Məsdəlveŋge 10 - Bible en Guidar

Mahenziŋ naɗɗa gəlabaya

¹ Nadab də Abihu, kirtin Aron, naway pak dət kasliyək nani, asɗaŋgək offo addivti, aziyən telembe nawzla a matuya aka offo məza salala yi ɓa məs məɗi siti wən nan ɓa, kawvəl sən Yawe.

² Ndəni offo agil səba Yawe yas azle; amtaŋgək aba Yawe.

³ Moyis anah sənək Aron amna: Aŋki məs Yawe apel anah na: Salala naw warbə azet ɗiy nazawa, kawgagdakawi a maheret ɗiy pakə. Yas Aron asan ɓatə.

⁴ Yas Moyis aye may Mika'el gəm Elsafan, kirtin Uzziyel, madiya Aron, aɓsit na: midder aŋka! Mike milmiŋgiɗkum səba təki nawzaɓ-Maŋgəlva faraɗa səza dibirgidiki.

⁵ Azzoŋ agəmən ki gəbayti, aketinik a mapoho na dibirgidik addivit lukutɗe neti, va Moyis anah siti.

⁶ Moyis anah sənək Aron gəm sit kirtin Ele'azar gəm Itamar kan na: Kəppannən muhur kikum nzoryok nzoryok ɓa, kəŋgerin lukutɗe nokum ɓa, vi kədamtaŋ gəm kawki ədagədəv aka əsap net ɗiy ɓa. Milmigiɗkum Israyelɗeŋ nawhəmaŋ aket ɗiy en məs Yawe azet də offo.

⁷ Nokumu, kədaddereŋ səma gizlirke nalma də Maŋgəlva ɓa, vi kədamtaŋgə, vi mẽl na Yawe məppay sukum tay akokum. Yaŋ aɗɗaŋ va Moyis apeli.

Əpel aka mbazla

⁸ Yawe apel sənək Aron dawnah na:

⁹ «An munokum tat əddoŋ a gizlirke nalma də Maŋgəlva, isi dit kirtuko, kədawsaŋ biya genegene may məhəsən ɓa; vasna kəmtaŋ na ɓa. Mahenziŋ məs addəɗ ɓa vikumi yi faɗə.

¹⁰ Vi kəɓapəngən uɗakan zəga na wəza gəm an na wəzay ɓa, məs heslepe tay azan ɓa də an məs heslepe azani,

¹¹ gəm kəyegetingin mə Israyelɗe aka an Yawe anah viyit də ma Moyis.»

Əpel aka slu na matuya

¹² Moyis apel sənək Aron gəm sən Ele'azar də Itamar, kirtin məs dəppaŋ na: «Məgəm əvəl na zəga na mabardaw, an dəpəl səza peŋ məhhətən haran na Yawe, məzəm məza wuɗo aran ɓa a maŋgava təki nawzaɓ-Maŋgəlva vi salala yi.

¹³ A matuya yi kədawzəməni, vi haran nassan ka nok dit kirtuk səddəv peŋ məhhətən sən Yawe yi. Vas məɗi su wən nani.

¹⁴ Makran nawzokoni gəm mettile nawgəma, kəzimingin a matuya, isi, kirtuk mezeŋgleket gəm muguluŋgiti sap də isi, vi an məpsuk gəm sit kirtuk səddəv əzaɓ-Maŋgəlva nawsler net mə Israyelɗe yi.

¹⁵ Mettile nawgəma gəm makran nawzokon səddəv way na səlhã nahhəta, wakinən kawzokon aba Yawe; sədərɓagan na wakkpaŋgan ka zəga məpsuk faɗə gəm sit kirtuko va Yawe aɗi wən nani.»

¹⁶ Gala Moyis adattok aka porsok na əzaɓ-Maŋgəlva vi mambraya, arahək na məzlani. Adək gədəv aka Ele'azar gəm Itamar, kirtin Aron məs dəppaŋgə:

¹⁷ «Vimi kəzəmən zəga na matuya van a matuya ɓa adan zəga na matuya yi di? Apsukum na vi kavvuyon mambray na əsap net ɗiy yi gəm vi kazban mahenziŋ navvuyon mambray aba Yawe aketi yi.

¹⁸ Adan məketi mbel nan addəv gəla na Maŋgəlva ɓa, kəta addəv gəla na Maŋgəlva kədawzəmən va nəɗi sukum wən nani.»

¹⁹ Aron aɓsən Moyis na: «Awle, dəpaŋka aka azaɓən-Maŋgəlva navvuyon mambray gəm aɗɗaŋ əvəl nawzla kurmbuɗuk aba Yawe, an dəde su addəv əɗɗum naw yaŋka, wəzəm əzaɓ-Maŋgəlva naw vi mambray dəpaŋ na wasan law a mahara Yawe sa?»

²⁰ Moyis aprəməka, atafəka.