Markus 9 - Bible en Guidar

¹ Yesu anah sit əmpa na: Gesiŋ nədawnah sukum ɗiy meɓɓet tahəŋ awalaŋgit ɗiy en dəssoŋ aŋkiŋki, sessel amtaŋ na tak dulanən məlĩ na Maŋgəlva ɓa ɓa.

Yesu akkpaŋganək zəni

² Dərɓaga əvoŋ sləre na, Yesu agəmək Piyer də Yakob gəm Yohanna, akek ɓuh takərgit aka mossorgo metiŋ məɓayən. Gəɓa zən akkpaŋgək a mahereti.

³ Lukutɗe nan kpaŋgaŋ əwiɗ babarɗe ndaslə, ɗəf tay aka dələv nawɓap əskoɓ lukut va nan ɓa.

⁴ Yaŋ Eliya də Moyis arbanən zit azeti, tay əpeleŋ də Yesu.

⁵ Piyer azlani, aɓsən Yesu na: Mərbəzəga, moggoni məsamgən aŋka. Məzaɓsəm gizlirkeɗe hoku, suk taka, sən Moyis taka, sən Eliya taka.

⁶ Piyer dəsən məs adawpel ɓa, vi geslne' armek sawɓa.

⁷ Slaybuwən adeke asəritike, aprəmənək wəla əpel sit səddəv slaybuwən naka, amna: Aŋki wətu an nəŋgələ. Məprəm mani.

⁸ Ndəɗaŋ ləŋ heret bəbalbəbalgən kiyit na, dulaŋ ɗəf ɓa, abbər Yesu takərgən dənɗaŋ.

⁹ Adan adaprikeŋ səka mossorgo metiŋgini, Yesu abayək meti: Kədawnahən zəga an kulaŋ sən ɗəf ɓa hã an Wətən Ɗəf asilik səka əmta.

¹⁰ Armanənək əpel nani, də əssohon ma zit na: «Mi əsilye səka əmta aŋgəl ənah di?»

¹¹ Yaŋ assohõnən Yesu: Vimi mərbaŋ-mahenziŋ adawnahaŋ na, adahək Eliya dədegən tagay di?

¹² Azlan sit na: Gesiŋ Eliya wade daabəŋ dəzaɓetgin zəgeɗ pakə. Ya mbari məverin aka Wətən Ɗəf na wazəm sahã diyɗa, ɗiy wazelini di?

¹³ Naw in tat ənah sukum: Eliya adek səkay, aɗɗaŋ sənənək an aŋglaŋ, va məverin akani.

Yesu tay əmbəlgən wiyən məs ətem adawzəmgən sahã

¹⁴ Adan agapaŋ azet gewleɗ meɓɓeti, awleninik ɗiy diyɗa kiyit karkarə gəm mərbaŋ-mahenziŋ əbayaŋ ma dənɗaŋ.

¹⁵ Adan ɗiy awlanən Yesu ləŋgə, agəɗ sitik gərəŋgə, anzoŋguk azan vi kasɗani.

¹⁶ Yaŋ assohẽt gewleɗ nani: Aka mi kədawbayaŋ ma dənɗaŋ di?

¹⁷ Ɗəf taka sə walaŋgit ɗiy məkkelit nek azlan sən na: Mərbəzəga, wətu nəki suko. Tay də ətem akani, aɓap əpel ɓa.

¹⁸ A təki awaksən pak ndən əslban afuŋ. Wiyən van əki maslsla amani, əmpran slayni, əkkpaŋ suroksuroku. Nəkkametik gewleɗ nok dərɓahnəngən ətem vani, ya dəɓapnən ɓa.

¹⁹ Yesu agəmək əpel aɓsit na: Sayit ɗiy məs tahəŋ də ətaf ɓa gəm məreygiti, hã gap dewe nədawsaw amoŋgovokum di? Pay gbəgbari nədazban əɓəskum di? Məki su aŋka.

²⁰ Akisənənka. Adan wiyən awla Yesu ləŋgə, ətem aɓlanək diyɗa, ndən sukot afuŋ gəm əkəɗəŋgəl də maslsla aman ŋgbofŋgbofu.

²¹ Yesu assohõnək afəni: Pay gbəŋgbar aka əɗɗan vaŋkəŋ di? Yaŋ afən amna: Far səka sawãni.

²² Ɗayɗay ətem van adazgan aka offo mãy aret iŋkile vi kawzani. Ya an tay kədawɓap əɗɗa na, awla sasãhmə, ade əbbah səmə.

²³ Yesu azlan sən na: «An akəɓapa!» Zəga tay an tuwãh aza məzutaf ɓa.

²⁴ Afən wiyən nak apelik dayadaya go'ləŋ dawnəh na: Nətafəka, ade əbbah su addəv wəray na ətaf nawa.

