŋ aka tilit poɗo zəgeɗ nawmə' nokuməŋ.

²¹ Də as pak en kədawzəmaŋ səret zəgeɗ memeɗeŋɗe məs persleketi məzədawaŋ aka tilit poɗo yeŋki: zəgeɗ məs də tilit nawzlah sula.

²² Eŋkiŋ kədawzəmaŋgə: heyɗeŋɗe va zeŋvit assoŋgu, mepreŋge va zeŋvit asani, goŋɗoko va zeŋvit asani gəm zaray va zeŋvin asani.

²³ Ya zəgeɗ memeɗeŋɗe məs persleket gəm də tilit nadaw kaka na, nawmə'əŋ vikumu.

Zəga nawraygən ɗəfa

²⁴ Zəgeɗiski waraygukuməni, naway dərəŋgən mogogoy net pak wasan də heslepe gap moskoyo,

²⁵ ɗəf məs dəgəm mogogoy net pak dəskoɓgən lukut nani, wasan də heslepe gap moskoyo:

²⁶ zəgeɗ memeyẽɗ məs də eperkeperke net məs duɗak ɓa awaniɓa məs aw'oronən zəga naddivit ɓa, nawsẽ'iŋ azokum: ɗəf an dərəŋgəni, wasan də heslepe.

²⁷ Zəgeɗ də perzleŋ tiliti, məzədawaŋ aka tilit poɗo nawsẽ'iŋ azokum; ɗəf an dərəŋgən mogogoy net pak wasan də heslepe gap moskoyo,

²⁸ ɗəf an dəgəm mogogoy neti dəskoɓgən lukut nani, wasan də heslepe gap moskoyo, vi nawsẽ'iŋ azokum.

²⁹ Zəgeɗ memeɗeŋɗe məzuwanən zit diyɗa diyɗa aka dəlvafuŋ, eŋkiŋ məs salalaŋ vikum ɓa: maŋɗaŋkə, gaslma, zəgeɗ mədawaŋ də gidivit zeŋvit temtemi,

³⁰ motorkpozlokpozlo, karŋgbaha, meselesele, mizziwɗike gəm mekekewleke.

³¹ Eskiŋ məs kədawlaŋ də heslepe səret zəgeɗ memeɗeŋɗe. Ɗəf dərəŋgən mogogoy net pak wasan də heslepe gap moskoyo.

³² Zəga an zəgeɗ memeɗeŋɗes məmtən net abət akan pak wakkpaŋ məs heslepe, hĩlĩw na wəlaŋga yi, lukuti yi, gəba yi awaniɓa gabalə, va wənahən na zəga na wəza zəŋvin awan di pakə; kawgulən aret iŋkile, də heslepe yi gap moskoyo, asna wakkpaŋ məza heslepe ɓa.

³³ Mesteɓe na dələv an taka səmmbet zəgeɗis abətək akani, an dəsan addəvən pak akkpaŋgək məs heslepe azani, ya kəkrapəngən mesteɓe vani;

³⁴ an ɗəf azlifik iŋkile naddəvən aka zəga nawzəm zeŋvin awan di pakə, wakkpaŋ də heslepe; va zəga nawsa salala adakkpaŋ də heslepe, dəsan addəv mesteɓe awan di pak zlaŋ.

³⁵ An mogogoy net zəgeɗis abətək aka zəga, wakkpaŋ də heslepe; gulo awaniɓa zəga nawda akan, kəɓzliwingini, vi də heslepeŋgə ya nawmə'əŋ azokum.

³⁶ An dəwəlsən bobok gəm mosgoy net iŋkile, iŋkile naddəvən na salalaŋgə, ya ɗəf dərəŋgən mogogoy na, wakkpaŋ də heslepe;

³⁷ an taka na mogogoy net abətək aka zeŋve nazlga, zeŋve wasan məza heslepe ɓa;

³⁸ ya an ɗəf aziyək iŋkile aka zeŋve səkayə, yas mogogoy taka net zəgeɗis abət akani, mula na də heslepe yi.

³⁹ An zəga mamayã taka səmmbet en kədawzəmaŋ amtəka, ɗəf an dərəŋgən mogogoy nani, wasan də heslepe gap moskoyo;

⁴⁰ ɗəf dəzəm slu na zəga memtənəska dəskoɓgən lukut nani ya wasan də heslepe gap moskoyo; ɗəf dəslan mogogoyəska dəskoɓgən lukut nani, wasan də heslepe gap moskoyo.

⁴¹ Zəgeɗ memeɗeŋɗe məzuwanən zit diyɗa diyɗa aka dəlvafuŋ zəga nawmə'əŋ: kawzimti ɓa.

⁴² Zəgeɗ memeɗeŋɗe məzuwanən zit kuɗiskuɗisi aka dəlvafuŋ, məzədawaŋ də gədəvti, awaniɓa məzədawaŋ aka tilit poɗo, kədawziminin ɓa, vi nawsẽ'iŋ azokum.

⁴³ Də zəgeɗ memeɗeŋɗe məzuwanən zit kiɗiskiɗis adayaŋ zlaŋ, kədawɗiyin wəray akokum ɓa, kədawraygənən zukum diŋdit ɓa gəm kədassoŋ məraykum viyit ɓa.

⁴⁴ Vi intə Yawe Maŋgəlva nokum; kəpesleŋgən vi kəssoŋgən salala məza heslepe ɓa, vi ina salala nani; kədawraygənən zukum də əriŋgit zəgeɗ memeɗeŋɗe məzəbbalaŋ aka dəlvafuŋ ɓa.

⁴⁵ Vi intə Yawe nəgilgukum səka dələv na Eziptə, ka nəsawgən Maŋgəlva nokum; məssoŋ məza heslepe ɓa adan məza heslepe ɓa nani.»

⁴⁶ Aŋki əpel aket zəgeɗ memeyẽɗi, biŋgeɗi gəm zəgeɗ mekeret məzəbbalaŋ eret iŋkile awaniɓa məzuwanən zit diyɗa diyɗa aka dəlvafuŋ.

⁴⁷ Watəraŋ vi kawɗakaŋ an də heslepe səza an də heslepey ɓa gəm zəgeɗ memeyẽɗ en nawzəma dit en nawzəməŋ ɓa.