Markus 5 - Bible en Guidar

Yesu tay əmbəlgən ɗəf məs əmpəs mbərayən akani

¹ Yaŋ agapaŋ dəggar dəma buzgum na pehe dəda, aka dələv net mə Gerasɗe.

² Aka agil səddəv bəlayə, ɗəf mitemin agilik səddivit magamasɗe ləŋ ələm səni.

³ Addivit magamasɗe adawsani, ɗəf tay dədawɓap əɓrukun dit ngiyamɗe dayday ɓa.

⁴ Vi təl ɓəɓɓay adaɓrukuni dit sakazlaŋɗe gəm dit ngiyamɗe, ya aɓuhik ngiyamɗe dit sakazlaŋɗe, ɗəf tay dədawɓap əziwgin ɓa.

⁵ Dəfəɗ də kapay pak tay əbbal addivit magamasɗe, də aket mossorgoɗe gugriɗe, tay əɗi geŋgere gəm əntaran zən dit gərmeŋge.

⁶ Adan awla Yesu səka faraɗa, adek dinze, appu' abani,

⁷ aŋgəzlək vaŋvəl dayadaya, amna: Mi a walaŋgu də is di Yesu Wətən Maŋgəlva Məsəɗəɗə, In tat əkkamok də iya na Maŋgəlva, kədawzəmgu sahã ɓa.

⁸ Vi Yesu tay ənah sən na: əmpəs mbərayən agil səka ɗəfəŋka.

⁹ Yaŋ Yesu assohoni: Mbari iya nok di? Azlan sən na: iya naw na Ngboŋgu, vi diyɗa mənani.

¹⁰ Akkamanək Yesu sawɓa, vi adarɓəhit səka kivadələv van ɓa.

¹¹ A maŋgava Mossorgo metiŋ vani ngaɓa net vedemɗe tay ətaɗ adaka.

¹² Yaŋ əmpəsɗe mbəreyit nek akkamanən Yesu dawnəh na: Aslənəm aket vedemɗe vi mətoŋgən aketi.

¹³ Yesu ambər sitik tive. Adan əmpəsɗe mbəreyit agilyoŋgu, ambataŋgək əgul aket vedemɗe. Ngaɓa arɓəslək sə mabuzgum məɓayən, abətaŋgək a pehe, vedemɗe gap zəga na gabal sula azaŋgək a pehe.

¹⁴ Məzuteɗtin anzoŋguk, akanən alabara a walaŋgəla-metiŋ gəm a walaŋgəleɗe na mapoho nani. Yaŋ ɗiy azzoŋ ula zəga an dəgəɗə.

¹⁵ Adan agapaŋ aza Yesu, awlanənək ɗəf mitemin nak ɗewwe, aguluk lukut azani, də maɗulan moggon ndən məs dəsan də ŋgboŋ net tuyeŋge akan naka. Ageslne'eŋke.

¹⁶ Ɗiy məs dulanən anah sitinik an məs dəgəɗ aka ɗəf mətemin də aket vedemɗe.

¹⁷ Yaŋ atəŋ əkkamanən Yesu dəmbatgən səka dələv neti.

¹⁸ Adan Yesu adawpeŋ addəv bəlay, ɗəf məs də ətemɗe nak akkamanək Yesu kawmbat dəndəni.

¹⁹ Yesu dəpəl sən tive ɓa, yaŋ anah sən na: Amndok eŋgil anokda azet ɗiy noko, arban sit an Daya agəɗ viyuk pak gəm va awəl sahã nan akoko.

²⁰ Ɗəf nak mbatə, yaŋ atəŋ ənah an məs Yesu agəɗ sən aka dələv məs adawyaŋ na Walaŋ-gəleɗe-kəlawə, ɗiy pak aggətaŋka.

Wətən Zayrus dət guluk məs tərəŋgən lukut na Yesu

²¹ Adan Yesu aggar də bəlay, dəma buzgum mambərni. Ɗiy diyɗa akkalaŋgək azani. Ya nan tay ama buzgum na pehe.