²⁵ Adan Yesu awle ɗiy diyɗa adazzoŋgu, yaŋ ahãyan əmpəs mbərayən nak dawnah sən na: Is Ətem mərma hərzləmən gəm aprəm ɓa kəŋkə, in tat ənah suko: Agil səka wiynəŋka, kədamndok ɗah akan əmpa ɓa.

²⁶ Ətem agil səkan daŋzla vaŋvəla gəm də əɓlan diyɗa. Wəyin nak kpaŋ va məmtəni, hã ɗiy diyɗa ənahaŋ na: Amtəka.

²⁷ Yaŋ Yesu arma vani, asilgəni, ndən le' ziwi.

²⁸ Adan Yesu atoŋ eŋgili, gewleɗ nan azzoŋguk azani assohõnənək sef na: Ya vimi nam məɓap ərɓahən ɓa di?

²⁹ Yesu aɓsit na: zevin agil na an də əkkami ɓa ɓa.

Yesu tay əpel aka əmta gəm əsilye səka əmta nan əmpa

³⁰ Adan addoŋ sədaka atoŋguk də Galile. Yesu dəŋgəl ɗəf dəsəngən ɓa.

³¹ Vi tay əɗɗa əyak sit gewleɗ nani, adawnah sit na: Kapsəni Wətən Ɗəf avet ɗiyi; wabaynəni, ya an məbayni, dərɓaga əvoŋ hoku wasil səka əmta.

³² Net aprəmnən gabba əpeləs ɓa, yaŋ adawgeslne'eŋ dassohoni.

Naway daya di?

³³ Yaŋ agapaŋ a Kafarnahum, adan atoŋgoŋ eŋgili, Yesu assohõn met na: Aka wən mi kədawpeleŋ aka tive di?

³⁴ Ndəɗaŋ ɓata'ɓata'ə, vi aka tive apeleŋgik kawsənən na naway daya di?

³⁵ Yesu asənka, ayek gewleɗ kəlaw kiyit sula neki, aɓsit na: An ɗəf aŋgələk əssan nabe dəsan nadərɓeget ɗiy pakə, məgəɗ wəza net ɗiy pakə.

³⁶ Yaŋ Yesu agəm wiyən muzliya, aziwgin a weleŋgti. Adan aslan avani, aɓsit na:

³⁷ Ɗəf dətaf wiyən muzliya va an yaŋkəŋ vi iya nawa, anaw atafə. Ɗəf an dətafwa, anaw ataf ɓa, ɗəf an dəslənu atafə.

Ɗəf an dəzeləm ɓa ɗəf nami

³⁸ Yaŋ Yohanna anah sən Yesu na: Mərbəzəga, mulak ɗəf tay ərɓəh tuyeŋɗe də iya noko. Ya məkay ətak mani vi tay də mənam ɓa.

³⁹ Yaŋ Yesu azlani: Kədawtaknən ɓa. Ɗəf an dəgəɗ sekene də iya nawa, ndən siske ləŋ kawpel mbərayən azaw sa.

⁴⁰ Vi ɗəf an məs dəzeləm ɓa, ɗəf nami.

⁴¹ Ɗəf an dəpsukum iŋkile addəv huloŋguk vi ɗiy na Kristu kənanaŋgə, gesiŋ nədawnah sukum, sessel azəna dawrəh zəga na van ɓa.

Əzga' ma ɗəf taŋtaŋgə

⁴² Ɗəf an dəzbərgən wiyən taka səmmbet kirni məs dətafwəniŋki dəɗah sən iynan gərəm metiŋgin awlan əzgan addəv kpukpum na pehe.

⁴³ An vok amzlagukuk addəv mbərayən, atawa. Ɗəɗah suk ərəh zeŋgile də vok taka mərslan ki ətoŋ addəv offo məs amta ɓa də vok sulagəni. [

⁴⁴ Adak na tentiwilgeɗ məzəmaŋ gəɓa zə ɗəf net amtaŋ ɓa, offo nan amta ɓa'a.]

⁴⁵ An tuluk tay əkuk addəv mambraya, arsla. Dəɗah ərəh zeŋgilok də tuluk taka mərslan ki əmbat addəv offo məs amta ɓa də tuluk sulagəni. [

⁴⁶ Adak na tentiwilgeɗ məzəmaŋ gəɓa zə ɗəf net amtaŋ ɓa, offo nan amta ɓa'a.]

⁴⁷ Ya an horok dədawkuk əɗɗa mambraya, akdaha, dəɗah ətoŋ məlĩ na Maŋgəlva də horok taka məkdahən ki əmbat addəv offo məs amta ɓa də horok sulagəni.

⁴⁸ Adak na tentiwilgeɗ net amtaŋ ɓa, offo nan amta ɓa'a.

⁴⁹ Vi ɗəf pak kappuk səni bətu na offo.

⁵⁰ Bətu zəga moggoni: Ya an lelem na bətu agraka, mbarmbar lelem nan adawsan əmpa di? Məssoŋ də bətu azokum, məssoŋ də zay awalaŋ zukum.