Markus 6 - Bible en Guidar

Ɗiy na Nazaret detafnən Yesu ɓa

¹ Yesu azarək sədaka, ambatək aka dələv nani, gewleɗ nan azbanənka.

² Adan pay naffet agapə, atəŋgək ərban sit zəga addəv gəla nakkal net mə Yudeɗi. Ɗiy diyɗa aprəmənək wən nani, aggətaŋka, aɓɗaŋ na: Səŋga arəh wənnəŋ di? Naway dəpsən maɗɗula nan gəm gagdak naɗɗe sekeneɗ vaŋ di?

³ Nam na ndəni məntar wəleŋɗe, wətət Miryam, məlmən Yakob, Yose, Yuda gəm Simoŋ ɓa sa? Milmiŋgiɗin məguliŋgit tahəŋ də mənam aŋka'a ɓa sa? Asan sitik ka zəga nazbərgiti.

⁴ Yaŋ Yesu aɓsit na: kawzeleni məskəleŋ an aka dələv nani, a walaŋgit ɗiy nani gəm a walaŋgit ɗiy naŋgil ananda.

⁵ Yesu dəɓap əɗɗa sekene adak təttaka dayday ɓa, abbər aɗiyək van aket məs gbəgbaɗe siɗikke ambəlgiti.

⁶ Yesu aggətək sawɓa vi tahəŋ də wətaf ɓa. Yaŋ abbal a walaŋgit gəleɗe na maŋgava nadaka, əyeget ɗiyi.

Əslin maslənɗe kəlaw kiyit sula

⁷ Ayek gewleɗ nan kəlaw kiyit sula atəŋgək əslənit sula sula. Apsitik gagdak aket əmpəsɗe mbəreyti.

⁸ Aɗi sitik wən nan na: Kədawgəmaŋ zəga avokum vi tive na malaka ɓa, zəga nawzəma ɓa, taɓak ɓa, suleyɗe na təbəz pepreŋ ɓa, abbər zleŋge kaka'ə.

⁹ Məgəm henseki, ya kədawguloŋ lukut sula ɓa.

¹⁰ Aɓsit əmpa na: Pay kəgapaŋ a walaŋgəla, məssoŋ addəv gəla məs mətafkum hã gap pay nawmbat nokum sədaka.

¹¹ An walaŋgəla tay məs dətafkum ɓa, aɓoŋguk daprəmkum, dawmbat sədak na, məttu hologudum səza təlkum, dərbangən na aɗɗaŋgək an dəslə ɓa.

¹² Ambataŋka, apelinik wən na Maŋgəlva sit ɗiyi dəɗiyaŋgən marava.

¹³ Arɓihinik tuyeŋɗe mbəreyit diyɗa, ambəlgitinik məs gbəgbaɗe diyɗa də əppay sit mẽlẽ.

Əmta na Yohanna məgəɗ baptem

¹⁴ Məlĩ Herodə aprəmək wən nani, iya na Yesu tay əzəm təkiya, yaŋ ɗiy adawnahaŋ na: Yohanna məgəɗ baptem dəsil səka əmta, vini asan də gbogboŋ naɗɗa sekeneɗ azani.

¹⁵ Ɗiy meɓɓet ənahaŋ na: Eliya yi, ɗiy meɓɓet əmpa ənahaŋ na: məskəleŋ va taka net məskəleŋɗe yi.

¹⁶ Adan Herodə aprəma, amna, Yohanna məs nəslən ərsla kiyən dəsili,

¹⁷ Vi Herodə armak Yohanna, azgan a fərsəna, aka batamət Herodiya guluk na Filip məlmən məs agəmə.

¹⁸ Vi Yohanna anah sənək Herodə na: tive tay abok kəgəmətgən ga məlmuk ɓa.

¹⁹ Vini Herodiya təzele gəm mat aka əbayən. Ya tawɓapən ɓa.

²⁰ Vi Herodə tay əgeslne sən Yohanna, asənək na ɗəf təstəs gəm salala yi; tay ətaɗni. Ya an aprəməka tay əttap sawɓa, də as pak tay əprəm wən nan də zən neki.

²¹ Adan pay va məwa Herodə agapə, agəɗək əzəm sit ɗiy gugriɗ nani, sit deyeɗe net məzəlpaŋgə gəm sit ɗiy gugriɗ na Galile.

²² Səza wətət Herodiya tətoŋgu, təskəlka, tənnekik zə Herodə dit ɗiy məs ayə pakə. Yaŋ məlĩ anah sət waŋ goruk nak na: Attokow an kəŋgəl pakə wanəpsuko.

²³ Asway sətək man taŋtaŋ na: An kədattokow pak wanəpsuko, dəsan pəɗak na məlĩ naw zlaŋgə.

²⁴ Waŋ nak təgilke, təssohot mat na: Mi nədassoh di? MAT təpsət na: Ki Yohanna məgəɗ baptem.

²⁵ Təmilik go'ləŋ aza məlĩ vi kassohon na: Nəŋgəl na kəpsugən kakaŋ ki Yohanna məgəɗ baptem addəv hĩlĩwe.

²⁶ Arəŋgənək məlĩ sawɓa, ya vi əsway nani gəm viyit ɗiy məyeti, dəɓoŋ sət ɓa.

²⁷ Yaŋ məlĩ aslən ləŋ məzəlpa də əɗi sən wən nan na dəkigən ki Yohanna məgəɗ baptem. Adan məzəlpa alə, arsla ki Yohanna sə fərsəna.

²⁸ Yaŋ aki kiyən nak addəv hĩlĩwe, apsət waŋ goruk nakə, nat tam təpsət mata.

