Markus 4 - Bible en Guidar

Wənməkkpaŋga na məzəslga

¹ Yesu atəŋgək əyeget ɗiy əmpa ama pehe. Ɗiy diyɗa akkalaŋgək azani, hã ndən peŋ addəv bəlay aka pehe, adak ɗewi. Ɗiy pak tahəŋ a mabuzgum ama pehe.

² Ayagan sitik zəga diyɗa də wənməkkpaŋga. Anah sitik addəv əyak nan na:

³ Məprəma! Məzənse agilik kaslga.

⁴ Adan adawndolni, zeŋve maɓɓan abətək aka tive, biŋgeɗ azzoŋko, ayaɗənənka.

⁵ Maɓɓan bət aka soyomo, təki məs dələv tay adak diyɗa ɓa. Agilik go'ləŋgə, vi dələv tay kpum ɓa.

⁶ Adan pay azlahə, azləka, aŋkəlka, vi suwerin tahəŋ ɓa.

⁷ Maɓɓan əmpa bət awalaŋgit gedirgeɗi, degirgeɗ aɓayaŋka, asuknənka, dəpok ɓa.

⁸ Ya zeŋveɗe meɓɓet ayyo'oŋguk aka dələv moggoni, agilyoŋko, aɓayaŋka, apokoŋko. Maɓɓan kaklaw hoku, maɓɓan kaklaw sləre, maɓɓan səkatə.

⁹ Yaŋ Yesu anah sit kana: An məs də sləman naprəma dəprəma.

Vimi Yesu adawpel dit wənməkkpaŋgaɗe di

¹⁰ Adan asan takərgəni, ɗiy dəkaraŋ kiyən dit gewleɗ nan kəlaw kiyit sula, assohõnənək aket wənməkkpaŋgaɗe naka.

¹¹ Azlan sitike: Nokum Maŋgəlva arban sukumək wən məɗama na məlĩ nani. Ya ɗiy eŋki, en nappaka, kawpel sit zəgeɗ pak də wənməkkpaŋgay.

¹² Vi vaski, Wawlaŋ də hereti, ya asənən na ɓa. Waprəmaŋ də sləmeti, ya aprəmnən na ɓa. Vi adawmilyoŋ əɗi marava ka mambray net dəvvugən ɓa.

Yesu tay əboton wənməkkpaŋga na məzənse

¹³ Yaŋ Yesu aɓsit na: Kəprəmənən wənmakkpaŋgaŋ ɓa sa? Ya mbarmbar kədaprəmin wənməkkpaŋgaɗe en pak di?

¹⁴ Məzəzlga tay əzlga wəpel na Maŋgəlva.

¹⁵ En naka tive na, ndəɗaŋgə en məzlga əpel addivti, ya səza əprəmənən ləŋgə, Satan pay əpel an məzlgan addivit gəmə.

¹⁶ En naka təki soyomo na, ndəɗaŋgə, an aprəmənək əpel na, ndəɗaŋ ətafən dətaf go' də ənneke;

¹⁷ ya tahəŋ də suwerit ɓa, wassoŋ ammba pay siɗikke, an tatwãh awaniɓa əsərma adek aka wən na Maŋgəlva, ndəɗaŋ ərəh tive naskoto.

¹⁸ En məzlget addivit gedirgeɗi, ndəɗaŋgə en dəprəmən əpel na Maŋgəlva,

¹⁹ ya əŋgla na zəga negge, wərak na arya, də əsim zəgeɗ meɓɓet temtem dədawtoŋgoŋ gəm əsuk əpel na Maŋgəlva naka, kpaŋ awpok ɓa.

²⁰ En məzlget aka təki moggoni, ndəɗaŋgə en dəprəmen əpel na Maŋgəlva, dətafnəni, dəpokoŋgu, mbərən kaklaw hoku, mbərən kaklaw sləre, mbərən səkatə.

