Məsdəlveŋge 1 - Bible en Guidar

Mahenziŋ aka əvəla gəm əzaɓ-Maŋgəlva ( 1:1—7:38 ) Əvəl nawzla kurmbuɗuku

¹ Yaŋ Yawe, səddəv gizlirke nalma də Maŋgəlva aya Moyis, apel dawnah sən na:

² Apel sit kirtit Israyelɗe, anah sit na: An ɗəf sə walaŋkum tay əki əvəl sən Yawe, dəwel sə weleŋgit wasliɗe awaniɓa gilew dit timeŋgiɗi.

³ An əvəl nan van əvəl nawzla kurmbuɗuk məgəmən səret wasliɗe yi na, dəsan mizilin məza heslepe azan ɓa; dəkiyəngən a maddamba na gizlirke nalma də Maŋgəlva, vi Yawe dətafgəni.

⁴ Ɗəɗigən van aka ki zəga mamayã an məwelin na əvəl nawzla kurmbuɗuk məs Yawe ataf səvani, dərahgən əvvuy na mambray nani;

⁵ Dətawgən wəla wasli van aba Yawe; as kan na məsdəlveŋge, kirtin Aron dəgimingin mbel veti, dəksoningin mbel vet sulək ki təki nawzaɓ-Maŋgəlva məs dəsan a maddamba na gizlirke nalma də Maŋgəlva.

⁶ Dəfotgən zəga na əvəl nawzla kurmbuɗuk vani gəm dətawangəni.

⁷ As kan na kirtin məsdələv Aron dərmanəngən offo aka təki nawzaɓ-Maŋgəlva dəkkpuɓoŋgən motoffoɗe akani,

⁸ məsdəlveŋge kirtin Aron dəzaɓanəngən slu mətawan naka, kini gəm səlhã sap aket motoffoɗe məkkpuɓit akoffo aka təki nawzaɓ-Maŋgəlva naka;

⁹ dəskoɓəgən zəga naddəvən may tetewirge aret iŋkile, as kan na məsdələv dətosgən bayman pak aka təki nawzaɓ-Maŋgəlva. Aski əvəl nawzla kurmbuɗuku, way məzlan məzəffok nek aka Yawe.

¹⁰ An əvəl nan van zəga na əvəl nawzla kurmbuɗuk məgəmən səret gilew dit timeŋgiɗi yi, time awaniɓa hãw məzilin məza heslepe azan ɓa adawkiya;

¹¹ Dətawgən wəlan də disiŋ ki təki nawzaɓ-Maŋgəlva, aba Yawe; asna məsdəlveŋge, kirtin Aron, dəksoningin mbel na zəga van ki təki nawzaɓ-Maŋgəlva tərwəslə;

¹² dətawangəni meɗmeɗi, kini də səlhã sap pakə, as kan na məsdələv dəɗigən aket motoffoɗe nakoffo aka təki nawzaɓ-Maŋgəlva;

¹³ Dəskoɓəgən zəga naddəvən may tetewirge aret iŋkile, as kan na məsdələv dətosgən bayman pak aka təki nawzaɓ-Maŋgəlva. Aska əvəl nawzla kurmbuɗuki, way məzlan məzəffok nek aka Yawe iyi.

¹⁴ An əvəl nan van zəga na əvəl nawzla kurmbuɗuk məgəmən səret biŋgeɗi yi sən Yawe, dəgəmgən əvəl nan səret mukuɗuŋguleɗi awaniɓa səret biŋgeɗ na maha;

¹⁵ Məsdələv dəkigən aka təki nawzaɓ Maŋgəlva; dəboŋgən kini gəm dətosgəni; dəttiɗgin mbel aza təki nawzaɓ Maŋgəlva;

¹⁶ Dəboŋgən gogoɓyokən aket dəɓekeɗi, dəzgangən amaŋgava təki nawzaɓ Maŋgəlva dəmmba pay nampum, aka təki nawfik moŋglo məs səlhã almisi;

¹⁷ Dəpəɗakgən sə walaŋ persleken pəɗak sula məza əboŋgon ɓa asna məsdələv dətosgən aka təki nawzaɓ Maŋgəlva aket motoffoɗe məkkpuɓit akoffo. Aska əvəl nawzla kurmbuɗuki yi, way məzlan kurmbuɗuk məzəffok nek aka Yawe yi.