Markus 14 - Bible en Guidar

Deyeɗe tay əslerin met aka Yesu

¹ Apələk əvoŋ sula əzləra na Pak dit meptekeɗ məza wuɗo ɓa dəgəɗgəni. Deyeɗe net məsdəlveŋge dit mərbaŋ-mahenziŋ akayaŋgək tive karman də kuket kawbayni.

² Aɓɗaŋ mədarman pay əzləra ɓa, vi wən adawsilyen aweleŋgit ɗiy ɓa.

Guluk təmanək tursan aka ki Yesu

³ Yesu tay a Betani eŋgil ana Simoŋ məskokolo da. Guluk toŋ azan aka asan əzəma. Bəbər na tursan na nard məs əlbah nan tuwãh diyɗa tay avat kawwã məknahən addəvən. Ndət ma bəbər nak poŋ təman tursan van aka ki Yesu.

⁴ Ɗiy meɓɓet sə waleŋgit azeleninik də əzelen wən nani: kami əraygən tursanəŋ vaŋ di?

⁵ Kawvəlni tursan van kəta dayki koɓeɗ səkat hoku kapsit məssehẽŋɗe ɓasa. Yaŋ adawdaŋ gədəv akata.

⁶ Yaŋ Yesu amna: Məppata! Vimi kədawzəmgətən sahã di? Wəza moggon təgəɗ suwa.

⁷ Məssehẽŋɗe tahəŋ də munokum pay pakə, wakəɓapən wəɗɗa sit mogon pay kəŋglaŋ pakə. Ya naw na, kərəhwən na pay pak azokum ɓa.

⁸ An tədawɓap əɗɗa na, təɗɗaka; təman suwək tursan dafsən aza zu vi kawndəkwa.

⁹ Gesiŋ nədawnah sukum: A təki adawpelin Wən Nenek aka dələv də wən nani, kawpeli aka an ɗakkəŋ təgəɗəŋka'e, vi kaɗɗumon wən nata.

Yudas tay əŋgla əpsit Yesu sit deyeɗe net məsdəlveŋge

¹⁰ Yaŋ Yudas Iskariyot, taka səret gewleɗ kəlaw kiyit sula, ambat azet deyeɗe net məsdəlveŋge, vi kapsit Yesu.

¹¹ Adan aprəməni, annekeŋke, yaŋ aynanən napsən koɓeɗi. Yas akay pay an dəslə kapsit Yesu.

Yesu tay zəm way na Pak dit gewleɗ nani

¹² Pay maddaabəŋ net peŋɗe məza wuɗo ɓa, pay məs adawtawaŋ wəlet zəgeɗ na Pakə, gewleɗ nan aɓsənən na: Aŋga kəŋgəl məmbatgən əda suk way na Pak di?

¹³ Ndən slən sula səweleŋgit gewleɗ nani, aɓsit na: Mugul a walaŋgəla, ɗəf də hinziw akan waze ələm sukum; məzbani,

¹⁴ A təki adawtoŋgo, mənah sən afən gəla van na: Mərbəzəga amna: ngay gəla nədawzəm Pak addəvən dit gewleɗ naw di?

¹⁵ Nan warban sukum giziŋ metiŋgin addəv məzarŋgasla məzaɓan zaɓə. Adaki kədawzeɓet səmən zəgeɗi.

¹⁶ Gewleɗ nek adoŋko, aguloŋguk a walaŋgəla-metiŋ, arəhənək zəga pak va anah siti, azaɓanənək əzəm na Pak.

¹⁷ Adan moskoy agəɗə ndən pay dit gewleɗ kəlaw kiyit sula neki.

¹⁸ Aka assoŋ adawzəmaŋgə, Yesu amna: gesiŋ nədawnah sukum, taka səmbokum məzuzəm də ina, wazəm kiwa.

¹⁹ Wən van abayək ziti, ndəɗaŋ təŋ ənahaŋ sənən takataka na: intə sa?

²⁰ Aɓsit na: Taka narokum kəlaw kikum sulay: Ɗəf məs dədawgul van də in addəv hĩlĩwiŋki.

²¹ Wətən Ɗəf, wamtə va məver wənnani. Ya əray aka ɗəf məs dədawzəm ki Wətən Ɗəf vanəska. Ɗəɗah sən va muwani ɗəf nan ɓa.

Way salala

²² Gala adawzəmaŋ, Ndən mepteke gəmə, agəɗək soko sən Maŋgəlva, arɗanka, apsit dawnəh na: Məgəma, gəɓa zuwi.

