Markus 7 - Bible en Guidar

Əyak net dihiŋgiɗmə

¹ Farisaɗe dit mərbaŋ-mahenziŋ meɓɓet azzoŋguk sə Yerusalem aza Yesu.

² Awleninik gewleɗ na Yesu meɓɓet tahəŋ əzəmaŋ way də vet mərga'ən vasna məza əɗa vet ɓa.

³ Vi Farisaɗe dit mə Yudeɗ pak an dəɗanən vet hã aza dugbul vet ɓa azəmaŋ na ɓa, aziweŋgik ɓəlɓəl aka əzba net dəhiŋgiɗti.

⁴ An azzoŋguk sə lumo, azəmaŋ na way an dəslslayaŋ tagay ɓa ɓa. Matuya tay temtem diyɗa məs ayakaŋ aziweŋ akan ɓəlɓələ, va əɗet hiliŋgiɗi, gəɓet mesteɓeɗi, taseɗ na təbəz pepreŋge gəm ɓərzlimeɗi.

⁵ Vini Farisaɗe dit mərbaŋ-mahenziŋ assohõnən na: Vimi gewleɗ nok azbanən zəga narba an net dəhiŋgiɗəm ɓa, adawzəmaŋ way də vet mərga'ən di?

⁶ Yesu azlan sit na: Təstəsi Isaya agəɗ kəleŋ akokum məs muluvuluvuɗe, vi məverin na: Ɗiyiŋ də met adawgagdakawəni, ya mekret na farafaray səzawa.

⁷ Ɗari adagagdakawəni, an adarban sitin ɗiy mahenziŋ net ɗiyi.

⁸ Kəppanən mahenziŋ na Maŋgəlva, vi kazban mahenziŋ net ɗiyi.

⁹ Yaŋ Yesu anah sit əmpa na: Kəsənnənək əzgan mahenziŋ na Maŋgəlva, vi kawziwgin mahenziŋ nokum.

¹⁰ Vi Moyis anahək na: Agagdakan afuk dət moko, ɗəf an dəran afəni awaniɓa mani, kawbayni.

¹¹ Yaŋ nokum munokum tat ənahaŋ na: An ɗəf anah sənək afəni awaniɓa man na: An məs nərah səra zəga naw nabbah suko, akkpaŋgək korban (va wənah na nəpsənək Maŋgəlva).

¹² Kappanən dəgəɗgən zəga sən afəni awaniɓa sət man əmpa ɓa.

¹³ Də matuyokum vaski kan kədawzanən əpel na Maŋgəlva məs kədawkanən abe abe. Ya zəgeɗ tahəŋ diyɗa kədaɗɗaŋ vaska'e.

Zəgeɗ mərnokonən ɗəfa

¹⁴ Yesu ayek ɗiy əmpa azani, aɓsit na: Məprəmsu munokum pak ɗa, məpak sləmokum lewlewi.

¹⁵ Zəga tay an dədawtoŋ addəv ɗəf sə kəla gisbe dədawɓap əraygən ɓa, abbər zəgeɗ məzugilyoŋ sə makra ɗəfa, ndəɗaŋ dədawraygənəni. [

¹⁶ An ɗəf tay də sləman naprəma, dəprəma.]

¹⁷ Adan Yesu awɗak dit ɗiy atoŋ eŋgili, gewleɗ nan assohõnənək aka wənməkkpaŋga vani.

¹⁸ Yaŋ aɓsit na: Nokum pak kəsənən ɓa'a sa? Kəsənnən na zəga məs nappaka məs dədawtoŋ addəv ɗəf pak aɓap na ərnokon ɓa ɓa sa?

¹⁹ Vi atoŋ na a makran ɓa, addəvən adawtoŋgo, asna kawgilyen a gizbe. Vaski Yesu akkpeŋget zəgeɗ nawzəm pak salala.

²⁰ Yaŋ adawnəh əmpa na: Zəga məzugilyen səddəv ɗəfa, ndəni dədarnokoni.

²¹ Vi səddəvən, sə makra ɗəfa əɗɗumɗe mbəreyit adawgilyoŋgu, əkuh a gizbe, əhãla, əbaygəbaya,

²² polkoyo, əsim deleɗ diyɗa, ndarsak, tepelkeɗi, ɗarɗarə, hire, əpel mbərayən aka ɗəfa, əkaɓa, dərwa.

²³ Zəgeɗ daryawɗes pak səddəv ɗəf adawgilyoŋgu, ndəɗaŋ dədarnokonən ɗəfa.

Guluk zeŋvit ɗiy meɓɓet tətafək Yesu

²⁴ Adan Yesu asil sədaka, ambatək aka va na Tir. Atoŋguk addəv gəla, dəŋgəl ɗiy dəsənnəngən ɓa. Ya dəɓap əssan haɗamma ɓa.

²⁵ Ɗak məs wətət dit tuyeŋge akat təprəmək alabara nan ləŋgə, yaŋ təde aban ammba təlni.

²⁶ Guluk vat na Grekəktə mə Finikiya dələv na Siri. Təkkamanək Yesu vi dərɓahgən ətem səkat wətəta.

²⁷ Yaŋ Yesu anah sət na: Apet kirin dəbaŋ tagay, vi tay lew əgəm way net kirin kazgan sit kirtit kirɗe ɓa.

²⁸ Yaŋ təzlani, təɓsən na: Vaski Daya, kirtit kirɗe waffekeŋ məs dədawbəta səmmba vet kirni.

²⁹ Yesu anah sət na: Aka əpeləska, doko ətem agilik səkat wətuko.

³⁰ Ya səza təmbat eŋgil anatda, tərəhtək wətət tat ɗuffo aka zəga nafna, ətem agilke.

Yesu tay əmbəlgən goryom mərma hərzləmən

³¹ Yaŋ Yesu agil səka va na Tir, atoŋ də Sidon dəma pehe na Galile atoŋ dəka dələv net Walaŋ-gəleɗe-kəlawə.

³² Yaŋ məkisən goryom məza awɓap əpel ɓa. Akkamanənək dəɗigən van akani.

³³ Yesu agilgənik sə walaŋgit ɗiyi, aziwginik takərgəni, aguluk pərəm van a sləmani, atufuk mefɗe arəŋgənək hərzləmən.

³⁴ Yaŋ aɗi haran a disiŋ, ampəsə anah sən na. (Effata va ənəh na akolu.)

³⁵ Sləman kol ləŋgə, hərzləmən məs dərəm nak apəlka, apelik kotakə.

³⁶ Yesu abayək meti adawnahaŋ sənən ɗəf ɓa. Ya də abay met pak na, appasanənək wən nani.

³⁷ Ɗiy aggətaŋgək sawɓa, aɓɗaŋ na: An məs adaɗɗa pak moggoni. Yaŋ aɗɗa goryomɗe əprəmaŋgə, ɗiy məs hərzləmit mərman əpeleŋgi.