Markus 3 - Bible en Guidar

Yesu tay əmbəlgən ɗəf pay naffete

¹ Yaŋ atoŋ addəv gəla nakkal net Yudeɗ əmpa. Ɗəf məs van məmtən tay adaka.

² Yaŋ adasiviwnin Yesu, kawlan an wambəlgən pay naffete, vi kawkay sən heslepe.

³ Yesu anah sənək ɗəf van məmtən nak na: Asili, aziw addak təkiya.

⁴ Yaŋ aɓsit na: Tive tay naɗɗa wəza moggon awaniɓa wəza mbərayən pay naffet sa? Wəkõhgən ɗəfa awaniɓa əɓayni? Ya ndəɗaŋ ɓata'ɓata'ə.

⁵ Yesu abbalanək haran aket na gədəv nawda, makra ɓəɓəl net assanəka. Yaŋ aɓsən sən ɗəf nak na: Appar voko. Apparək vani. Van nak ambəlka.

⁶ Farisaɗe agulyoŋko, aslerinik met ləŋ dit mə Herodəɗe aka Yesu, vi kawrəh tive nawzani.

Ɗiy diyɗa tay əzzoŋ aza Yesu

⁷ Yaŋ Yesu dit gewleɗ nan abit də ma pehe. Ɗiy diyɗa azbanənka, dəzzoŋ sə Galile sə Yude,

⁸ sə Yerusalem, səka dələv na Idumaya, sə bal sən məlpa na Yurdeŋ, gəm səka dələv na maŋgava Tir də Sidon. Ɗiy diyɗa azzoŋguk azani, vi aprəmən an adaɗɗa.

⁹ Yaŋ anah sit gewleɗ nan dəkayaŋ sənəngən bəlay, vi ɗiy adawhaslanən ɓa.

¹⁰ Vi ambəlgitik ɗiy diyɗa, ndəni ɗiy en də gbəgba' pak adakkalaŋ akan vi kawrəŋgəni.

¹¹ An məs əmpəs mbərayən aket awlanənək Yesu, ndəɗaŋ əzbəraŋ abani, ənzlaŋ vaŋvəl ənahaŋ na: Noko, Wətən Maŋgəlva kənani.

¹² Yaŋ Yesu ateke, adarbanən na ndəni ɓa.

Yesu tay əwel maslənɗe kəlaw kiyit sula

¹³ Yaŋ Yesu ateŋ aka mossorgo metiŋ, aye ɗiy məs aŋgələ, azzoŋ azani.

¹⁴ Awelik kəlaw kiyit sula, apsit iya na maslənɗe. Vi dəssoŋgən dəndəni, kawslənit ərba wəna,

¹⁵ də gagdak narɓəh tuyeŋge.

¹⁶ Awelik kəlaw kiyit sula: Simoŋ məs apsən iya na Piyer,

¹⁷ Yakob wətən Zebede də Yohanna an məlməni. Apsitik iya na Bonerges, va wənah na kirtin əhay na buna.

¹⁸ Andre, Filip, Bartelemi, Matiye, Tomas, Yakob wətən Alfe, Tadde, Simoŋ mə Kanan,

¹⁹ gəm Yudas Iskariyot məs dəzəm kini.

Ɗiy na Yesu met aka wəkani

²⁰ Yesu amilik eŋgili. Ɗiy akkalaŋgək azan əmpa, hã dəɓap ərahaŋ va nawzəm way ɓa.

²¹ Adan hilfiŋgiɗin aprəmənəni, agilyoŋguk ədda ərmani, vi aɓɗaŋ na: Maɗɗulan azlzlaɓka.

Yesu tay əzlan aka wən na dolgoy məpel akani

²² Mərbaŋ-mahenziŋ dəzzoŋ sə Yerusalem aɓɗaŋ na: Tay də Belzebul akani; də məlĩ net tuyeŋɗe adarɓih tuyeŋɗe!

²³ Ndən dah əyet azani, aɓsit də wənməkkpaŋga na: Mbarmbar Satan adawɓap əgilgin Satan di?

²⁴ An məlĩ awɗakanək zən na, məlĩ nan aɓap na əziw ɓa.

²⁵ An daŋgla awɗakanək zən na, asna daŋgla nan aɓap na əziw ɓa.

²⁶ An Satan asilik əgay ka zəni, məlĩ nan awɗakka, aɓap na əziw ɓa, abayək mani.

²⁷ Ɗəf aɓap na ətoŋ ana ɗəf gurom da kawnda arya nan an dəɓruk ɗəf gurom van tagay ɓa ɓa; asna waklomon gəla nani.

²⁸ Gesiŋ nədawnah sukum: Kavvuyon siti heslepe net ɗiy də wəpel mbərayən məs adawpeleŋ aka Maŋgəlva pakə.

²⁹ Ya ɗəf dəpel mbərayən aka Zeŋgile Salala na, arah na əvvuyon mambray nan ɓa hã faɗə, araygənək də heslepe an faɗə.

³⁰ Vi anahaŋgək na: tay də əmpəs mbərayən.

Ma Yesu dit milmiŋgiɗin

³¹ Yaŋ ma Yesu dit milmiŋgiɗin azzoŋgu. Aziweŋ appaka, aslənaŋ azan wəyani.

³² Ɗiy diyɗa tahəŋ ɗewɗew kiyən karkarə. Aɓsənən na: Mok dit milmiŋgiɗuk tahəŋ appaka əkayokuni.

³³ Azlan sitike; amna: Nawattə əmma di? Mədəŋgaŋ milmiŋgiɗu di?

³⁴ Abbalanək haran aket ɗiy en dəssoŋ ɗewɗew kiyən karkar neki, amna: Akəŋtə əmma dit milmiŋgiɗwa.

³⁵ Vi ɗəf məgəɗ əŋgla na Maŋgəlva pak ndəni məlmuwa, ndəni məlmu məguluŋguta gəm əmma.