²³ Siske agəmtək huloŋguk nawsa zəga; səza agəɗ soko sən Maŋgəlva, apsittəka, asaŋ pakgit səddəvta.

²⁴ Aɓsit na: Eŋ mbel zuwəŋ, mbel na wənmiyna, məs dəggbo'oŋ viyit ɗiy diyɗa.

²⁵ Gesiŋ, in tat ənah sukum, sessel nəsə na ɗah mbazla na uwa net megezlembirkeɗ ɓa, hã gap pay an nədawsa an meleketen addəv məlĩ na Maŋgəlva.

²⁶ Səza ayaŋ gəlyanalva, agilyoŋ addoŋ aggərəm net heremeɗi.

Yesu tay ərban na Piyer wanah na dəsən ɓa

²⁷ Yesu aɓsit gewleɗ nan na: Munokum pak wakərgisleŋ də zəga nazbərgukum, vi məverni na: Wanəbay məzutaɗa, timiŋgiɗ watərayaŋgə.

²⁸ Ya pay nədawsilyew səka əmta, wanəmbat daabəŋ kikum a Galile.

²⁹ Piyer aɓsən na: Kəta ɗiy pak dəskotoŋ aka wən nok na, naw agəɗ na akaw ɓa.

³⁰ Yesu azlan sənəka: Gesiŋ nədawnah suko, dəfɗəŋka, tak gəmnda adawhəm təl sula, wakənah na kəsənu ɓa təl hoku.

³¹ Ya ndən ɓoŋ əbay ma: Kəta dərbə na wanəmtə də is zlaŋ, sessel nənah na vas ɓa. Vas anahaŋ pakgiti.

Yesu tay əkkam a Getsemane

³² Ndəɗaŋ gap a təki adawyaŋ na Getsemane, Yesu aɓsit gewleɗ nan na: Məssoŋ aŋ pay nədakkama.

³³ Yaŋ agəm Piyer də Yakob gəm Yohanna ambani. Atəŋgək əttəman geslne də əkkere.

³⁴ Aɓsit na: Megenegenew addakək hã va nawbaywa. Məssoŋ aŋka məga.

³⁵ Ambatək abe siɗikke, akduk afuŋ, akkamə, va wagəɗ pay na tatwãhəŋ dəzargən səzani.

³⁶ Amna aw Əbba, Afuwa, zəga pak tay tuwãh azok ɓa. Azargət huloŋguk na əzəm sahã kəŋ səzawa. Ya agəɗ va an nəŋgəl ɓa, abbər va an kəŋgələ.

³⁷ Ndən bəryok, arih məleŋti. Aɓsən Piyer na: Simoŋ, istat əleŋ sa? Kəɓap əgan ənziya vok gbi' ɓa sa?

³⁸ Məga, məkkamə vi kədawtoŋgoŋ addəv wərak ɓa. Maɗɗula guromi yi, ya gəɓa zə ɗəf məddakni hara.

³⁹ Ndən mbat əmpa, akkam də əpel wən məstaka.

⁴⁰ Adan amə' əmpa na, arih məleŋti, vi heret tay simrim-simrimi.

⁴¹ Ndən mil mahokoni, aɓsit na: Mənokum tat əleŋge' gəm əffet sa? Agrakka. Pay agapka, məppani Wətən Ɗəf avet məs mambrayɗe.

⁴² Məsili, mədamə. Awla ɗəf nawzəm kiyu yaŋ go'o.

Ərma na Yesu

⁴³ Aka tay əpel tagayɗa, Yudas taka səmmbet gewleɗ kəlaw kiyit sula poh ləŋgə. Vanday dit masalamɗe gəm zleŋɗe ammbani, deyeɗe net məsdəlveŋge dit, mərbaŋ-mahenziŋ dit ɗiy məsɓet dəslinnini.

⁴⁴ Ɗəf dəzəm kiyən arban sitik zəga nawsənən azani, amna: Ɗəf an nədaklak vaw awlani, ndəni, mərma, məka də ətaɗən moggoni.

⁴⁵ Əgap nan ləŋgə, ndən zar aza Yesu, aɓsən na: Mərbəzəga! Yaŋ aklak van awlani.

⁴⁶ Mambərgit ɗiy aɗiyən akkalaŋ akan armanəni.

⁴⁷ Ya ɗəf taka sə waleŋgit gewleɗ na Yesu məs dəssoŋ adak masalam pat, abəl gawla na daya net məsdəlveŋge hã sləman piwi.

⁴⁸ Yesu agəm əpel aɓsit na: Mbar kəgilyoŋ dit masalamɗe mãy zleŋɗe vi karmu va kəɓəs na məvoŋtive nani di?