²⁹ Adan aprəmən wən nani, gewleɗ nan pohu, agəmənək kigəbayni, aɗiyən addəv magamasə.

Yesu azəmgitik ɗiy gabal sle'i

³⁰ Yaŋ maslənɗe akkalaŋ aza Yesu. Anah sənən an aɗɗaŋ də an məs ayegetin ɗiy pakə.

³¹ Vi ɗiy diyɗa məzəzzoŋgu gəm məzumbataŋgə, hã Yesu dit gewleɗ nan awrahaŋ va nawzəm ɓa. Vini anah sit na: Mədam takərgəm a kapta-muyã, məffetgən siɗikke.

³² Ambataŋgək də bəlay takərgit a kapta-muyã.

³³ Ya ɗiy meɓɓet awletinik dawmbataŋgə, asinninke. Agilyoŋguk sə walaŋgəleɗe pakə, anzoŋguk də tilti, agapaŋgək daabəŋ ki Yesu dit gewleɗ nani.

³⁴ Səza Yesu aprik səddəv bəlay awlek ɗiy diyɗa. Awlak sasẽhti, vi tahəŋ va timiŋgiɗ məs tahəŋ də məzutaɗa ɓa. Atəŋgək əyagan sit zəgeɗ diyɗa.

³⁵ Adan pay atoŋgu, gewleɗ nan poh azani, aɓsənən na: pay atoŋko, təkiyəŋ kapta-muyã yi.

³⁶ Apsit tive sit ɗiy dəmbataŋgən a walaŋgəleɗe memeɗeŋɗe gəm a walaŋgəleɗe na maŋgava, dəlbahaŋgən zəga nawzəm sən kiyti.

³⁷ Yaŋ azlani, aɓsit na: Munokum sən kikum məpsit zəga nawzəma, yaŋ aɓsənən na: Kəŋgəl məlgən wəlbah meptekeɗ dit suleyɗe səkat sula, məpsitgən əzəm sa?

³⁸ Yaŋ Yesu anah sit na: Meptekeɗ mbarwaŋ avokum di? Məddoŋ mule. Adan awlenini, aɓsənən na: Meptekeɗ sle'əŋgə dit kilfeŋge sula.

³⁹ Aɗi sitik wən nan dənah sitingin dəssoŋgən ŋgbimŋgbim aka kevile məddəkani.

⁴⁰ Assoŋguk səkat səkatə, gəm kaklaw sle sle'i.

⁴¹ Yesu agimik meptekeɗ sle neki gəm kilfeŋge sula neki, aslanək haran a disiŋ agəɗək soko sən Maŋgəlva. Yaŋ arɗet meptekeɗi, apsit gewleɗ nani, gewleɗ tam dəpsitingin ɗiyi. Vaska'e awɗeket kilfeŋge sula nek sit ɗiyi.

⁴² Ndəɗaŋ pak azəmaŋka abaŋka.

⁴³ Akkalanənək meptekeɗ dit kilfeŋge en dəmbraŋgə agəɗək gadagarɗe kəlaw kiyit sula.

⁴⁴ Wəŋɗa net ɗiy məs dəzəmaŋ meptekeɗ agəɗək zel gabal sle'i.

Yesu tay ədaw aka pehe

⁴⁵ Yaŋ Yesu aska wəlet gewleɗ nan ləŋ dətoŋgoŋgən addəv bəlay, vi dəmbataŋgən daabəŋ kiyən a dəgar kəla Betsayda, nan tam tay əya ətaw tive sit ɗiyi.

⁴⁶ Adan appeti: Ndən mbat aka mossorgo metiŋ vi kakkama.

⁴⁷ Adan moskoy agəɗə bəlay tay addak pehe ya Yesu tay takərgən afuŋ.

⁴⁸ Awlek gewleɗ nan tay əgayaŋ əkəlvəɗ bəlay, heret sek aka səmyã, ba pumo yi, tay əzzan azet də ədaw aka pehe, agəɗək va nawtoŋ kiyti.

⁴⁹ Adan awlanən ədaw aka pehe, azet na məs məzvefi, anzlaŋgək vaŋvəla.

⁵⁰ Ndəɗaŋ pak awlanənka, ageslne'eŋke. Yaŋ apel sit ləŋgə, aɓsit na: Mərma mokrokum intə, kədawgeslne'eŋ ɓa.

⁵¹ Adan ateŋ azet addəv bəlay, səmyã ɓatə. Aggətaŋgək diyɗa sawɓa.

⁵² Vi dəprəmnən gabba wən net meptekeɗ nek ɓa, makret ɓəli.

Yesu tay əmbəlgit məs gbəgbaɗe aka kivadələv na Genezaret

⁵³ Səza agaraŋgə, atoŋgoŋ aka dələv na Genesaret, agapaŋ a mabuzgum.

⁵⁴ Adan agilyoŋ səddəv bəlay, ɗiy asənənək Yesu ləŋgə.

⁵⁵ Ɗiy abbalanənək kivadələv van pakə, yaŋ atəŋ əketin məs gbəgbaɗe məslet aka zəga nafna net a təki aprəmən na tay adaka.

⁵⁶ Də təki ammbat pakə, a walaŋgəleɗe memeɗeŋɗe, a walaŋgəleɗe gugriɗe awaniɓa a walaŋgəleɗe na mapoho, tahəŋ əɗinin məs gbəgbaɗe a gəlet lumiɗi, əkkamanən dəpetigən dərəŋgənəngən gabba lukut nan daydayə, en məs dərəŋgənən pak ambəlaŋka.