Markus 2 - Bible en Guidar

Yesu tay əmbəlgən ɗəf zə məmtəni

¹ Dərɓaga əvoŋ siɗikke, Yesu amilik a Kafarnahum. Ɗiy aprəmənək na tay eŋgili.

² Ɗiy akkalaŋgək azani hã təki tay dəmbər ɓa, də memeŋgle pakə. Yaŋ Yesu arbə sit wəna.

³ Yaŋ ɗiy meɓɓet azzoŋ azani, akisənən ɗəf zə məmtəni, ɗiy poɗo dəslanəni.

⁴ Ya dəɓap əgapgənən aza Yesu ɓa vi ɗiy tahəŋ diyɗa. Vi vaski abətən kigəla a təki məs Yesu asani. Adan atilikini, apriginin ɓərzləma məs məvoŋgən ɗəf zə məmtən akan naka.

⁵ Adan Yesu awla ətaf neti, aɓsən ɗəf zə məmtən nak na: Wətuwa, mambrayɗe nok avvuyoŋko.

⁶ Mərbaŋ-mahenziŋ tahəŋ adak siɗikke ɗewɗewi, yaŋ aɗɗumoŋ a mekret na:

⁷ Vimi ɗəfəŋ adawpel vaŋ di? Tay əran Maŋgəlva, naway nawɓap əvvuyon mambray an Maŋgəlva yi kaka ɓa di?

⁸ Adan Yesu asən ləŋ na vas adaɗɗumoŋ a mekreti, aɓsit na: Vimi kədaɗɗumoŋ a mokrokum vas di?

⁹ Tatwãh mi eske di, ənah sən ɗəf zə məmtən na: «Mambrayɗe nok avvuyoŋko sa» awaniɓa ənah na: «Asili, agəm ɓərzləma nok doko!»

¹⁰ Ya vi kəsənəngən na Wətən Ɗəf tay də gagdak navvuyon mambray aka dəlva na, aɓsən ɗəf zə məmtən nak na:

¹¹ In tat ənah suko: Asili, agəm zəga nawvoŋ noko, dok anokda.

¹² Ndən le'i, aslan ɓərzləma nan ləŋgə, agil keret ɗiy pakə, aggətaŋgək diyɗa, agagdakanənək Maŋgəlva aɓɗaŋ na: Məwəl ɗah zev zəga vaŋ ɓa.

Yesu tay əya Levi

¹³ Yesu ambatək əmpa, kəla ma pehe na Galile. Ɗiy diyɗa azzoŋguk azani, yaŋ adawyegeti.

¹⁴ Dawtoŋ na, awlak Levi wətən Alfe tay tuŋngo addəv gəla nawfaɗ nzalaka. Aɓsən na: Azbawa. Yaŋ asil azbani.

¹⁵ Yaŋ Yesu asan ana Levi da vi kawzəma. Məkkalaŋ nzalaka diyɗa dit məs mambrayɗe assoŋ kawzəm də Yesu gəm dit gewleɗ nani, vi məzəzbanən tahəŋ diyɗa.

¹⁶ Adan mərbaŋ-mahenziŋ dit Farisaɗe awlanən dawzəm dit məs mambrayɗe gəm məkkalaŋ nzalaka, aɓsitin gewleɗ nan na: Vimi adawzəm dit məkkalaŋ nzalaka gəm dit məs mambrayɗe di?

¹⁷ Adan Yesu aprəma, amna: Ɗiyen də zay na gəɓa zitiŋ də wəray na zloktor an məs gbəgbaɗeŋ ɓa ɓa. Nəde vi kawye ɗiy en salala ɓa, abbər ɗiy məs mbəreyti.

Yesu gəm əɗɗa meme

¹⁸ Gewleɗ na Yohanna məgəɗ baptem dit Farisaɗe aɗɗaŋ meme. Yaŋ azzoŋgu, anahaŋ sənən na: Vimi gewleɗ na Yohanna məgəɗ baptem gəm gewleɗ net Farisaɗe adaɗɗaŋ meme ya gewleɗ nok na aɗɗaŋ meme ɓa di?

¹⁹ Yesu azlan sit na: Ɗiy məyet a təki əɓel aɗɗaŋ meme an məzuɓel tay dənɗaŋ sa? Agəɗ na ɓa. Aɓapaŋ na əɗɗaŋ meme an tay dənɗaŋ ɓa.

²⁰ Pay wade, pay adawgəmnən məzuɓel səzet na, asna pay nani, waɗɗaŋ meme.

²¹ Ɗəf tay nawɗi sən lukut məzvan də gabaga meleketen ɓa, vi gabaga meleketen watəɗ lukut məzvani, əŋgar nan wasan ɓetteŋɗeŋgi.

²² Ɗəf tay nawzi mbazla na meketepe addivit kenekeneɗ məzvet ɓa, vi mbazla waɓih kenekeneɗi, mbazla dit kenekeneɗ pak warayaŋgə. Ya ɗəɗah əzi mbazla na meketepe addivit kenekeneɗ meleketeti.

Yesu gəm pay naffete

²³ Adan adawtoŋ dəddəv guli na haykəmari pay naffete, gewleɗ nan atəŋgaŋgək ənzla ki hay tive tive.

²⁴ Yaŋ Farisaɗe aɓsənən na: Awle an adaɗɗa pay naffete, tive nan tay ɓa.

²⁵ Yaŋ aɓsit na: Kəŋɗanən ɗah an məs Davit agəɗ aka asan də wəraya gəm mãy ada ndəni gəm ɗiy namban ɓa sa?

²⁶ Va atoŋ addəv gəla na Maŋgəlva, pay na Abiyatar daya net məsdəlveŋge, azim meptekeɗ məs məpsin Maŋgəlva, məs ɗəf tay də tive nawzəmit abbər məsdəlveŋge ɓa ɓa, gəm apsit ɗiy en dəndəni.

²⁷ Yaŋ aɓsit na: Məɗɗa pay naffet na vi ɗəfi. Məɗɗani ɗəf vi pay naffet ɓa.

²⁸ Vi vaski Wətən Ɗəf van afən pay naffeti'e.