²² Taka səret deyeɗe na gəla nakkal net mə Yudeɗ pohu, ɗəf məs adawyaŋ na Zayrus. Adan awla Yesu akdukuk abani.

²³ Akkamanək Yesu diyɗa amna: Wətu tat gu'o aza əmta. Ade aɗi vok akata təkõhgəni, təsatgən madarata.

²⁴ Yesu ambatək dəndəni. Ɗiy diyɗa azbanənka, tahəŋ akan ɓəsɓəsə.

²⁵ Guluk tat adak də gbəgba' na əzəlaha əzva kəlaw kiyən sula.

²⁶ Təmbatək azet zloktorɗe aŋɗaŋ ɓa, təzanək arya nat pakə. Ya dəɗah tay səka gbəgba' nan ɓa, abbər ənzləran zəni.

²⁷ Adan təprəm wən na Yesu: Təguluk aweleŋgit ɗiy kəla dərɓagani, tərəŋgən gabba lukut nani.

²⁸ Vi təɗɗumək na: An nərahək ərəŋgən lukut nan kaka'ə, wənəmbələ.

²⁹ Wəzəlah nat arslək go'ləŋgə, təsənək aza gəɓa zət na təmbələk səka gbəgba' nata.

³⁰ Ya Yesu asənək ləŋ na gbogboŋ agilik səzani. Akkpaŋganək haran aweleŋgit ɗiyi, amna: Naway dərəŋgən lukut naw di?

³¹ Gewleɗ nan aɓsənən na: Is tat ule ɗiy tahəŋ wəhaslakuni, yaŋ kəmna: Naway dərəŋgu di?

³² Ya nan tay ula kiyən tərwəslə vi kawla ɗəf an dərəŋgəni.

³³ Guluk nak tətəŋgək əker sən geslne vi təsənək an məs dəgəɗ azata, tədek təkdukuk abani, tənah sənək gesiŋ na mat pakə.

³⁴ Yesu aɓsət na: Wətuwa, ətaf nok akõhgukko. Dok zayə, ambəl səka gbəgba' noko.

³⁵ Aka Yesu dəɓəl əgrak əpel nan tagay ɓa, ɗiy azzoŋguk siŋgil ana daya na gəla nakkal net mə Yudeɗ naka, aɓɗaŋ na: Wətuk təmtəka, vimi əyan Mərbəzəga əmpa di?

³⁶ Ya Yesu dəɗɗum aka əpel məs adawpeleŋ ɓa. Aɓsən daya na gəla nakkal net mə Yudeɗ nak na: Kəgeslne' ɓa, ataf kaka'ə.

³⁷ Yesu dəpəl ɗəf taka zlaŋ əzban ɓa, abbər Piyer də Yakob gəm Yohanna, məlmən Yakob.

³⁸ Adan agapaŋ eŋgil ana daya na gəla nakkal net mə Yudeɗ da, awlek ɗiy məttepti, tay əhəmaŋgə gəm əska morkoyo diyɗa.

³⁹ Adan Yesu atoŋ eŋgili, aɓsit na: Vimi kəttapaŋ gəm kədaskaŋ morkoyo də wəhəm di? Waŋ təmtə ɓa, wəleŋ tədawleŋge.

⁴⁰ Amasaŋgək akani. Adan agilgit pakə, yaŋ agəm afət dət mata gəm gewleɗ nan hoku neki, atoŋ a təki waŋ təsata.

⁴¹ Armak vat waŋ vatə, aɓsət na: Talita kum, (va wənah na: Wakə, in tat ənah suko asili).

⁴² Waŋ təsilik ləŋgə, tətəŋgək ədawa, vi də əzva kəlaw kiyən sula tə, ɗiy aggətaŋgək sawɓa.

⁴³ Yesu abayək met sawɓa vi adawnah sənən ɗəf ɓa. Yaŋ anah siti: Məpsət əzəma.