Markus 8 - Bible en Guidar

Yesu tay əzəmgit ɗiy gabal poɗo

¹ Pay nan dəpaska ɗiy diyɗa akkalaŋgək əmpa, ya tahəŋ də zəga nawzəm ɓa, Yesu ayek gewleɗ nani, yaŋ aɓsit na:

² In tat ule ɗiyiŋ sahə, vi pay hoku yaŋka, tahəŋ azawa, ya tahəŋ də zəga nawzəm ɓa.

³ An nəppetik əmbataŋ də mãy eŋgil anetda, waddakaŋ aka tive, vi ɗiy meɓɓet sə faraɗa azzoŋgu.

⁴ Gewleɗ nan azlan sənənka: Aŋga ɗəf adawrəh zəga nawzəm nawbet ɗiy a kapta-muyãŋ di?

⁵ Yaŋ assohẽt na: Meptekeɗ mbarwaŋ avokum di? Azlan sənəni, aɓɗaŋ na: Buhuləŋ.

⁶ Yaŋ aɗi wən nan sit ɗiy na, dəssoŋgən afuŋ. Yaŋ agəm meptekeɗ buhul neki, agəɗək əsoko sən Maŋgəlva, arɗetike apsit gewleɗ nan vi duɗeket sitingən ɗiyi, yaŋ awɗek sitin ɗiyi.

⁷ Kilfeŋge memeɗeŋɗe tahəŋ avet siɗikke. Yesu agəɗək əsoko sən Maŋgəlva aketi, anah sit gewleɗ na muɗeke'e.

⁸ Azəmaŋka, abaŋka. Gewleɗ akkalanənək dambirgiti, aknahək gadagarɗe buhul.

⁹ Ya tahəŋ gap gabal poɗo. Yaŋ Yesu appet kana.

¹⁰ Yaŋ Yesu ateŋ addəv bəlay dit gewleɗ nan ləŋgə, ambat aka kivadələv na Dalmanuta.

Farisaɗe tay əttokoŋ sekene

¹¹ Farisaɗe azzoŋko atəŋgaŋgək wəbay ma də Yesu. Vi kawslan na, assohõnənək dəgəɗ sitgən sekene məs dəde sə disiŋ.

¹² Yaŋ Yesu ampəs diyɗa amna: Vimi sayit ɗiy kakaŋkiŋ adassoh sekene di? Gesiŋ nədawnah sukum, sessel sayit ɗiyəŋ arah na sekene ɓa.

¹³ Azarək səzeti, amilik addəv bəlay kaggar dəma buzgum dəda.

Wuɗo net Farisaɗe gəm na Herodə

¹⁴ Gewleɗ na Yesu azgətaŋgək dawgim meptekeɗ aveti, abbər mepteke taka addəv bəlay neti.

¹⁵ Yaŋ Yesu akol sit sləmeti, amna: Məzi zukum aza wuɗo net Farisaɗe gəm na Herodə.

¹⁶ Yaŋ adawseske'eŋ a walaŋ ziti, vi tahəŋ dit meptekeɗ ɓa.

¹⁷ Yesu asənək an anahaŋgə, yaŋ aɓsit na: Kədawseske'eŋ na, vi meptekeɗ tahəŋ avokum ɓa sa? Kərmanən ɓa'e gəm kəprəmnən ɓa'a sa? Mokrokum ɓəli sa?

¹⁸ Munokum tat də horokum ya kawlaŋ ɓa sa? Munokum tat də sləmokum ya kaprəmaŋ ɓa sa? Kaɗɗumonən wən,

¹⁹ gala nərɗet meptekeɗ sle nuɗak sit ɗiy gabal sle'i, gadagarɗe mbarwa kəkkalanən madambərgən di? Kəlaw kiyit sula anahaŋ sənəni.

²⁰ Ya gala nərɗet meptekeɗ buhul nuɗak sit ɗiy gabal poɗo, gadagarɗe mbarwa kəkkalanən madambərgən di? Aɓsənən na: Buhul.

²¹ Yaŋ aɓsit na: Ya kaprəmənən ɓa'e sa?

Yesu tay əmbəlgən daŋgar a Betsayda

²² Yaŋ agapaŋ a Betsayda, yaŋ akiyaŋ sənən daŋgar. Akkamanənək dərəŋgəngəni.

²³ Adan Yesu arma va daŋgar vani, akak a mapoho na walaŋgəla. Atufuk mefɗe arani, arəŋgənək haran van də vani. Yaŋ assohõni: Istat ula zəga sa?

²⁴ Adan daŋgar aslan harani amna: In tat ula ɗiyi, ya va wəleŋɗe nədawlet ədawaŋgə.

²⁵ Yesu aɗiyək van aka haran əmpa, akoluk moggoni, ambəlka, tay ule zəgeɗ pak lewlewi.

²⁶ Yaŋ appan dəlgən eŋgil dawnah sən na: Kədawtoŋ a walaŋgəla ɓa.

Piyer tay ənah na Yesu yi Kristu

²⁷ Yesu ambatək dit gewleɗ nan kəla walaŋgit gəleɗe na Kaysariya na Filipi. Assohẽtik gewleɗ nan aka tive dawnəh na: Ka nawa ɗiy adawɗiwən di?

²⁸ Aɓsənən na: Yohanna məgəɗ baptem, ɗiy meɓɓeti, ka Eliya. Ɗiy meɓɓet əmpa ka taka neret məskəleŋɗe en farə.

²⁹ Yaŋ assohẽt aneti: Ya nokum nawa nan kədawnahaŋ di? Piyer azlan sən na: Nok, istə Kristu.

³⁰ Yaŋ Yesu abay meti kədawnah sənən wən naw sən ɗəf ɓa.

Yesu tay əpel aka əmta nan gəm əsilye nan səka əmta

³¹ Yaŋ Yesu atəŋ əyagan zəga sit gewleɗ nani: Aslək Wətən Ɗəf dəzəmgən sahã diyɗa, ɗiy məsɓeti, deyeɗe net məsdəlveŋge gəm mərbaŋ-mahenziŋ wazganəni, kawbayni, ya dərɓaga əvoŋ hoku na, wasil səka əmta.

³² Anah sitik kotakə. Piyer abitginək tuɓollo, apel sən na wəlan na ŋgboro.

³³ Yaŋ Yesu akkpaŋgan harani awle gewleɗ nani, ahayanək Piyer aɓsən na: Azar səzawa Satan kənani, vi əɗɗum nok tay va na Maŋgəlva ɓa əɗɗum nok va net ɗiyi.

³⁴ Yesu ayek ɗiy dit gewleɗ nan azani, aɓsit na: An ɗəf aŋgələk wəzbawa, dəppan əɗɗum aka zəni, dəgəmgən wəlaŋga məzliwrihe dəzbawgəni.

³⁵ Vi ɗəf an dəŋgəl əkõhgən zeŋgileni, wazani. Ya məs dəzan zeŋgilen aka wən nawa gəm vi Wən Neneke, nan wakõhgəni.

³⁶ Mi adawtər sən ɗəf an arəhək mammba dələv gboŋ ka nan an azanək zeŋgilen di?

³⁷ Mi ɗəf nan adaɗɗa nawman zeŋgilen di?

³⁸ Vi vaski, ɗəf məs wil adanən viwa gəm vi əpel naw a walaŋ sayit ɗiy məpolkoyeɗ gəm məs mambrayɗeŋki, asna Wətən Ɗəf arəmsən na wil pay adazzan də gagdak na Afən dit maslayɗe en salala ɓa.