⁴⁹ Pay pak in tat də munokum addəv Gəla na Maŋgəlva əɗɗa əyaka, kərmuwən ɓa. Ya vi an məverin dəknahgəni.

⁵⁰ Yaŋ gewleɗ nan baymet appanəni, anzoŋgu.

⁵¹ Wiyən gawla maɓɓan tay əzbani, tay də gabaga azan təvəkka kaka'ə. Yaŋ məkay ərmani.

⁵² Yaŋ ator gabaga naka, anzan zən mekeleŋ.

Yesu abet deyeɗe net məsdəlveŋge dit ɗiy məsɓeti

⁵³ Yaŋ akanən Yesu ana Daya net məsdəlveŋge da, deyeɗe net məsdəlveŋge, ɗiy məsɓeti dit mərbaŋ-mahenziŋ pak akkalaŋka.

⁵⁴ Piyer tay əzban faraɗa, hã gap eŋgil a daŋgla a na Daya net məsdəlveŋge da. Asanək dit məzugaŋ ama offo uluho.

⁵⁵ Yaŋ deyeɗe net məsdəlveŋge dit ɗiy məsɓet pak akayaŋ miziwe taka nawpel aka Yesu vi dəbayəngəni. Ya dərəhaŋ ɓa.

⁵⁶ Ɗiy diyɗa awaŋgək tepelke aka Yesu, ya met dəsler ɓa.

⁵⁷ Yaŋ ɗiy meɓɓet asilyoŋ, awaŋgək tepelke akan dawnəh na:

⁵⁸ Nam məprəmək ənah na: Naw, wanəɓzlu Gəla na Maŋgəlva an məs ɗiy arkaŋ də veti, pay hoku wanərka maɓɓani məza də vet ɗiy ɓa.

⁵⁹ Ya də as pak əpel net dəsler ɓa'a.

⁶⁰ Daya net məsdəlveŋge le' addekit ɗiyi, assohõn Yesu na: Tay məs kədawzlan ɓa sa? Mi ɗiyəŋ adawpeleŋ akokəŋ di?

⁶¹ Ya nan asanək ɓatɓatə, tay an azlan ɓa. Yaŋ Daya net məsdəlveŋge assohõn əmpa, aɓsən na: Nok istə Kristu Wətən Maŋgəlva məs də zazay sa?

⁶² Yesu amna: Intə. Wakulanən Wətən Ɗəf ɗewwe aka va dəzəŋ na Məzuɓappak, gəm əmpa pay adazzan aka slaybuwən a disiŋ.

⁶³ Yaŋ daya net məsdəlveŋge aŋgar lukut səzani, amna: Wəray tay məkaygən miziweɗe əmpa sa?

⁶⁴ Kəprəmənək aran Maŋgəlva. Mbar kulanən di? Baymet pak atawənək wən akan nawbayən.

⁶⁵ Ɗiy meɓɓet atəŋgaŋgək ətuf mifɗe akani. Asərətənək harani, aslkərənka, yaŋ anahaŋ na: Agəɗ kəleŋ naway di? Məzugaŋ agəmənək Yesu arganənək a tapaslayən.

Piyer tay ənah na dəsən Yesu ɓa

⁶⁶ Aka Piyer asan afuŋ a daŋgla, balamək na daya net məsdəlveŋge taka payə.

⁶⁷ Adan tula Piyer tay əlu offo, təsəŋgləkanəka, təmna: Nok pak kəsokuk də Yesu mə Nazaret.

⁶⁸ Ya aɗamanək dawnəh na: Nawsənən ɓa, naprəm gabban an nok kədaŋgla ənahəŋ ɓa. Ndən vit mbat addəv gəla nawtoŋ dəddəvən a daŋgla. Pay nani, bazlay ahəmka.

⁶⁹ Balamək nak tulaka, təmsak ənah sit ɗiy məs dəziweŋ adaka: Ɗəfəŋka səmmbeti.

⁷⁰ Ya aɗamanək əmpa. Ənziya siɗikke əmpa na, ɗiy məs nadak nek anah sənənək Piyer na: Gesiŋ ɗəf səmmbet kənani, vi mə Galile kənani.

⁷¹ Yaŋ Piyer atəŋ əpel-nawki-əray akani, aswayə amna, nəsən ɗəfəs ɓa, an məs kədanɗaŋgəs ɓa.

⁷² Yaŋ bazlay ahəm masula'ən ləŋgə. Piyer aɗɗumonək wən məs Yesu anah sən na: Tak gəmnda adawhəm təl sula na, wakənah na kəsənu ɓa təl hoku. Yaŋ atəŋ əhəma.