Wənməkkpaŋga na lalam

²¹ Yesu aɓsit na: Awkiyaŋ lalam vi kawɗup mosgoy akani awaniɓa kawɗiyən ammba zəga nawvoŋ sa? Namna vi kawɗiyən a təki nawɗi lalam iyi ɓa sa?

²² Vi an mətərən pak wappas appaka ta'ə, tay an məɗama məs agil na appaka ɓa ɓa.

²³ An ɗəf də sləman naprəma dəprəma.

²⁴ Yesu aɓsit na: Məzi zukum aza an kədaprəmaŋgə. Zəga məs kədawslenin ɗiy dəndənəŋka, dəndəni adawslukuməni, kapsukumi meŋgeslin azan əmpa.

²⁵ Vi ɗəf an də zəga avani kapsəni, məs dərah zəga ɓa, kawmõhni an navan daydayə.

Wənməkkpaŋga na zeŋve məzugilyen na kini

²⁶ Yesu anah əmpa na: Məlĩ na Maŋgəlva tay va ɗəf məzundol zeŋve aka dəlvafuŋ.

²⁷ Dəsan məleŋgin awaniɓa darani, dəfəɗ də kapaya, zeŋve wagili, waɓayə, məza ndən əsənən va mbari di ɓa.

²⁸ Vi dəlvafuŋ tay əgilgin an məzlgan na kini: Dabəŋ gaslamba, siske əpoko, siske kan na haykəmari əɗi aran ngərãy.

²⁹ Ya an asəɓka, tay əpak sən slogoy ləŋgə, vi əbəl agapka.

Wənməkkpaŋga na zeŋve na meslene

³⁰ Yesu amna: Də mi mədawsla məlĩ na Maŋgəlva di? Də wənməkkpaŋga awan mədawslan di?

³¹ Tay va zeŋve na meslene, an məzlgəti afuŋ na, ndətə muzliyak day səmmbet zeŋveɗe naka dələv pakə.

³² Ya pay məzlgəta, watəgili, watəɓay daykiyit zəgeɗ məslget pak də gaslamba kivat waskə diyɗa hã biŋgeɗ na disiŋ wazzoŋ əzaɓən gəla net ara zeŋgile nata.

³³ Də wənməkkpaŋga vas diyɗa apel sit wən na Maŋgəlva, va adawɓap əprəmaŋgə.

³⁴ Awpel sit məza də wənməkkpaŋgay ɓa ɓa. Ya an takərgitiŋ, ndən əbotet zəgeɗ pak sit gewleɗ nani.

Yesu tay əɓitgit barkataŋ

³⁵ Moskoy nan dəpaska, Yesu aɓsit gewleɗ nan na: Məggar səm dəma buzgum dəda.

³⁶ Adan appet ɗiyi, gewleɗ nan akanənək addəv bəlay məs asan addəvən. Bəlayɗe meɓɓet tahəŋ a maŋgavani.

³⁷ Barkataŋ asilyoŋguk də gagay, vovolumɗe tay əslkərən bəlay, hã bəlay əŋgla əknah dit iŋkile.

³⁸ Ya nan tay aza gabba bəlay dərɓe, kiyən aka antoŋ məleŋgin. Yaŋ afɗahanəni, aɓsənən na: Mərbəzəga assok mədawzaŋ ɓa sa?

³⁹ Adan afɗahə, ahayanək barkataŋ, anah sən pehe na: Aɓət ɓatə, barkataŋ aɓətək gipi, zəga pak asanək sləɓəkə.

⁴⁰ Yaŋ aɓsit na: Vimi kəssoŋ məgeslne'ɗe di? Kətafaŋ ɓa'e sa?

⁴¹ Ageslne'eŋgik sawɓa, yaŋ anahaŋ awalaŋ zit na: Aŋ ɗəf mi aŋ di, barkataŋ də pehe pak əprəmnən manəŋ di?